“Ağacoyma sənəti çətin və şərəfli bir peşədir”

Qəbələ şəhəri ancaq öz füsunkar təbiəti ilə deyil, xalq tətbiqi sənəti, yeməkləri və qonaqpərvərliyi ilə seçilir. Turizm sahəsinə ayrılan diqqət nəticəsində Qəbələ öz gözəlliyini hamıya nümayiş etdirmək imkanı əldə edir.

Qəbələni yerli və xarici turistlərə özünəməxsus tərzdə təqdim edən sənətkarlardan biri də Şahin ustadır.

Bir çoxlarının yararsız kötük və ya tullantı odun parçası kimi baxdığı şeydən o, sənət əsəri ərsəyə gətirir. Əlinə keçən hər bir odun parçasından nəsə düzəldir. Bu, suvenir də ola bilər, hansısa məişət əşyası da, dərs ləvazimatı da, milli atribut da, hansısa şirkətin loqosu da. Çünki o, ağaca baxarkən onun içində gizlənən sənəti görür.

Şahin Rəhimov 41 illik ömrünün 16 ilini tətbiqi sənətə həsr edib. İndiyə qədər ərsəyə gətirdiyi əsərlərin sayını itirib. Hər gün nəsə ortaya qoyur. Şahin usta işinin vurğunu olduğunu söyləyir. “Ağacoyma sənəti çətin və şərəfli bir peşədir. Bu, elə sənətdir ki, bu işdən zövq almamaq mümkün deyil. Kələ-kötür odun parçasını qoyursan qabağına, əlinə iskənə alıb işləyirsən. Müəyyən müddət keçir və bir də görürsən ki, həmin kələ-kötür odun parçasından möhtəşəm bir sənət əsəri ortaya çıxıb”,- Şahin usta deyir.

O, mövzu sarıdan korluq çəkmədiyini bildirir. Şahin usta tətbiqi sənəti qısaca belə xarakterizə edir: “Beyin fikirləşir, əllər çatdırmır”. Bu baxımdan tətbiqi sənət ustalarının iş vaxtı ilin 12 ayı, günün 24 saatıdır. Bəzən yatanda gördüyü bir yuxu onun üçün ilham qaynağı ola bilir. Şahin usta düzəltdiyi hər bir əşyanın onun üçün doğma və əziz olduğunu söyləyir. Bəzən olur ki, min bir əziyyətlə yonub düzəltdiyi suveniri satmağa əli gəlmir. “Ancaq nə etmək olar ki, mən də bu işdən dolanmalıyam”,- deyən Şahin usta evinin qarşısında kiçik bir dükan açıb. Burada satışa çıxarılan əl işlərinin qiyməti 5 manatdan 3000 manata qədərdir. O, portret sifarişləri də qəbul edir.

Şahin ustanın dükanı Qəbələnin Vəndam qəsəbəsində, rayona Bakıdan girişdən 10 kilometr məsafədə, yolun sol kənarında yerləşir.

Zaman.-2012.-12-14 may.-S.6.