20 il ərzində Salyanın tarixində ən əlamətdar və unudulmaz səfərlər

Heydər Əliyevin xeyir-duası və təşəbbüsü ilə Salyanda Ümumittifaq əhəmiyyətli müəssisələr - Salyan plastik kütlə emalı zavodu, elektrik-qaynaq avadanlıqları zavodu, taxıl məhsulları kombinatı və başqa obyektlər istifadəyə verilmişdir. Çox əlamətdar haldır ki, Heydər Əliyev Mərkəzi Komitənin I katibi seçildikdən sonra ilk səfərə çıxdığı rayon Salyan olmuşdur.

Salyanlılar böyük fərəh və qürur hissi ilə bildirirlər ki, ulu öndərimiz hakimiyyətdə olduğu dövrdə Salyan rayonunu da həmişə diqqət mərkəzində saxlamış, bu bölgənin iqtisadi gücünün yüksəlməsi, xalqın maddi rifah halının yaxşılaşması üçün bir sıra fərmanlar və sərəncamlar imzalamışdı. Məhz Heydər Əliyevin xeyir-duası və təşəbbüsü ilə Salyanda Ümumittifaq əhəmiyyətli müəssisələr - Salyan plastik kütlə emalı zavodu, elektrik-qaynaq avadanlıqları zavodu, taxıl məhsulları kombinatı və başqa obyektlər istifadəyə verilmişdir. Çox əlamətdar haldır ki, Heydər Əliyev Mərkəzi Komitənin I katibi seçildikdən sonra ilk səfərə çıxdığı rayon Salyan olmuşdur. 1969-cu ilin avqust ayında Salyan rayonunda olan respublikanın birinci şəxsi Kürsəngidə neftçilərlə, Qaraçalada və Qarabağlıda pambıqçılarla, taxılçılarla, heyvandarlarla görüşmüş, sonra Salyan şəhərində bir neçə müəssisəyə baş çəkdikdən sonra raykomda keçirdiyi yığıncaqda özünün fəaliyyət proqramı barədə məlumat vermişdir. 1972-ci ildə Biləsuvarda və Cəlilabadda kənd zəhmətkeşləri ilə görüşlər keçirərkən, işinin çoxluğuna baxmayaraq özünün təşəbbüsü ilə tikilən Salyan plastik kütlə emalı zavodunda tikinti işlərinin gedişi ilə maraqlanmış, burada zavodun 40-50 addımlığında olan “Oktyabr” kolxozunun pambıqçıları ilə görüşmüş, onların bir sıra məişət problemlərinin həllinə əməli köməklik göstərmişdir.

1977-ci ilin 14 iyulunda Salyan rayonunda olan Heydər Əliyev “Bəşirabad”, “Yeni Muğan”, “Oktyabr” kolxozlarında, Əzizbəyov adına, Frunze adına, Qüdrət Səmədov adına, M.F.Axundov adına kolxozlarda, yeni istifadəyə verilən mal-qara və düyəyetişdirmə birliyində olmuş, Salyan şəhərində yeni istifadəyə verilmiş tarix-diyarşünaslıq muzeyinə baxmış, günün axırında rayon mədəniyyət evində keçirilən partiya-təsərrüfat fəalları yığıncağında çıxış edərək, salyanlıların böyük ziyalı potensialına malik olduğunu, işgüzarlığını, təşəbbüskarlığını xüsusi vurğulamışdır. Dövlətimizin başçısının 1981-ci ilin 4 iyulunda Salyana gəlişi də rayonun həyatında əlamətdar hadisəyə çevrilmişdir. Salyanda həyata keçirilən böyük quruculuq işləri ilə yaxından tanış olan Heydər Əliyev sonra pambıq tarlalarında, taxıl zəmilərində, heyvandarlıq fermalarında olmuş, əmək adamlarının həyat şəraiti ilə yaxından maraqlanmış, kəndlərdə müasir tipli mədəniyyət obyektlərinin, kitabxanaların, xidmət müəssisələrinin tikilməsinə dair konkret tövsiyə və tapşırıqlarını vermişdir.

1998-ci ildə prezident seçkiləri marafonuna Salyandan başlayan ulu öndər seçicilərin, böyük əksəriyyətinin dəstəyini qazanaraq ölkə Prezidenti seçildi. Heydər Əliyevin istər Azərbaycana rəhbərlik etdiyi 1969-1982-ci illərdə, istərsə də müstəqil Azərbaycanın Prezidenti olduğu 1993-2003-cü illərdə yüzlərlə salyanlı yüksək fəxri adlara, dövlət mükafatlarına layiq görülmüşdür. Pambıqçılıq briqadiri Sabir Əhmədov, neft ustası Salman Nağıyev, M.F.Axundov adına kolxozun suçusu Bibinisə Eyvazova Sosialist Əməyi Qəhrəmanı adına layiq görülmüş, yüzlərlə şəxs Dövlət mükafatlarına, SSRİ və Respublika Ali Sovetinin deputatlığına, müxtəlif orden və medallara layiq görülmüşlər. Bütün bunlar Heydər Əliyevin salyanlılara göstərdiyi tükənməz qayğının təzahürüdür.

