Kitab karvanı folklor paytaxtında(2)

Bu il Azərbaycanın folklor paytaxtı elan edilən Masallıda hələ bayram əhvali-ruhiyyəsi yaşanırdı. Çünki rayonda keçirilən Beynəlxalq Folklor Festivalı bir neçə gün idi ki, başa çatmışdı. Amma bu gözəl tədbirin doğurduğu ab-havanı rayon mərkəzinə gələn yeni qonaqlar da hiss edirdilər. Beynəlxalq Folklor Festivalının əsas təşkilatçılarından olan Rayon Mədəniyyət və Turizm İdarəsinin rəisi Lətifə xanım Mövsümova ilə ilk söhbətimiz də bu mövzuda oldu. Ömrünün çoxunu mədəniyyətimizin inkişafına həsr edən Lətifə xanım dedi:

- Bu festival bizim üçün sınaq idi. Buna görə də ciddi hazırlıq görmüşdük. Folklor Festivalına respublikamızın bir çox şəhər və rayonlarından, eyni zamanda qardaş Türkiyədən, Dağıstandan, Kabarda-Balkardan, İran İslam Respublikasından, Latviyadan folklor kollektivləri, xalq mahnılarının ifaçıları, tanınmış sənət adamları qatılmışdılar. Zəngin etnik tərkibi və folkloru olan Dağıstanın “Şalva” mahnı və rəqs ansamblının, Kabarda-Balkar rəqqaslarının çıxışları da alqışlarla qarşılandı. Latviya müğənnisi An Marinin doğma dildə ifaları yaddaqalan oldu. Latış qızının Azərbaycan xalq mahnısı “Sarı gəlin”i Azərbaycan dilində məharətlə oxuması festival iştirakçılarına böyük hədiyyə idi. Bu respublikanın dünyada məşhur olan “Vilki” qrupunun çıxışları da tamaşaçılarda xoş ovqat yaratdı. Naxçıvan yallısı hər zaman olduğu kimi, folklor festivalında da qəlbləri coşdurdu. Naxçıvandan gəlmiş mahnı və rəqs kollektivi “Şərur yallısı” ilə ürəkləri fəth etdi. Türkiyədən gəlmiş folklor kollektivinin, iranlı aşıqların çıxışları da festivalı zənginləşdirdi.

Əlli ildən çox el şənliklərinə xoş ovqat bəxş edən, şən mahnı və rəqsləri ilə respublikamızdan uzaqlarda da sevilən rayonumuzun “Halay” ansamblı bu festivalda da yaddaqalan çıxışlar etdi. Tədbir çərçivəsində rayonun Boradigah, Mahmudavar, Qızılavar, Şərəfə, Türkoba, Hişkədərə və digər yaşayış məntəqələrində keçirilən şənliklər, el sənətkarları ilə görüşlər, onların əl işlərinə baxış da folklorumuzun zənginliyini bir daha nümayiş etdirdi. Bu gün kitab karvanının Masallıya gəlişi də biz mədəniyyət işçiləri və kitabsevərlər üçün bayramdır. Çünki kitab elmin, yüksəlişin, inkişafın təməli və mədəniyyəti zənginləşdirən ən dəyərli vasitədir.

Nəsir Muxtarlı: “Kitab oxunmayan yerdə cəhalət hakim olar”

Şəhərin mərkəzindəki Nizami parkına böyük axın vardı. Tədbir hələ başlamasa da uşaqlar böyük meydanda stolların üzərinə düzülmüş kitablarla tanış olurdular. Şeirləri sevə-sevə əzbərlənən şair İlyas Tapdıq müəllimlərin və uşaqların əhatəsində idi. Onlar növbə ilə İlyas müəllimlə şəkil çəkdirir, şairdən avtoqraf alırdılar. Firudin bəy Köçərli adına Respublika Uşaq Kitabxanasının direktor müavini Zahirə Dadaşova, kitabxananın əməkdaşları Almaz Əşrəfova, Şəlalə Əmrahova və Könül Səmədzadə uşaqlara yeni kitablar barədə məlumat verirdilər.

