“Pambıqçı Sürəyya barədə film çəkmək mənim üçün maraqlı olardı”

Bir neçə gün əvvəl Türkiyənin məşhur sənət adamlarından olan tanınmış aktyor və müğənni Gökhan Güney FBM estetik klinikasının dəvəti ilə ölkəmizə səfərə gəlib. Gökhan Güney 1954-cü ildə Hatay vilayətinin Reyhanlı rayonunda anadan olub. Yeddi qardaşın ən balacası olan Güney 1967-ci ildə İstanbula köçüb. İlk musiqi təhsilini Melahat Parsın rəhbərlik etdiyi Kadıköy Musiqi Cəmiyyətində alan sənətçi 1979-ci ildə “Qaribin çilesi” adlı ilk albomunu çıxarıb. Bu günə qədər 50-dən artıq filmin çəkilişində aktyor və rejissor olaraq iştirak edib. Əksər filmlərdə baş rolun ifaçısı olan Güney 10-a yaxın filmin rejissoru olub. Gökhan Güney eyni zamanda türk xalq musiqisinin ən güclü ifaçılarından biri hesab edilir. Onunla söhbətimizdə həm şəxsi həyatı, həm də yaradıcılığı ilə bağlı suallarımıza cavab almağa çalışdıq.

- Gökhan bəy, ilk dəfədir Azərbaycanda olursunuz. Bilmək istərdik, Azərbaycana gəlməzdən əvvəl bu ölkə barədə nələri bilirdiniz? Ümumiyyətlə, Azərbaycanı necə təsəvvür edirdiniz?

- Azərbaycana gəlməzdən əvvəl bu ölkə barədə məlumatlı deyildim. Ancaq Türkiyədə işləyən, yaşayan çoxlu azərbaycanlı dostlarım var. Həmin dostların sayəsində mən Azərbaycanı və azərbaycanlıları özümə doğma hesab etmişəm. Mən Bakı ilə Türkiyənin hər hansı bir şəhəri arasında fərq görmürəm. Arada sərhədlər olsa da, mən heç vaxt Azərbaycana xarici ölkə kimi baxmamışam. Türkiyədə getmək istədiyim, amma gedə bilmədiyim yerlər, şəhərlər var. Bakını da hər zaman belə yerlərdən biri hesab etmişəm. Bakıya gəldiyim zaman da özümü burada Türkiyədəki kimi hiss edirəm.

- Bir neçə gündür Bakıdasınız. Paytaxtımızda nələri gördünüz, nələri bəyəndiniz?

- Bakı təsəvvür etdiyimdən də gözəl şəhərdir. Bakının Avropa şəhərləri ilə bənzərliyi çoxdur. Xüsusilə də, tikilən müasir binalar diqqətimi çox cəlb etdi. Bakıdakı tikililəri Parisdəki binalarla müqayisə etmək olar. Bakıda aparılan tikinti işlərindən belə başa düşmək olur ki, burada yaxın gələcəkdə daha müasir binalar inşa olunacaq. “Avroviziya” müsabiqəsinin keçirildiyi “Kristal Zal”ın ətrafı olduqca gözəldir. Orada olduğumuz zaman dedilər ki, çox yaxın zamanlara qədər bu ərazidə istifadəyə yararsız olan köhnə tikililər olub. Tullantılar bu əraziyə atılırmış. Üstəlik, nəzərə almaq lazımdır ki, Azərbaycan gənc bir ölkədir. Yəqin ki, Sovetlər Birliyi dövründə müstəqil siyasət həyata keçirə bilməyib. Bu baxımdan çox qısa müddət ərzində bu qədər uğur əldə etmək böyük nailiyyətdir.

- Necə fikirləşirsiniz, Gökhan Güney bu qədər məşhur olmasına görə aktyorluğuna, yoxsa müğənniliyinə borcludur?

