“Əhaliyə gələcəkdə də yüksək tibb xidməti göstərəcəyik"

Son illərdə respublikamızda səhiyyənin sürətlə inkişaf etdirilməsi Goranboy rayonunda əhaliyə göstərilən tibbi xidmətin keyfiyyətinin yüksəldilməsinə gətirib çıxarıb. Bu da əhalinin, xüsusilə də yetişməkdə olan gənc nəslin sağlam böyüməsinə önəmli təsir göstərməkdədir. Məsələnin məhz bu tərəfinə diqqəti cəlb edən Goranboy Rayon Mərkəzi Xəstəxanasının (RMX) baş həkimi Rüstəm Budaqov bizimlə söhbətində bildirdi ki, əsas məqsədimizdən biri də bütün əhalinin, o cümlədən gənclərin sağlamlığının yüksək səviyyədə təmin edilməsidir. Rüstəm Budaqov əhaliyə yüksək tibbi xidməti təmin etmək məqsədilə Goranboy rayon RMX nəzdində 3 xəstəxananın və 40 tibb məntəqəsinin fəaliyyət göstərdiyini söylədi.

O, xəstəxana və tibb məntəqələrində 165 həkim və 475 orta tibb işçisinin əhaliyə sivil tibbi xidmət göstərdiyini xüsusi vurğuladı.

Rüstəm Budaqov onu da dedi ki, 2011-ci ildə rayon Mərkəzi Xəstəxanasının mama-ginekologiya şöbəsi, camaşırxana, mətbəx, MTE və PA birliyinin Goranboy rayon şöbəsi, Qızılhacılı tibb məntəqəsi (TM), Rus Borisi TM əsaslı, Meşəli TM, Buzluq TM, poliklinika şöbəsinin uşaq xəstəlikləri kabinetləri təmir edilib: “Biz əhaliyə daha yaxşı tibbi xidmət göstərmək üçün müntəzəm olaraq yeni tibbi avadanlıqları alırıq. Belə ki, son iki ildə 2 ədəd müasir tipli “Mersedes” ambulans, 67 min 850 manat dəyərində “Medison X6” tipli müasir USM müayinə aparatı, 117 min 287 manatlıq müasir tipli rentgen aparatı və cərəyan tənzimləyicisi, alkometr aparatı almışıq. Bu da xəstələrin kənar şəhər və rayonlara getmək məcburiyyətinin qarşısını almışdır. Bundan əlavə, səhiyyə müəssisələrinin bərk və yumşaq inventarlar, tibbi avadanlıqlarla təminatı yaxşılaşdırılmış, 90 min 729 manatlıq mal alınaraq müəssisələrə paylanmışdır. 6 kompyuter dəsti alınaraq səhiyyə müəssisələrində çalışan tibb mütəxəssislərinin istifadəsinə verilmişdir.

Buna paralel olaraq, rayonun səhiyyə müəssisələrində əhaliyə, o cümlədən imtiyazlı xəstələrə göstərilən xidmətin həcmi artırılmışdır. Hazırda rayon üzrə 1933 şəkərli diabet, 267 onkoloji, 1051 ruhi-əsəb, 12 talassemiya, 8 hemofliya, 260 vərəm xəstəsi dispanser qeydiyyatındadır. Çalışırıq ki, ilk növbədə bu kateqoriyadan olan xəstələrə göstərilən xidmət yüksək səviyyədə olsun, onların dərmanla təminatı ödənilsin. Göründüyü kimi, 3342 nəfər imtiyazlı xəstənin pulsuz dərman təminatı xeyli vəsait tələb edir. İmtiyazlı xəstələrin pulsuz dərman təminatı ilə əlaqədar 2011-ci ilin əvvəllərində müəyyən problemlə üzləşdik. Amma müvafiq qurumlar bunu nəzərə alaraq bizə əlavə olaraq 187 min 400 manat vəsait ayırdılar və demək olar ki, bu sahədəki problem aradan qaldırıldı.

