Mingəçevir Politexnik İnstitutunun Günəşi

Çalışdığı təhsil ocağında - Mingəçevir Politexnik İnstitutunda onun haqqında çox eşitmişdik. Buna rəğmən, yenə də onun dərs dediyi tələbələrlə həmsöhbət olmaq istədik. Söhbət Mingəçevir Politexnik İnstitutunun ümumi iqtisadiyyat kafedrasının baş müəllimi Günəş Şəfaqətovdan gedir.

Bu təhsil ocağının IV kurs tələbəsi Emin Əbdürəhimli Günəş müəllimi qeyri-adi bacarığa malik pedaqoq kimi dəyərləndirdi: “O dərs deyəndə sanki hər tələbə ovsunlanır. Bu isə hər şeydən əvvəl, Günəş müəllimin izah etdiyi mövzunu daha maraqlı çalarlarla, başqa sözlə desək, daha yaddaqalan şəkildə izah etməsindən irəli gəlir. Elə bu kimi xüsusiyyətlərinə görə, o, hər bir tələbənin sevgisini qazanıb desəm, səhv etmərəm. Hətta bu təhsil ocağını başa vuranlar belə bizi görəndə onu soruşur, salamlarını çatdırmalarını xahiş edirlər”. (Yeri gəlmişkən, sonradan həmsöhbət olduğumuz Tərtər rayon sakini Raquf Quliyev də Günəş müəllimin pedaqoq kimi onun həyatında oynadığı roldan danışdı. Bildirdi ki, hazırda bank işçisi kimi fəaliyyət göstərməsində məhz onun əməyi daha çoxdur). Həmsöhbət olduğumuz digər tələbələr də Günəş müəllimin ünvanına xoş sözlər dedilər. Onlardan biri belə dedi: “Günəş müəllim həm də biz tələbələrin problemləri ilə mütəmadi maraqlanır, onları çözməyə çalışır. Odur ki, dərsdən sonra onun ətrafında həmişə tələbələri görmək mümkündür. Günəş müəllimlə görüşəndə ilk sualımız tələbələrin ona olan sevgisi ilə bağlı oldu. Heydər Əliyevin “Müəllimlik sənəti, peşəsi cəmiyyətdə ən yüksək qiymətə layiq olan bir peşədir. Müəllim olmaq kimi şərəfli bir iş yoxdur”, - sözləri ilə söhbətə başlayan Günəş müəllim daha sonra dedi: “Müəllim gənc nəslin mənəvi aləminin memarı, cəmiyyətin etibar etdiyi şəxsdir. Odur ki, şərəfli olduğu qədər də mürəkkəb olan bu peşəni seçərkən çox götür-qoy etmişəm. Sözün düzü, mən heç vaxt müəllim olmaq istəməmişəm. Lakin 1994-cü ildə Mingəçevir Politexnik İnstitutunun rektoru Akif Hacıyevlə söhbət zamanı məndə bu peşəyə maraq artdı. Daha doğrusu, o, məni yaxşı müəllim ola biləcəyimə inandıra bildi. Dedi ki, hər bir uşaq fikirləri, duyğuları, maraqları ilə özünəməxsus xüsusi bir dünyadır. Sizdə onların dünyalarına nüfuz etmək bacarığı görürəm. Onunla söhbətdən sonra məndə bu peşəyə birdən-birə maraq artdı və elə o ildən müəllim kimi fəaliyyətə başladım. Konkret sualınıza gəlincə isə, çalışmışam ki, özümdə əsil müəllimə xas olan keyfiyyətləri əxz edim. Fikrimcə, elə bu səbəbdən tələbələr məni özlərinə yaxın bilirlər”.

Daha sonra müasir gənclərlə bağlı fikirlərini bizimlə bölüşən Günəş müəllim bildirdi: “Mən gənclərə həmişə dəstək olmağa çalışıram. Hətta yeri gələndə gənclərimizə diqqət yetirməyən yaşlı nəslimizin bəzi nümayəndələrini də qınayıram. Qoy kimsə unutmasın ki, onlar bizim sabahımızdır. Yeri gəlmişkən, mən gəncləri ağacın pöhrəsinə bənzədirəm. Hansı ki, o pöhrəni istənilən səmtə əymək mümkündür. Odur ki, onların vətənpərvər gənclər kimi yetişmələrində təkcə bir müəllim kimi deyil, həm də adi bir vətəndaş kimi əlimdən gələni əsirgəmirəm. Çalışıram ki, onlar yad təsirlərə düşməsinlər”.

Söhbətinin sonunda o, təhsillə bağlı bir iradını da bildirdi: “Əldə etdiyim məlumatlara əsasən deyə bilərəm ki, əksər ölkələrdə təhsil sistemində proqram hər il dəyişmir. Ən yaxşı halda dərslik 5 il müddətinə nəzərdə tutulur. Amma bizim ölkədə bu belə deyil. Elə götürək mənim tədris etdiyim fənni. Son 20 ildə həmin dərslik 6-7 dəfə dəyişib”. Onu da qeyd edək ki, bu günlərdə Günəş müəllimin 50 yaşı tamam olub. Bu münasibətlə AMEA İqtisadiyyat İnstitutunun dissertantı Günəş Şəfaqətovu təbrik etməklə yanaşı, ona çətin, həm də şərəfli peşəsində uğurlar diləyirik.

ESMİRA HİDAYƏTOVA,

ƏSGƏR HÜSEYNOV

Zaman.-2013.-18 aprel.-S.6.