- Film sahəsindəki uğurlarım musiqi sahəsindəki uğurlarımdan daha çoxdur. 50-dən çox filmdə oynamışam. Bu filmlərin əksəriyyətində baş rolda çəkilmişəm. Rol aldığım filmlər o dövrdə olduqca məşhur olub. Həm də bu filmlərdən böyük gəlirlər əldə edilib. Ötən əsrin 70-80-ci illərində filmlərə böyük tələbat var idi. Televiziya indiki qədər geniş yayılmamışdı. Filmlər əsasən kinoteatrlarda nümayiş etdirilirdi. Həmin dövrdə min nəfər tamaşaçı tutumu olan kinoteatrlar fəaliyyət göstərirdi. İldə 4 filmə çəkilirdim. Ancaq ötən əsrin 90-cı illərində özəl televiziya kanalları açıldıqdan sonra Türkiyədə film sektoru tənəzzülə uğradı. Filmlərin yerini televiziya serialları almağa başladı. Minnəfərlik kinoteatrlar bağlanmağa başladı. İndi böyük kinoteatrlar 100-200 nəfər tamaşaçı tutur. Hətta bir çox kinoteatrın tamaşaçı tutumu 50 nəfərdən də azdır.

- Müğənnilikdən aktyorluğa necə gəldiniz?

- İlk albomum 1979-cu ildə çıxdı. Bundan beş-altı ay sonra filmə çəkilmək təklifi aldım. Bildiyiniz kimi, o dövrdə çəkilən filimlərin böyük əksəriyyəti musiqili olurdu. Bu səbəbdən də filmlərdə səsi gözəl olan mügənnilər rol alırdı. Təkcə səsimin gözəl olması deyil, eyni zamanda xarici görünüşüm də filmə çəkilə bilməyim üçün uyğun idi.

- Azərbaycan filmləri haqqında nə bilirsiniz?

- Açığını deyim ki, Azərbaycan filmləri haqqında geniş məlumatım yoxdur. Bunun da obyektiv səbəbləri var. Türkiyədə Azərbaycan filmləri nümayiş etdirilməyib. Hesab edirəm ki, bu həm bizim, həm də Azərbaycan tərəfinin çatışmazlığıdır. Biz Azərbaycan filmlərini nümayiş etdirməməklə səhv etmişik. Amma Azərbaycan tərəfindən də belə cəhdlər olmayıb. Azərbaycan, iqtisadiyyatı kifayət qədər inkişaf etmiş ölkədir. Böyük filmlərin çəkilməsi üçün geniş imkanlar vardır. Xüsusilə, Azərbaycanın tarixini dünyaya tanıtmaq üçün belə filmlərə ehtiyac var. Burada dostlardan eşitdiyim bəzi hadisələr filmlər üçün maraqlı mövzu ola bilər. Məsələn, pambıq yığan Sürəyya adlı bir qızın hekayətini mənə danışdılar. Bu mənim çox xoşuma gəldi. Həmin qız üçün yazılan mahnını da əzbərlədim: Səhər-səhər sən tarlaya çıxanda, Səs yayılır hər mahala Sürəyya.

Bu mövzuda film çəkmək mənim üçün maraqlı olardı.

- Bəs Azərbaycan müğənniləri ilə necə, tanışlığınız olubmu? Ümumiyyətlə, Azərbaycan musiqisi haqqında məlumatınız varmı?

- Bu günə qədər Azərbaycanın sənət adamları ilə hər hansı bir ünsiyyətim, tanışlığım olmayıb. Amma dostlarımın çoxu Azərbaycan mahnılarını oxuyublar. Bu səbəbdən Azərbaycan musiqisi haqqında, az da olsa, məlumatım olub.

- Azərbaycanlı musiqiçilərlə, aktyorlarla tanış olmaq, onlarla ortaq layihələr reallaşdırmağı düşünürsünüzmü?

- Bu məsələ ilə bağlı bəzi düşüncələrim var və buradakı dostlarla da bu barədə söhbətimiz olub. Gələcəkdə Azərbaycan televiziyalarının birində veriliş hazırlaya bilərəm. Məsələn, azərbaycanlı sənətçiləri Türkiyənin gəzməli-görməli yerlərinə apararaq, orada çəkilişlər aparmaq mümkündür. Hesab edirəm ki, belə bir televiziya verilişi maraqlı ola bilər. Ancaq bu, sadəcə, söhbətdən ibarətdir. Ona görə də layihə barədə danışmaq hələ çox tezdir.

- Gökhan bəy, hazırda Türkiyədə hansı layihənin üzərində işləyirsiniz?

- Hazırda bir televiziya serialının çəkilişinə hazırlaşırıq. “Harem” adlandıracağımız bu serialın çəkilişlərinə yaxın bir-neçə ay ərzində başlamağı düşünürük. İndi aktyorların seçimini aparırıq.

ALLAHVERDİ CƏFƏROV,

ARİF İBİŞ,

Zaman.-2012.-24-25 iyul.-S.6.