Onu da qeyd edim ki, Mərkəzi Xəstəxana ötən il əhaliyə tibbi xidmətə daha çox diqqət yetirmişdir. Bu müstəvidə də 2011-ci il ərzində tərtib olunmuş qrafik əsasında yaradılmış səyyar həkim briqadaları rayonun 45 yaşayış məntəqəsində olmuş, 358 hamilə qadın, 423 uşaq müayinədən keçirilmiş, müvafiq tibbi yardım edilmiş, 227 xəstə müalicəyə cəlb olunmuşdur.

Belə səyyar tibbi xidmətlərin təşkili əhali tərəfindən razılıqla qarşılanır. Hazırda da qrafik əsasında bu iş davam etdirilir.

Həkimlərimizin biliklərini artırılması da bizim diqqət mərkəzimizdədir. Həkimlərin və orta tibb işçilərinin peşə biliklərinin artılıması üçün 30 həkimi və 59 tibb işçisini ixtisasartırma kurslarına göndərmişik”.

Rüstəm Budaqov onu da vurğuladı ki, son illərdə yoluxucu xəstəliklərə qarşı proflaktiki tədbirlər də gücləndirilib. Onun sözlərinə görə, xüsusi ilə uşaqlar arasında profilaktiki peyvəndlərin aparılması xüsusi nəzarətdə saxlanılıb: “Hamilə qadınlara və uşaqlara göstərilən tibbi xidmət daim xüsusi nəzarətdə saxlanılır. Görülən proflaktiki tədbirlər nəticəsində 2011-ci ildə ana ölümü olmamışdır. İl ərzində 1531 uşaq doğulmuş, 0-1 yaşlı 11 uşaq ölümü qeydə alınmışdır ki, bu da 7 promilli təşkil edir. 2006-2011-ci ildə doğulan uşaqlar üçün elektron-sağlamlıq kartlarının verilməsi prosesi də yekunlaşmaq üzrədir. Uşaqlara 9972 elektron-sağlamlıq kartı sifariş verilmişdir. Bunlardan hazırda rayon üzrə 7870 uşağa (yəni 97 fazinə) elektron-sağlamlıq kartları alınıb verilmişdir. Goranboy Rayon Mərkəzi Xəstəxanası elektron-sağlamlıq kartı alınıb paylanılmasına görə respublika üzrə Bakı şəhərindən sonra 2-ci yerdədir”.

Baş həkim eyni zamanda bəzi problemlərin olduğunu da gizlətmədi. O, dedi ki, bir sıra yaşayış məntəqələrində, o cümlədən Veyisli, Qaradağlı, Əzizbəyov, Muzdurlar həkim, Şadılı, Yolqulular, Yeniyol, Yolpaq, Quşçular tibb məntəqələrində əhaliyə tibbi xidmət üçün lazımi şərati yoxdur: “Həmin müəssisələr üçün yeni binaların tikintisinə, Rayon Mərkəzi Xəstəxanasının isə əsaslı təmirə ciddi ehtiyacı var. Digər əsas problemlərdən biri isə həkim kadrların çatışmamasıdır. Hazırda isə Mərkəzi xəstəxanada 24, Dəliməmmədli şəhər xəstəxanasında 6, kənd həkim məntəqələrində 27 həkim ştatı boşdur. Bu barədə axırıncı dəfə 31 yanvar 2011-ci il tarixdə Səhiyyə Nazirliyinin “Tibb” qəzetində elan vermişik.

Sonda onu da deyim ki, 2012-ci ildə əhalinin sağlamlığının qorunması sahəsində qarşımızda daha mühüm vəzifələr durur. Bu il ana və uşaqların sağlamlığının qorunması, imtiyazlı xəstələrə tibbi xidmətin təşkili məsələlərinə daha çox diqqət yetirəcək, kollektivimizin bütün imkanlarını bu işlərə səfərbər edəcəyik. Bir sözlə, əhaliyə yüksək tibbi xidmət göstərmək bizim əsas məqsədimizdir”.

Zaman.-2012.-21-23 aprel.- S.6.