Bakı YUNESKO-nun Hökümətlərarası Komitəsinin

8-ci sessiyasına ev sahibliyi edir

Dünən Bakıda YUNESKO-nun Qeyri-Maddi Mədəni İrsin Qorunması üzrə Hökumətlərarası Komitəsinin 8-ci sessiyası və Qeyri- Maddi Mədəni İrs üzrə Konvensiyanın 10 illik yubleyi çərçivəsində QHT Forumu işə başladı.

Sessiyanın açılış mərasimində çıxış edən mədəniyyət və turizm naziri Əbülfəs Qarayev 116 ölkədən 750 nəfərdən artıq nümayəndənin iştirak etdiyini bildirdi. Hökümətlərarası Komitənin bu sessiyasına beynəlxalq ictimaiyyət, media və iştirakçıların daha böyük marağı hiss olunurdu. Sessiyanın gündəliyində duran əsas məsələlərdən biri QHT-lərin akkreditəsi meyarları və şərtlərini nəzərdən keçirmək, həmçinin təcili qorunmaya ehtiyacı olan Qeyri-Maddi Mədəni İrsin siyahısı və Bəşəriyyətin Qeyri-Maddi Mədəni İrsinin reprezentativ siyahısı üzrə qərar verilməsidir. QHT-lərin akkreditə olunmasının məqsədi Hökumətlərarası Komitəyə məsləhət xidmətlərinin göstərilməsidir. Bu səbəbdən Hökumətlərarası Komitənin bundan əvvəl keçirilmiş 7-ci sessiyasında QHT-lərin akkreditə olunması və qiymətləndirilməsi meyarlarının nəzərdən keçirilməsi məsələsi də gündəmdə yer alıb. Həmin sessiya zamanı təşkil olunmuş QHT Forumunda mədəni vasitəçilik, məlumatlılığın artırılması, təmsilçilik və təşviqkat işlərində QHT-lərin mühüm rolu müzakirə edilib. QHT-lərin iştirakı, 2013-cü il konvensiyasının yerinə yetirilməsi, qeyri-maddi mədəni irsin potensialının gücləndirilməsi və qorunmasında yerli və beynəlxalq proseslərə kömək göstərilməsi məsələləri də öz əksini tapıb. Təcili qorunmaya ehtiyacı olan Qeyri-Maddi Mədəni İrsin siyahısında Azərbaycanın qədim Çövkən oyunu da yer alıb. Sessiya çərçivəsində konvensiyanın milli səviyyədə icrası ilə bağlı dövri hesabatların dinlənilməsi, geniş tərkibli müzakirələr və mədəni tədbirlər də əksini tapdı. Dekabr ayının 8-də tədbir yekunlaşdıqdan sonra qonaqların Qobustan Dövlət Tarix və Bədii Qoruğu, Qala Dövlət Tarix-Etnoqrafiya Qoruğu, Azərbaycan İncəsənət Muzeyi, İçərişəhər və Bakının digər görməli yerlərinə səyahət də plana daxil olunub. YUNESKO-nun beynəlxalq əhəmiyyətli bu tədbiri Azərbaycanın zəngin mədəni irsinin qorunması, eyni zamanda ölkəmizin mədəni və turizm imkanlarının təşviq olunması və ölkəmizin marağının artması baxımından əhəmiyyətli hadisədir.

TÜRKANƏ ƏSƏDOVA

Zaman.- 2013.- 3 dekabr.- S. 2.