Qəzənfər Ağayev: “Ötən bir ildə inamla və səmərəli işləmişik”

Astara Rayon İcra Hakimiyyətinin başçısı Qəzənfər Ağayev Bu gün ölkəmizin hər bir bölgəsində müxtəlif layihələr uğurla həyata keçirilir, geniş tikinti və abadlıq işləri aparılır. Belə rayonlarımızdan biri də Cənub bölgəsinin mirvarisi sayılan Astaradır. Azərbaycan Prezidenti İlham Əliyevin

14 aprel 2012-ci il sərəncamı ilə Qəzənfər Ağayev Astara Rayon İcra Hakimiyyətinin başçısı təyin edildikdən sonra rayonda işgüzar əhvali-ruhiyyə xeyli yüksəlib, hər bir sahədə əsaslı dönüşə nail olunub.

Bəs ötən bir ildə hansı işlər görülüb, nə kimi istəklər gerçəkləşdirilib?

2013-cü ildə həyata keçiriləcək layihələr, həlli vacib məsələlər hansılardır?

Astara Rayon İcra Hakimiyyətinin başçısı Qəzənfər Ağayevlə söhbətimizdə bu suallara ətraflı cavab aldıq.

- Qəzənfər müəllim, ötən bir ildə həyata keçirilən infrastruktur layihələrin, eyni zamanda quruculuq-abadlıq işlərinin nəticələrini biz Astara şəhərini gəzərkən əyani şəkildə gördük. Ölkəmizin sərhəd qapılarından olan Astara şəhəri, həqiqətən, çox gözəlləşib. Bu bizi çox sevindirdi. Yəqin ki, rayon ərazisini gəzmiş olsaq, bir ildə yaradılmış bir-birindən gözəl ünvanları da görə bilərik. Onu da deyim ki, “Zaman-Azərbaycan” qəzeti tez-tez Astarada aparılan quruculuq-abadlıq işləri barəda yazılar dərc edir. Bununla belə, istərdik ki, birilik fəaliyyətiniz barədə oxucularımıza özünüz məlumat verəsiniz.

- Öncə deyim ki, Astara Rayon İcra Hakimiyyətinin başçısı kimi fəaliyyətə başladığım ilk günlərdən astaralılardan yalnız xoş münasibət, xeyirxahlıq və işgüzarlıq görmüşəm. Məni daha çox təsirləndirən ilk günlərdə rayonun ağsaqqalları ilə keçirdiyim görüş oldu. Çox səmimi, təsirli və işgüzar şəkildə keçən bu görüş mənə unudulmaz anlar bəxş etdi. Onlar bütün işlərdə mənə dəstək olacaqlarını bildirdilər. Ötən bir il ərzində həmişə bu xeyir-duanın məsuliyyətini üzərimdə hiss etmiş və onların dəstəyini görmüşəm. Ötən bir ildə inamla və səmərəli işləmişik. Məhz buna görə mən bütün astaralılara ürəkdən təşəkkür edirəm.

Onu da deyim ki, ictimaiyyətin müxtəlif nümayəndələri ilə görüşlər təkcə tanışlıq məqsədi daşımır, həm də əhalini düşündürən, narahat edən məsələləri birbaşa özlərindən eşitməyə şərait yaradır. Məsələn, Pəlikəş icra nümayəndəliyinə daxil olan kəndlər rayonun ən ucqar dağlıq ərazisində yerləşir. Həmin ərazidə, xüsusən, dağların zirvəsində yerləşən Sım kəndində yerli əhali ilə görüşlər zamanı burada həlli vacib olan çoxlu problemin olduğuna baxmayaraq, uzun illər əməli tədbirlərin görülmədiyinin, ümumilikdə bu ucqar ərazinin diqqətdən kənarda qaldığının şahidi oldum. Nümayəndəlikdə yerləşən Doli, Şəvqə və Sibyət kəndlərinə avtomobil yolunun və elektrik xəttinin olmadığını eşidəndə təəccübləndim. Bu məni çox narahat etdi. Lazım olan texnika, yerli əhalinin bu işə cəlb olunması və dövlət vəsaiti ilə bu vacib məsələləri həll etdik.

