Kamal Quliyev: “Rəhim müəllimin sayəsində çempionluq mübarizəsi gərginləşdi”

Topaz Premyer Liqasının 25-ci turunda keçirilən “Neftçi” - “Qarabağ” oyununda ciddi qalmaqal yaşandı və hələ də bu matç ətrafında söz-söhbət davam edir.

Məlumat üçün qeyd edək ki, görüşün baş hakimi Rəhim Həsənov “Neftçi”nin qapısına penalti təyin etmiş, müdafiəçi İqor Mitreskiyə isə qırmızı vərəqə göstərmişdi. Başda Böyükağa Hacıyev olmaqla, “Neftçi” tərəfi “Qarabağ”a məğlubiyyətin yeganə səbəbkarı kimi məhz referini göstərdi. Biz də konkret narazılıqlarla bağlı “flaqman”ın məşqçisi Kamal Quliyevlə əlaqə saxladıq. Gənc mütəxəssis də baş hakimi günahlandırdı.

- “Qarabağ”la oyunda baş verənlərə necə şərh verərdiniz?

- Məncə, bu oyunla bağlı artıq şərhə ehtiyac yoxdur. Çünki hər şey göz qabağında idi. Matçda yaşananları qalmaqal adlandırmaq düzgün deyil. Sadəcə olaraq, hakim səhvləri oldu. Bu səhvlər də bağışlanmaz idi.

- Siz hakimi günahlandırsanız da, Rəhim Həsənov səhv qərar vermədiyini bildirir. Hətta qeyd edib ki, onu tənqid edənlər öncə futbolu bilsinlər, sonra danışsınlar...

- Burada qəribə heç nə yoxdur. Hər kəs özünü müdafiə etmək istəyir. Rəhim Həsənov da bunu edir. Həsənovu təyin edən qurumun sədri Xaqani Məmmədov da oyunda idi. Əgər Xaqani müəllim deyirsə ki, orada səhv yoxdur, Rəhim Həsənov çıxıb deməyəcək ki, səhv var idi. Mən bu barədə danışaraq, özümü yormaq da istəmirəm. Gör biz nə gündəyik ki, çempionatın belə ağır oyunu Rəhim Həsənov kimi hakimə tapşırılır.

- Araz Abdullayev gözlənilmədən start heyətində yer almış və sona qədər oynamışdı. Onun psixoloji durumu nə yerdədir?

- Arazın psixoloji vəziyyəti hələ də pisdir. Lakin biz zədə və vərəqə cəzalılarına görə məcburiyyətdən Arazı meydançaya buraxdıq.

- Rəşad Sadiqov cəzalı olduğu üçün iştirak etmirdi. Kapitanın yoxluğu komandanın oyununa nə dərəcədə təsir etdi?

- Əlbəttə ki, çox təsir etdi. Oyun onu göstərdi ki, Rəşad komandanın “dirəyi”dir. Rəşadın yoxluğu bizi çətinliyə saldı, oyun üslubumuz tamam pozuldu. Rəşadın çıxışı digər futbolçulara da çox təsir edir. Bunların başında Flavinyo və Vobay gəlir. Onlar bir-birlərini çox yaxşı başa düşürlər. Buna baxmayaraq, futbolçularımız ikinci hissədə əllərindən gələni etdilər. Lakin bir nəfər azlıqda idik. Rəhim Həsənovu da saysaq, biz oyunu iki nəfər azlıqda tamamladıq. Futbolçulara təşəkkür edirəm. Bu matç mənə 1992-93-cü illəri xatırlatdı.

- Nikolas Kanales “altılıq” mərhələsində ilk qolunu vurdu. Onun son vaxtlar qol problemi yaşaması nə ilə bağlıdır? Kanales lazımi ötürmələrlə təmin olunmur, yoxsa böyük komandalara qol vurmaqda çətinlik çəkir?

- Hər bir futbolçu daim eyni formada qala bilməz. Futbolda elə olur ki, stabillik alınır. Ancaq eniş də olur, yüksəliş də. Mən deməzdim ki, Kanales zəifləyib. O, məşqlərdə öz üzərində çox işləyir. Onun qol vurmaq qabiliyyətinə gəldikdə isə bunu hamı bilir və görür. Belə olan halda, rəqib komandaların məşqçiləri iki futbolçusuna tapşırır ki, Kanalesi nəzarətə götürsünlər. İki futbolçuya qarşı oynamaq da asan deyil. Düzdür, onu da qeyd edim ki, o, ötürmələrdən maksimum yararlana bilmir. Amma unutmayaq ki, “altılıq” mübarizəsi hələ yeni başlayıb. İnanıram ki, növbəti oyunlarımızda Kanales qollarını sıralayıb, komandamıza kömək edəcək. Onun potensialını hamı bilir, məşqçilər korpusu da ona güvənir.

- Bruno Bertuççinin vəziyyəti nə yerdədir? Gələn oyunda 90 dəqiqə meydançada ola biləcəkmi?

- Bertuççi zədədən hələ yeni qayıdıb. Onun zədəsi çox ağır idi. “Qarabağ”la matçda məcbur qalıb onu da “oda atdıq”. Onu tam sağalmamış, formasını bərpa etməmiş oyuna buraxmaq riskli idi. Bertuççi üzərində çox çalışır və əvvəlki fiziki durumunu tezliklə bərpa etmək istəyir. Qarşıdakı oyuna qədər hələ vaxtımız var. Gedişata görə dəyişə bilər. Onun əsas heyətdə meydançaya çıxıb-çıxmayacağı, hələlik, məlum deyil.

- Bu məğlubiyyətdən sonra həm “İnter”, həm də “Qarabağ” “Neftçi”yə bir az da yaxınlaşdı. Bu amil növbəti turlarda çempionluq şanslarınızın azalması ilə nəticələnməz ki?

- Rəhim müəllimin sayəsində çempionluq mübarizəsi daha da kəskinləşdi. Sağ olsun Rəhim müəllim. Mübarizə daha da gərginləşdi. Bizə yaxın rəqiblər xal fərqini azaltdılar. Lakin bu amil bizi qorxutmur. Əvvəlki kimi, məşqçilərimizin və futbolçularımızın məsuliyyəti daha ciddi olacaq. Hər matça sonuncu oyun kimi çıxırıq və heç bir amil bizi qorxutmayacaq. Həvəsdən düşmürük, əksinə, bundan sonra daha güclü oynamalıyıq.

- Son olaraq növbəti turda səfərdə “Simurq”la qarşılaşacaqsınız. Bu oyunla bağlı düşüncələrinizi bildirərdiniz...

- “Simurq” bu mövsüm Azərbaycan çempionatında öz sözünü deyən klublardandır. Bizi asan oyun gözləmir. Rəqibə hörmətlə yanaşırıq. İnşallah, komandamız tez toparlanıb, var gücü ilə mübarizə apararaq, 3 xalı aktivinə yazdıracaq. “Neftçi”nin hər oyunu çətin keçir. Bunu mən özüm oynadığım dövrdən görmüşəm. Bütün komandalar “Neftçi”yə qarşı var gücləri ilə mübarizə aparırlar. İstəyərəm ki, həmin oyunu digər komandalara qarşı da göstərsinlər. Çox təəssüf ki, bunu etmirlər. Bütün bunlara baxmayaraq, hədəf qələbədir. Çətin də olsa, bunun öhdəsindən gəlib, yolumuza davam edəcəyik.

Harun Sadiqli

Zaman.-2013.-11 aprel.-S.15.