Meydan rəngbərəng çiçəklər və lentlərlə yenidən bəzənirdi. Məktəb ansamblları çıxışa hazırlaşırdılar. Nağıl qəhrəmanları hərəkətləri ilə səyyar sərgiyə gələnlərə gülüş, təbəssüm bəxş edirdilər. Mədəniyyət Evinin qarşısına toplanmış milli geyimli oğlan və qızlar sakitcə dayanıb tədbirin başlanmasını gözləyirdilər. Parkın qarşısından bazara doğru uzanan küçəyə isə şəhər sakinləri toplaşmışdılar...

Aparıcının səsi hamını sakitləşdirdi. Çıxış üçün ilk söz Masallı Rayon İcra Hakimiyyəti başçısının müavini Nəsir Muxtarlıya verildi. Nəsir müəllim, əvvəlcə, yeni dərs ilinin başlanması münasibətilə şagird və müəllimləri təbrik etdi, onlara bilik yollarında uğurlar arzuladı. Sonra kitabın insan həyatındakı rolundan bəhs etdi. O, qeyd etdi ki, bu gün kitabın həyatımızda rolu özünü daha qabarıq göstərir: “Çünki insanın mənəvi cəhətdən zənginləşməsində kitab böyük rol oynayır. Bu gün istifadə etdiyimiz kompyuter və digər kommunikasiya vasitələri kitabı tam əvəz edə bilmir. Buna görə də özünüzdə kitab oxumaq vərdişi yaradın və daha çox kitab oxuyun. Bilməlisiniz ki, kitab oxunmayan yerə cəhalət girər, o yerdə ədalət olmaz. Fikrimizcə, yalnız siz məktəblilərin deyil, hər bir soydaşımızın kitaba münasibəti dəyişməlidir. İnanıram ki, bu səyyar sərgi məktəblilərimizin kitaba marağının artmasında müəyyən rol oynayacaq”.

Firudin bəy Köçərli adına Respublika Uşaq Kitabxanasının direktoru, Əməkdar mədəniyyət işçisi Fizurə xanım səyyar kitab sərgisi iştirakçılarını salamlayaraq dedi:

- Masallı ölkəmizin gözəl, zəngin rayonlarından biridir. Burada bir-birindən gözəl, müasir məktəb binaları, mədəniyyət ocaqları, idman kompleksləri var. Bütün bunlar sizin yaxşı oxumağınıza, sağlam böyüməyinizə xidmət edir.

Əziz məktəblilər, möhtərəm Prezidentimiz İlham Əliyev 2007-ci ildə “Kitabxanaların maddi-texniki bazasının yaxşılaşdırılması haqqında” xüsusi sərəncam imzalayıb. Bir il sonra isə 2008-2013-cü illər üzrə kitabxana və informasiya sahəsini əhatə edən Dövlət Proqramı elan edilib. Məqsəd, ilk növbədə, ölkəmizdə əhalinin kitaba olan marağını artırmaqdır. Bunun üçün ardıcıl işlər görülür, müxtəlif layihələr həyata keçirilir. Bu səyyar kitab sərgisi də belə layihələrdən biridir. Məlumat üçün deyim ki, mədəniyyət və turizm nazirinin sərəncamı və kitabxanamızın əməkdaşlarının səyi ilə gerçəkləşdirilən səyyar kitab sərgiləri ötən il “Kitab karvanı İpək yolu ilə” devizi ilə Goranboy, Gəncə şəhəri, Şəmkir, Tovuz, Ağstafa və Qazax rayonlarında keçirilmişdi. Bu il isə kitab dolu karvan Cənub bölgəmizə üz tutub. Ümid edirik ki, bu yeni nəşrləri diqqətlə oxuyacaqsınız. Bizimlə birlikdə əsərlərini sevə-sevə oxuduğunuz uşaq şair və yazıçıları da görüşünüzə gəliblər. İndi onlar da sizin qarşınızda çıxış edəcək, ürək sözlərini söyləyəcək və yeni əsərlərini oxuyacaqlar.