Möhtərəm Prezidentimiz İlham Əliyevin çox düzgün olaraq qeyd etdiyi kimi, dövlət siyasətimizin mərkəzində Azərbaycan vətəndaşıdır. Hər şeyi biz Azərbaycan vətəndaşı üçün edirik. Budur bizim məqsədimiz. Biz xalq üçün çalışırıq, qururuq, yaradırıq, ölkəmizi gücləndiririk. Hər bir dövlət məmuru öz vəzifə borcunu şərəflə yerinə yetirməli, vətəndaşlara hörmət etməlidir. Bu, Azərbaycan Prezidenti cənab İlham Əliyevin qəti tələbidir.

Son bir il ərzində şifahi qəbullar, yerlərdə keçirilən səyyar qəbul və görüşlər bir çox mühüm sosial problemlərin həlli üçün şərait yaratmışdır. Məhz vətəndaşların təklifləri əsasında Mərkəzi bazar ətrafında nəqliyyatın sıxlığının aradan qaldırılması məqsədilə magistral yolda hərəkətin birtərəfli olması təmin edilmiş, Şovaş, Siyatük, Şüvi, Vəznəş, Sərək kəndlərinə təbii qaz verilmiş, Telman, Şahağac kəndlərinə təbii qaz çəkilişi sürətlə davam etdirilir. Xıçaso kəndində çay üzərində körpü salınmış, Telman kəndinə, Şiyəkəran kənd və Ərçivan qəsəbə 1 saylı tam orta məktəblərinə gedən yollar asfaltlaşdırılmışdır. Kijəbə qəsəbə sakinlərinin arzusu nəzərə alınaraq, qəsəbənin mərkəzində müasir tələblərə uyğun şəkildə yeni park salınır. Son bir il ərzində şəhər 7 saylı və Telman kənd tam orta məktəbləri üçün tikilmiş binaların açılış mərasimləri keçirilmişdir. Hazırda isə Siyakü, Şağlazüzə, Vaqo, Hamoşam, Asxanakəran, Motlayataq, Şüvi, Suparıbağ və Rüdəkənar kəndlərində müasir tipli yeni məktəb binalarının tikintisi davam etdirilir.

Möhtərəm Prezidentimizin keçən ilin mart ayının 13-də tarixi səfərindən sonra rayonumuzda tikinti, quruculuq və abadlıq işləri daha da sürətləndirilmişdir. Cənab Prezidentin sərəncamları ilə ayrılan vəsait hesabına Mərkəzi Xəstəxananın Poliklinika korpusu yenidən qurulur, şəhər, qəsəbə, kəndlərdə yol-abadlıq işləri sürətlə aparılır.

Ötən ilin son günlərində möhtərəm Prezidentimiz cənab İlham Əliyev daha bir tarixi sərəncamı ilə astaralıları sevindirdi. Cənab Prezident 27 dekabr 2012-ci il tarixdə “Astara rayonunun Ərçivan kəndinə qəsəbə statusunun verilməsi haqqında” Sərəncam imzaladı. Bu bir daha sübut etdi ki, Astara rayonunun inkişafı ölkə rəhbərinin gündəlik qayğısı ilə əhatə olunmuşdur. İndi Ərçivan qəsəbəsində quruculuq və abadlıq işləri geniş vüsət almışdır.

- Rayonda sahibkarlığın inkişafına necə dəstək və qayğı göstərilir? Yerli iş adamlarından gözləntiləriniz hansılardır?

- Rayonumuzda özəl sektorun, sahibkarlığın inkişafına mövcud imkanlar daxilində hər cür şərait yaradılmışdır. İş adamlarımız Astaranın sosial-iqtisadi inkişafına layiqli töhfələrini verirlər. İlk dəfə olaraq, iş adamı tərəfindən şəhərimizin mərkəzində 9 mərtəbəli yaşayış binasının tikintisi sakinlərimizin böyük sevincinə səbəb olmuşdur. Şəhərdə 7 mərtəbəli yeni binanın inşası da başa çatdırılır. Həmin yaşayış binalarında gənclərin mənzillə təminatına daha çox üstünlük verilməsi nəzərdə tutulmuşdur. Xəzər dənizinin sahilində yaradılan ailəvi istirahət mərkəzləri, turizm obyektləri və digər istirahət guşələri ayrı-ayrı iş adamlarımızın gərgin və səmərəli əməyinin nəticəsidir.