Həmin tarixi gündən bizi 41 illik bir zaman kəsiyi ayırır. Həmin tarixə nəzər saldıqda ulu öndərimiz Heydər Əliyevin rəhbərliyi altında Azərbaycanın siyasi-iqtisadi, sosial-mədəni sahədə əsrlərə bərabər inkişaf yolu keçdiyinin əyani şahidi oluruq. Böyük fərəh və qürur hissi ilə bildiririk ki, 2003-cü ildən ulu öndərin siyasi xəttini onun layiqli varisi möhtərəm Prezidentimiz cənab İlham Əliyev uğurla davam etdirir. Heydər Əliyev ideyaları Azərbaycan dövlətini və xalqını əbədi səadətə aparır.

Biz bu gün böyük fərəh və qürur hissi ilə bildiririk ki, ulu öndər Heydər Əliyevin respublikamıza uzunmüddətli rəhbərlik dövrü Azərbaycan xalqının tarixinə qızıl həriflərlə həkk edilmişdir. Heydər Əliyevin alternativsiz siyasi və iqtisadi strategiyası bizi bundan sonra da qələbələrdən-qələbələrə aparacaqdır.

İlham Əliyevin Salyana səfərləri

Möhtərəm Prezidentimiz zati-ailələri cənab İlham Əliyev də ulu öndərimiz kimi, 2003-cü ilin 1 oktyabrında prezident seçkiləri marafonuna Salyan rayonundan başladı. Bəli, həmin unudulmaz gün rayon ictimaiyyətinin nümayəndələri Salyan Rayon İcra Hakimiyyətinin inzibati binasının qarşısındakı meydanda çox hörmətli, prezidentliyə namizədi səmimiyyətlə qarşıladılar. Meydana toplaşmış minlərlə salyanlı cənab İlham Əliyevə böyük hörmət və ehtiramlarını bildirdi. Çıxış edən ictimaiyyətin nümayəndələri cənab İlham Əliyevin ulu öndərin siyasi xəttini uğurla davam etdirəcəyinə möhkəm əmin olduqlarını bildirdilər.

Möhtərəm Prezidentimiz cənab İlham Əliyevin Salyana ikinci səfəri 2006-cı ilin 10 avqustunda oldu. Dövlət başçımız Salyan olimpiya idman kompleksinin tikintisi ilə tanış olduqdan sonra gücü 220 mvt olacaq “Salyan” yarımstansiyasının təməlqoyma mərasimində iştirak etdi, gilizi təmələ qoyaraq, ilk beton qarışığını tökdü. Sonra Salyan şəhərində Heydər parkının və xalqımızın ümummilli liderinin abidəsinin, Heydər Əliyev muzeyinin açılışında iştirak etdi, Zərifə Əliyeva adına parkda oldu, Salyan rayon mərkəzi xəstəxanasında aparılan təmir-bərpa işləri ilə maraqlandı, Salyan süd emalı zavodunun açılış mərasimində iştirak etdi, Salyan şəhər ümumtəhsil internat məktəbi ilə tanış oldu, rayon ictimaiyyəti qarşısında nitq söylədi.

Azərbaycan Prezidenti cənab İlham Əliyevin rayonumuza üçüncü səfəri 2008-ci ilin 7 sentyabrında oldu. Dövlətimizin başçısı Qardili kənd orta məktəbinin binasının, Salyan olimpiya idman kompleksinin təntənəli açılış mərasimlərində iştirak etmiş, tədbir iştirakçıları qarşısında geniş nitq söyləmişdir. Həmin gün Azərbaycan Prezidenti İlham Əliyev Salyan rayon mərkəzi xəstəxanasının əsaslı təmirdən sonra açılışında da iştirak etmişdir.

2010-cu ildə Azərbaycan Prezidenti cənab İlham Əliyev iki dəfə Salyan rayonuna səfər etmişdir. Aprelin 29-da Salyan rayonuna səfəri çərçivəsində Ələt-Astara-İranla dövlət sərhədi avtomobil yolunun 22 kilometrlik hissəsinin, Salyanda soyuducu anbar kompleksinin, “Salyan” elektrik yarımstansiyasının açılışlarında iştirak etmişdir. Prezident İlham Əliyev noyabrın 1-də Kür və Araz çaylarının daşması nəticəsində təbii fəlakətdən ziyan çəkmiş rayonlara səfəri çərçivəsində Salyan rayonunda olmuş, yeni salınmış qəsəbənin açılışında iştirak etmişdir.

2011-ci ilin 15 aprelində respublikamızın Cənub bölgəsinə səfər edən Azərbaycan Prezidenti İlham Əliyev Salyan rayonunda da olmuşdur. Prezident İlham Əliyev Salyan şəhərində başlanan böyük tikinti-quruculuq işləri ilə tanış olmuş, şəhər sakinləri ilə səmimi söhbət etmiş, yaxın zamanlarda Salyanın yeni, gözəl simasının yaradılacağını vurğulamışdır.

Bir daha qeyd edirik ki, ümummilli liderimiz Heydər Əliyevin, möhtərəm Prezidentimiz cənab İlham Əliyevin Salyan rayonuna səfərləri ən əlamətdar və unudulmaz hadisə kimi salyanlıların yaddaşına əbədi həkk olunmuşdur.

Kərəm Muradov,

Salyan Rayon İcra Hakimiyyətinin

İctimai təşkilatlar və siyasi partiyalarla

iş şöbəsinin müdiri.

Zaman.- 2012.- 17 yanvar.-S.2.