Çıxışlardan sətirlər

Şair İlyas Tapdıq: - Əziz məktəblilər, siz xoşbəxt bir zamanda yaşayırsınız. Sizə baxanda öz uşaqlığımı xatırlayıram. Mən birinci sinfə 1941-ci ildə getmişəm. O zaman faşizmə qarşı böyük müharibə başlanmışdı. Yəni siz yaşda olanda bizim qismətimizə müharibə, qan-qada düşmüşdü. Biz yuxularımızda gündəlik döyüşlərdən verilən xəbərlə yaşayırdıq. Siz isə hər gün azad və müstəqil Azərbaycanımızda aparılan geniş quruculuq işləri barədə çoxlu xəbərlər eşidirsiniz. Sizin üçün gözəl dərsliklər yazılıb, müasir məktəblərdə təhsil alırsınız.

Azərbaycanın sabahı sizə etibar olunacaq. Vətəni də, onun torpağını da, insanları da sevməyi bizə kitablar öyrədir. Kitab dərin dəryadır, kim ona baş vursa, qiymətli incilər çıxarar. Kitab elə bir süfrədir ki, onun nemətləri heç vaxt tükənmir. Buna görə də kitabı çox sevin, daha çox oxuyun...

Yazıçı Nüşabə Məmmədli: - Mənə elə gəlir ki, kitab bayramı ən gözəl bayramlardan biridir. Kimsə kitab oxuyanda özünü oradakı müsbət qəhrəmanlara bənzədir. Kimisə divə bənzədəndə xoşu gəlmir. Hər kəs Məlikməmmədə oxşamaq istəyir. Bu, təbiidir. Bu hissi bizə kitablar aşılayır. Çünki kitab bizə yaxşı insan olmağı öyrədir. Son illər uşaq və gənclərimiz daha çox nağıl qəhrəmanlarına yox, milli qəhrəman Mübariz İbrahimova, Ramil Səfərova və başqalarına bənzəmək istəyirlər. Çünki biz müstəqil və azad olsaq da Qarabağ dərdimiz var. Biz torpaqlarımızı azad etməliyik. inanırıq ki, sizlərin arasından belə vətənpərvər qəhrəmanlar yetişəcək. Bunun üçün isə yaxşı oxumaq lazımdır ki, vətəni daha yaxşı tanıyasan, bu torpağı daha çox sevəsən...

Yazıçı Sevinc Nuruqızı: - Bu bayrama görə sizinlə birlikdə sanki Günəş də sevinir. Qoy bu torpaqda günəş işığı həmişə bol olsun. Rayonunuz çox gözəldir, məktəbləriniz də. Sizə qalır yaxşı oxumaq. Biz də yanınıza həmin niyyətlə gəlmişik. Sizə hədiyyəmiz də elə kitablardı. Bu gördüyünüz kitablar sizə hədiyyə kimi veriləcək. Biz qələm sahibləri həm də ona görə gəlmişik ki, bölgələrdə yaşayan oxucularımızı tanıyaq. Gəlmişik ki, görək siz bizim kitablarımızı oxuyub bəyənirsinizmi? Siz burada şeir söylədikcə biz öz zəhmətimizin hədər getmədiyini hiss edirik. Mən “Təhsil” nəşriyyatının əməkdaşı kimi sizin dərsliklərin hazırlanmasında da bilik və bacarığımı sərf edirəm. Sevinirəm ki, sizin bilik qazanmağınızda, az da olsa, mənim də əməyim var...

Payızın ilk günündə istedadlı məktəblilər öz mahnı və rəqsləri ilə səyyar kitab sərgisini daha canlı və yaddaqalan etməyə çalışdılar. Çıxışlar bir-birini əvəz etdikcə Nizami parkına gələnlərin sayı çoxaldı. Folklor paytaxtımızda keçirilən tədbir bizi Masallıya, onun qonaqpərvər, zəhmətkeş insanlarına daha çox bağladı.

SƏMƏD MƏLIKZADƏ

Zaman.- 2012.- 2-3 oktyabr.- S.7.