Sahibkarlığın inkişafı və yersiz müdaxilələrin qarşısının alınması məqsədilə bundan sonra da tərəfimizdən lazım olan bütün tədbirlər görüləcəkdir. Qəzetinizin yaratdığı fürsətdən istifadə edərək, sahibkarlarımıza demək istəyirəm ki, yeni-yeni layihələrin həyata keçirilməsi üçün təşəbbüs göstərəcəyiniz təqdirdə, tərəfimizdən sizə hər cür kömək ediləcəkdir. Rayonumuzun təbiəti, relyefi, yerləşdiyi ərazi sahibkarlığın hərtərəfli və geniş şəkildə inkişafı üçün çox əlverişlidir. Xüsusən, turizmin inkişaf etdirilməsi istiqamətində yeni layihələr həyata keçirmək olar. Rayonda istehsal olunan məhsulların, xüsusən heyvandarlıq və sitrus məhsullarının emalı məqsədilə kiçik sexlərin yaradılması da məqsədəuyğundur.

- Astara respublikamızın yaxşı potensialı olan aqrar rayonudur. Burada əsasən sitrusçuluq, çayçılıq, tərəvəzçilik və heyvandarlıq inkişaf etdirilir. Çəltikçilik sahəsində də uğurlar var. Son bir ildə rayonda kənd təsərrüfatının inkişafı və bu sahədə görülən işlər barədə nə deyə bilərsiniz?

- Rayonumuzun torpaqları münbitdir. Bol məhsul yetişdirmək üçün iqlim şəraiti də əlverişlidir. Mövcud torpaq sahələrinin 17.563 hektarı kənd təsərrüfatına, 8.080 hektarı əkinə yararlı sahələrdir. Aqrar sahədə torpaq islahatı aparılan zaman 42.279 hektar dövlət mülkiyyətində saxlanılmış, 11.798 hektarı xüsusi mülkiyyətə verilmişdir. Aqrar bölmədə 71 fermer təsərrüfatı yaradılıb. Son illərin statistik məlumatlarına nəzər salsaq, rayonda kənd təsərrüfatı sahəsində əldə edilən göstəricilərin ilbəil artdığını görərik.

2012-ci ildə rayonda 44.474 ton tərəvəz, o cümlədən 14.481 ton kartof, 10.310 ton taxıl (buğda, çəltik və qarğıdalı), 381 ton yaşıl çay yarpağı, 32.261 ton sitrus və subtropik meyvələr istehsal edilmişdir. Bu göstəricilər 2010-2011-ci illərin göstəriciləri ilə müqayisədə xeyli çoxdur. Yerlərdə olarkən vətəndaşlar yetişdirilən bir çox məhsulların satışında çətinliklərlə üzləşdiklərini bildirirdilər. Bununla əlaqədar müvafiq tədbirlər həyata keçirdik. Lənkəran konserv zavodu ilə əlaqə saxladıq və tez xarab olan feyxoa meyvəsinin əhalidən əlverişli qiymətə qəbuluna şərait yaratdıq. Digər sitrus meyvələrinin sərfəli qiymətə satılmasını təmin etdik. Rayonda çəltik əkinlərinə marağın artırılması üçün yerlərdə təbliğat işlərini gücləndirdik. Son bir ilin nəticələri göstərir ki, bu sahəyə maraq tədricən artır. Məlumat üçün deyim ki, keçən il Astara düyüsünün bir kiloqramı ən azı 2,5-3 manata satıldı. Astara düyüsü öz əvvəlki şöhrətini geri qaytarır. Hazırda bu düyüyə olan tələbat həddindən artıq çoxdur. Rayonumuzda çayçılığın inkişafı üçün əlverişli şərait vardır. Astara çayının şöhrəti dünyaya yayılıb. İspaniyanın Madrid, Rusiyanın Moskva şəhərlərində keçirilən beynəlxalq sərgilərdə “Astara çayı” qızıl medallara layiq görülmüşdür. Son bir ildə rayonda Astara çayının şöhrətinin bərpa edilməsi üçün konkret tədbirlər görülür. Təkcə keçən il rayonda 110 hektarda yeni çay sahəsi salınmışdır.

Bütün bunlarla yanaşı, açıq demək istəyirəm ki, rayonda qızıl kimi qiymətli və bərəkətli mövcud torpaq sahələrindən tam səmərəli istifadə olunmur. Torpaq payı almış kənd sakinləri illərlə öz torpaqlarına üz tutmur, əkin keçirmir, boş və istifadəsiz saxlayır, mal-qara üçün örüşə çevirirlər. Mən kəndlərdə əhali ilə görüşlər keçirərkən torpaqlardan səmərəli istifadə edilməsinin vacibliyini dəfələrlə vurğulamışam.

