Tural Bağırzadə: “Avstriya şirkətləri əsasən qeyri-neft sektoruna investisiya qoyurlar”

Son illər Avropa Birliyinin aparıcı ölkələrindən olan Avstriya ilə Azərbaycan arasında müxtəlif sahələr üzrə çoxşaxəli əlaqələr qurulub. Ötən il Avstriya Prezidenti Haynts Fişerin ölkəmizə səfəri zamanı iki ölkə arasındakı əlaqələrin daha da möhkəmlənməsi üçün mədəniyyət, turizm, enerji və digər sahələrdə yeni əməkdaşlıq sazişləri imzalandı. Hazırda onlarla Avstriya şirkəti Azərbaycan iqtisadiyyatının müxtəlif ahələrində uğurla fəaliyyət göstərir. Xüsusilə, mədəniyyət və turizm sahəsində Avstriya şirkətlərinin fəaliyyəti diqqəti cəlb edir. Bakının rəmzi hesab olunan Qız qalasında həyata keçirilən təmir-bərpa işləri, həmçinin Qubada inşası davam etdirilən “Şahdağ” Dağ Xizək Kurortunun inşası kimi önəmli layihələr məhz Avstriya şirkətləri tərəfindən həyata keçirilir. İki ölkə arasındakı əlaqələrin möhkəmlənməsində 5 ay əvvəl Bakıda fəaliyyətə başlayan Avstriya-Azərbaycan Ticarət Palatası da mühüm rol oynayır. Mövcud əlaqələr, həmçinin Ticarət Palatasının fəaliyyəti ilə bağlı bizi maraqlandıran sualları bu qurumun Bakı ofisinin rəhbəri Tural Bağırzadəyə ünvanladıq.

- Tural müəllim, Avstriya-Azərbaycan Ticarət Palatası nə zaman təsis olunub və bu qurumun təsisçiləri hansı şirkətlərdir?

- Avstriya-Azərbaycan Ticarət Palatası 2009-cu ilin ortalarında Avstriyanın paytaxtı Vyana şəhərində qurulub. Ticarət Palatası hər iki ölkədən - həm Avstriyadan, həm də Azərbaycandan olan şirkətlərin birgə təşəbbüsü əsasında təsis olunub. Təsisçilərə gəldikdə isə qeyd edim ki, Ticarət Palatası Avstriyanın 5 nüfuzlu şirkəti tərəfindən qurulub. Bunlar OMV, “asp. consulting”, “Lansky, Ganzger Partner”, “Siemens- Austria” və “Coop Himmelb(l)auisə” şirkətləridir.

- Ticarət Palatası təsis olunarkən öz qarşısına hansı məqsədləri qoyub?

- Təşkilatın əsas məqsədi Azərbaycan ilə Avstriya arasında iqtisadi əlaqələri daha da sürətləndirmək və möhkəmləndirməkdən ibarətdir. Ticarət Palatası iki ölkə arasında məlumat mübadiləsinin həyata keçirilməsinə və iş adamlarının qarşılıqlı əlaqələr qurmasına yardım göstərir. Eyni zamanda Avstriya şirkətlərinin Azərbaycan iqtisadiyyatının müxtəlif sahələrində iştirakını təmin etmək də Ticarət Palatasının əsas məqsədlərindən biridir. Bu baxımdan Ticarət Palatası sahibkarların mövcud biznes əlaqələrini dərinləşdirmək və yeni əlaqələr qurmaları üçün platforma təklif edir. Təşkilat öz üzvləri ilə müntəzəm olaraq konfranslar, iqtisadi məsələlər üzrə müzakirələr və qeyri-rəsmi görüşlər keçirir. Biznes sahəsi ilə yanaşı, mədəniyyət və humanitar məsələlərə də diqqət yetiririk. Bu istiqamətdə də müntəzəm şəkildə sərgi və konsertlər təşkil edirik.

- Bu təşkilatın Bakı ofisi nə zaman təsis olunub?

- 2010-cu ildə qərara alınıb ki, bu təşkilatın Bakı ofisi qurulsun. Ötən ilin sentyabr ayında Ticarət Palatasının Bakı ofısı Ədliyyə Nazirliyində qeydiyyatdan keçib. Həmin tarixdən etibarən biz Azərbaycanda fəaliyyətə başlamışıq. Rəsmi fəaliyyətə başladığımızdan qısa müddət keçməsinə baxmayaraq, bu dövr ərzində biznes-forumlar, sərgilər keçirməyə nail olmuşuq. Həmçinin Avstriyadan bir qrup iş adamını ölkəmizə dəvət edərək, burada iş adamları və müvafiq dövlət qurumları ilə görüşlər təşkil olunub.

- Avstriya-Azərbaycan Ticarət Palatasında hansı ölkənin şirkətləri daha çox təmsil olunur?

- Əvvəllər Ticarət Palatasında Avstriya şirkətləri üstünlük təşkil etsə də, Bakı ofisinin açılmasından sonra bu sahədə bərabərlik yaranıb. Təşkilatda hər iki ölkəni təmsil edən şirkətlər, demək olar ki, eyni sayda təmsil olunurlar. Ancaq qeyd etmək istəyirəm ki, Ticarət Palatasına üzvlüklə bağlı Azərbaycan şirkətlərindən yeni müraciətlər daxil olur.

- Tural müəllim, bilmək istərdik ki, bu Palata hansı zərurətdən ortaya çıxdı?

