Son 6 ildə Azərbaycana gələn turistlərin sayı 2 dəfədən çox artıb

Bu gün dünyanın əksər ölkəsində Ümumdünya Turizm Günü qeyd edilir. 37 il əvvəl - 1975-ci ilin 27 sentyabr tarixində Birləşmiş Millətlər Təşkilatının (BMT) tərkibində qurulan Ümumdünya Turizm Təşkilatının (ÜTT) nizamnaməsi təsdiq olunub.

1980-ci ildən etibarən bu tarix Ümumdünya Turizm Günü kimi qəbul olunur. ÜTT-yə daxil olduğumuz 2001-ci ildən başlayaraq bu günü ölkəmizdə də qeyd edirik. Qeyd edək ki, hazırda ölkəmizlə ÜTT arasında geniş əlaqələr mövcuddur. Təxminən 20 gün əvvəl ÜTT tərəfindən Bakıda “İpək Yolunun dadı: kulinariya, mədəniyyət və turizm” adlı beynəlxalq konfrans keçirilib. Konfransda ÜTT-nin baş katibi Taleb Rifai də iştirak edib. Qeyd edək ki, bütün dünyada turizmə böyük əhəmiyyət verilir. Ümumdünya turizm günü ərəfəsində dünya ictimaiyyətinə etdiyi müraciətdə BMT-nin baş katibi Pan Gi Mun da bəyan edib ki, dünyanın ən geniş iqtisadi sektorlarından biri olan turizm, ətraf mühitin davamlılığı, təbii inkişaf və enerji ilə əlaqədə iqlim dəyişikliyinə qarşı mübarizəmizi təbliğ etmək üçün xüsusilə önəm daşıyır. ÜTT-nin açıqladığı məlumatda bildirilir ki, cari ilin ilk yarısında dünyada 467 milyon insan turizm məqsədilə yaşadıqları yerlərdən kənara səfər ediblər. Təşkilatdan belə hesab edirlər ki, ilin sonuna kimi turistlərin sayının 1 milyarda çatacağı gözlənilir. Məlumatda göstərilir ki, ötən ilin eyni dövrü ilə müqayisədə turistlərin sayı 5% artıb. Ən yüksək artım Asiyada qeydə alınıb. Bu dövürdə Asiya ölkələrinə səfər edən turistlərin sayı ötən ilə nisbətdə 8% çox olub. Avropa ölkələrində bu göstərici 4%, Amerikada 5%, Afrikada isə 7,9% təşkil edib. Son illər ölkəmizdə turizmin inkişafına böyük önəm verilir. Prezident İlham Əliyevin sərancamı ilə 2011-ci il “Turizm ili” elan edilib. Ölkə başçısının 6 aprel 2010-cu il tarixli sərəncamı ilə təsdiqlənən “Azərbaycan Respublikasında 2010-2014-cü illərdə turizmin inkişafına dair Dövlət Proqramı” isə bu sahənin inkişafına göstərilən diqqətdən xəbər verir. Həmçinin 2002-ci ildən başlayaraq hər il ölkəmizdə Beynəlxalq Turizm Sərgisi (AİTF) təşkil olunur. 2006-cı ildə Azərbaycan Turizm İnstitutu açılıb. Son 6 ildə ölkəyə gələn turistlərin sayı 2 dəfədən çox artıb. Dövlət Statistika Komitəsi (DSK) 2006-ci ildə ölkəmizə 732 min, 2011-cu ildə isə 1,56 milyon turistin gəldiyini bildirir. Son bir il ərzində isə ölkəyə təşrif gətirən turistlərin sayında 18% artım qeydə alınıb. Qeyd etdiyimiz kimi, ötən il turizm məqsədilə ölkəmizə 1,56 milyon insan gəlib və bunlardan 33,2%-i və ya 519,8 min nəfəri istirahət və əyləncə, 37,9%-i və ya 592 min nəfəri isə işğüzar məqsədlər üçün ölkəmizə gəlib.

Zaman.- 2012.- 27-28 sentyabr.- S.8.