- Qəzənfər müəllim, gənclər böyük qüvvədir. İstedadlı gənclərə qayğı və diqqət göstərilməsi bu gün daha aktualdır. Rayonda bu istiqamətdə görülən işlər diqqəti cəlb edir. Bu barədə fikrinizi bilmək istəyirik.

- Tamamilə doğru deyirsiniz, gənclərə etimad göstərmək, onları daha məsul vəzifələrə irəli çəkmək günümüzün ən vacib məsələsidir. Son dövrdə rayonumuzda bu məsələyə daha ciddi diqqət yetiririk. İcra aparatında, rayonun idarə, müəssisə və təşkilatlarında məsul vəzifəyə irəli çəkilənlər sırasında gənclər üstünlük təşkil edirlər. Gənclərə etimad göstərməyimiz rayonda işgüzar mühitin formalaşmasına, sağlam ab-havanın yaranmasına səbəb olur. Gənclərimizin fəallığı artıb. Biz bu sahəyə diqqəti daha da artıracağıq.

- Siz mətbuata açıq olan, kütləvi informasiya vasitələrinə önəm verən rəhbərsiniz. 80 yaşlı “Astara” qəzetinin qısa müddətdə müasir tələblər səviyyəsində buraxılması sizin qayğı və diqqətinizin nəticəsidir...

- Kütləvi informasiya vasitələrinin (KİV) rolunu həmişə düzgün qiymətləndirmək lazımdır. Ulu öndər Heydər Əliyev bu sahənin inkişafına daim diqqət yetirmiş, haqlı olaraq mətbuatı cəmiyyətin aynası adlandırmışdır. Yerli mətbuatın idarəetmədə əhəmiyyəti əvəzsizdir. Bütün bunlara görə yerli qəzetin fəaliyyətinin kökündən yaxşılaşdırılması üçün konkret tədbirlər həyata keçirdik. “Astara” qəzetinin oxucuların sevimlisinə çevrilməsi bizim uğurumuzdur.

- Qəzənfər müəllim, Astarada gördüklərimizlə yanaşı, sizdən eşitdiklərimiz də bizi sevindirdi. Təbii ki, qarşıda görüləsi işlər də çoxdur. Bu barədə məlumat verməyinizi xahiş edirik.

- Qarşıda görüləsi işlər, həqiqətən, çoxdur. Əvvəla, başladığımız işləri daha sürətlə və keyfiyyətlə başa çatdırmaq əzmindəyik. Astara şəhərində, qəsəbə və kəndlərdə daha geniş miqyasda tikinti, quruculuq və abadlıq işləri davam etdiriləcək, rayonda qazlaşdırma işi başa çatdırılmalıdır. Qarşıdakı aylarda sakinlərimizin çoxdan gözlədikləri Ərçivan-Sərək-Şüvi-Siyatük-Alaşa-Qapıçıməhəllə kəndlərini əhatə edən dairəvi yol asfaltlaşdırılacaq. Artıq bu işə bir neçə gündür ki, başlanılıb. Siyakü-Rinə yolunun asfaltlaşdırılması dağ kəndlərinə gedən sakinlərin ürəyindən olacaq. Rayonda turizmin inkişafını təmin etmək məqsədilə yeni obyektlər inşa ediləcək, mövcud turizm obyektlərinin fəaliyyəti yaxşılaşdırılacaq. Şəhərdə kanalizasiya sisteminin qurulması, əhalinin içməli su ilə təmin edilməsi məqsədilə yeni su xəttinin çəkilməsi, mövcud elektrik xətti təsərrüfatının yenidən qurulması, şəhərdaxili və kəndarası yolların əsaslı təmir olunması, körpülərin salınması, təhsil, səhiyyə və mədəniyyət müəssisələrinin tikintisi və digər mühüm sosial obyektlərin inşası ilə əlaqədar qarşıya qoyulan vəzifələr yerinə yetiriləcək.

- Maraqlı söhbətə görə çox sağ olun. Sizə şərəfli və məsul işinizdə uğurlar arzulayırıq.

Səməd Məlikzadə,

MƏRDAN QURBANOV

Zaman.-2013.-23 aprel.-S.7.