- Ticarət Palatasının qurulmasında Avstriya şirkətlərinin Azərbaycana olan marağı həlledici olub. Bildiyimiz kimi, hazırda Azərbaycanda olduqca əlverişli investisiya mühiti mövcuddur. Azərbaycanın nüfuzu regionda hər keçən gün daha da artır. Nəzərə almaq lazımdır ki, ölkəmizin olduqca zəngin təbii sərvətlərə sahibdir. Təbii sərvətlər dediyim zaman təkcə neft və qazı nəzərdə tutmuram. Buraya qeyri-enerji sektoruna aid olan sərvətləri də daxil edirəm. Bütün bunlar isə

Avstriya şirkətlərinin ölkəmizə olan marağını daha da artırır.

- Avstriya şirkətləri Azərbaycanda daha çox hansı sahələrə maraq göstərirlər?

- Hazırda Azərbaycanda fəaliyyət göstərən Avstriya şirkətlərinin sayı 50-yə çatıb. Bu şirkətlər ölkəmizdə əsasən qeyri-neft sektoruna investisiya yatırıblar. Dövlətin qeyri-neft sektoruna göstərdiyi dəstək bu sahəni xarici investorlar üçün də cəlbedici edib. Biz də öz fəaliyyətimizi daha çox qeyri-neft sektorunun təbliği istiqamətində qururuq. Mən özüm mütəmadi olaraq, Avstriyaya səfər edirəm və orada iş adamları, həmçinin dövlət qurumlarında işləyən məmurlarla fikir mübadiləsi aparıram. Bu görüşlərdə Azərbaycanın artan potensialı barədə ətraflı məlumat verməyə çalışıram.

- Bəs Azərbaycan şirkətləri Avstriya iqtisadiyyatının hansı sahələrinə sərmayə qoya bilərlər?

- Avstriyada xidmət sektoruna sərmayə qoymaq daha əlverişlidir. Xüsusilə də, otel və restoran biznesi bu ölkədə daha gəlirlidir. Onu da qeyd edim ki, hazırda azərbaycanlılar Avstriyada bu sahədə fəaliyyət göstərirlər. Restoran və bu kimi sahələrdə fəaliyyət göstərən azərbaycanlılar çox vaxt hüquqi şəxs təsis etmədən fəaliyyət göstərirlər ki, bu zaman bizim Palatanın onlarla münasibət qurması çətinləşir. Avstriya-Azərbaycan Ticarət Palatası əsasən hüquqi şəxs kimi fəaliyyət göstərən iş adamları ilə əlaqələr qurur. Biz istənilən hüquqi şəxsə öz yardımlarımızı göstərməyə hazırıq. Onlara rəsmi qeydiyyat, biznes planların tərtibatı məsələlərində də kömək edə bilərik.

Azərbaycan şirkətlərinin Avstriyada fəaliyyət göstərməsi üçün də Ticarət Palatası olaraq hər cür köməyi göstərməyə hazırıq. Azərbaycan şirkətləri ilə Avstriya şirkətləri arasında əlaqələrin qurulmasını təşkil edə bilərik.

- Necə fikirləşirsiniz, xarici ölkələrdən gələn iş adamları üçün Azərbaycanda iş qurmaq nə dərəcədə asandır?

- Biz Avstriya-Azərbaycan Ticarət Palatası olaraq, Avstriyadan buraya iş adamlarını dəvət edirik və onların dövlət qurumları ilə görüşlərini təşkil edirik. Qeyd etməliyəm ki, bu görüşlər zamanı xaricdən gələn iş adamlarını məmurlarımız yüksək səviyyədə qarşılayırlar. Xüsusilə, İqtisadi İnkişaf Nazirliyi, Rabitə və İnformasiya Texnologiyaları Nazirliyi, Mədəniyyət Nazirliyi, Bərpa Olunan Enerji Agentliyində keçirdiyimiz görüşlərdən avstriyalı iş adamları olduqca razı qalıblar. Təbii ki, belə münasibət xarici iş adamlarını ölkəmizə investisiya yatırmağa təşviq edir.

- Avstriya şirkətləri daha çox hansı sahələrdə ixtisaslaşıblar?

- Avstriya şirkətlərinin fəaliyyəti bu ölkənin hüdudlarını aşaraq bütün dünyanı əhatə edir. Bu şirkətlər müxtəlif sahələr üzrə ixtisaslaşıblar. Bu şirkətlərin arasında maliyyə-bank sektorunda fəaliyyət göstərənlər üstünlük təşkil etsələr də, digər sahələrdə, o cümlədən də enerji sektorunda fəaliyyət göstərənlər də var. Avstriya-Azərbaycan Ticarət Palatasının həmtəsisçilərindən olan OMV şirkəti enerji sektorunda fəaliyyət göstərən dünyanın aparıcı qurumlarından hesab olunur.

- Tural müəllim, 2012-ci ildə Ticarət Palatası tərəfindən hansı tədbirlərin keçirilməsi nəzərdə tutulub?

- Biznes-forumların təşkili, avsriyalı iş adamlarının Azərbaycana, azərbaycanlı iş adamlarının da Avstriyaya səfərlərini təşkil etməyi planlaşdırırıq. Eyni zamanda Bakıda film festivalı həyata keçirmək istəyirik. Bu tədbir Avstriya mədəniyyətini azərbaycanlılara daha yaxından tanıtmaq məqsədilə keçiriləcək. 2012-ci ildə Avstriyanın paytaxtı Vyanada Mərkəzi Avropa və Azərbaycan İnvestisiya və Ticarət Sammiti keçirilməsi ilə bağlı müzakirələr aparılır. Ümid editrəm ki, ilin sonuna kimi bu tədbiri həyata keçirə biləcəyik.

ALLAHVERDİ CƏFƏROV

Zaman.-2012.-7-8 fevral.- S.8.