Naxçıvanda İslam Səfərlinin 90 illik yubileyi qeyd olunub

Cəlil Məmmədquluzadə adına Naxçıvan Dövlət Musiqili Dram Teatrında İslam Səfərlinin 90 illik yubileyi münasibətilə tədbir keçirilib.

Naxçıvan Muxtar Respublikası Ali Məclisinin Sədri Vasif Talıbov da böyük ədibin 90 illik yubiley tədbirində iştirak edib. İslam Səfərli yaradıcılığının tədqiqatçısı, akademik İsa Həbibbəyli ədibin həyat və yaradıcılıq yolu barədə məlumat verib. Qeyd olunub ki, XX əsr Azərbaycan ədəbiyyatının görkəmli nümayəndələrindən olan İslam Səfərli öz yaradıcılığında ictimai lirikanı romantik pafosdan və tərənnümçülükdən xilas edərək ona səmimi, təbii duyğular bəxş etmiş, poeziyamızda azərbaycançılığın əsasını qoyub. Sonra İslam Səfərlinin “Göz həkimi” pyesi əsasında hazırlanmış tamaşa göstərilib.

Tamaşadan sonra Naxçıvan Muxtar Respublikası Ali Məclisinin Sədri Vasif Talıbov “Göz həkimi” pyesinin uğurla səhnəyə qoyulması münasibətilə Naxçıvan Dövlət Musiqili Dram Teatrının kollektivini təbrik edərək deyib: “”Göz həkimi” tamaşasının muxtar respublikada görkəmli oftalmoloq-alim Zərifə xanım Əliyevanın və şair-dramaturq İslam Səfərlinin 90 illik yubileylərinin qeyd olunduğu bir gündə göstərilməsi mühüm əhəmiyyətə malikdir. Səhnə əsərində ötən əsrin 50-ci illərində geniş yayılmış traxoma xəstəliyinə qarşı aparılan mübarizə əks olunub. Həmin dövrdə görkəmli akademik Zərifə xanım Əliyeva göz xəstəliklərinə qarşı öz nurlu peşəsi ilə mübarizə aparıb, şair-dramaturq İslam Səfərli bu peşənin vacibliyini öz qələmi ilə göstərib, yaradıcılığında bu məsələyə xüsusi yer verib. Ədibin “Göz həkimi” əsərində peşəyə məhəbbət, bütün maneələrə baxmayaraq, öz peşəsini üstün tutan göz həkiminin apardığı mübarizə əks olunub. Bu cür dəyərli əsəri səhnələşdirmək üçün istedadlı rejissor, bacarıqlı kollektiv lazımdır. Naxçıvan Dövlət Musiqili Dram Teatrının kollektivi bu vəzifənin öhdəsindən layiqincə gəlib”. Ali Məclisin Sədri bütün dövrlər üçün aktual olan “Göz həkimi” pyesinin Naxçıvan teatrının repertuarında daim qalacağını qeyd edib, uğurlu çıxışlara görə aktyorlara təşəkkürünü bildirib.

Naxçıvan Dövlət Musiqili Dram Teatrının direktoru, Xalq artisti Kamran Quliyev göstərilən diqqət və qayğıya görə kollektiv adından minnətdarlığını bildirib.

Mazlum Atik

Zaman.-2013.-18 aprel.-S.7.