Rauf Mərdiyev: “İctimai işlərin kökündə fədakarlıq dayanır”

Bu gün Azərbaycan gəncləri ictimai həyatın bütün sferalarında aktiv fəaliyyəti ilə seçilirlər. Onlar siyasi, iqtisadi, humanitar, sosial tədbirlərin, layihələrin hazırlanmasında, keçirilməsində mühüm rol oynayırlar. Dövlətin gənclərin fəaliyyəti üçün qurduğu geniş imkanlar nəticəsində bu təbəqə cəmiyyətin avanqard qüvvəsinə çevrilib. Müsahibimiz olan “İrəli” İctimai Birliyinin sədri Rauf Mərdiyev də aktiv fəaliyyəti ilə diqqət mərkəzində olan gənclərdən biridir. O, 1986-cı ildə Bakı şəhərində, müəllim ailəsində dünyaya göz açıb. Orta təhsilini 286 saylı məktəbdə alan müsahibimiz buranı əla qiymətlərlə başa vurub. 2004-cü ildə isə yüksək balla, Azərbaycan Dövlət İqtisad Universitetinin Maliyyə fakültəsinə daxil olub. Bakalavr təhsilini başa vurduqdan sonra hərbi xidmətə yollanıb. Sonra isə həmin universitetin magistraturasında təhsilini davam etdirib. İlk tələbəlik illərindən etibarən “İrəli” İctimai Birliyinə üzv olub. Bir çox layihələrin təşəbbüskarı və rəhbəri olub. Aktiv fəaliyyəti, zəhmətsevərliyi ilə digər üzvlərin rəğbətini qazanan müsahibimiz 2012-ci ildə üzv olduğu təşkilatın sədri seçilib.

- Rauf bəy ölkənin ictimai-siyasi həyatında aktiv iştirak edən gənclərdən birisiniz. Sizdə ictimai işlərə maraq necə formalaşıb?

- Ümumiyyətlə, insanın baxışlarının formalaşmasında onun yaşadığı mühitin, xüsusilə ailə və məktəbin rolu böyükdür. Mən müəllim ailəsində böyümüşəm, valideynim eyni zamanda mənim müəllimim olub. Təhsilə, biliyə marağımı məhz bu mühit formalaşdırıb. Hər zaman bilmədiyim suallara özüm cavab tapmağa çalışmışam. Yəqin ki, ictimai işlərə maraq məhz bu axtarışların nəticəsində meydana gəlmişdir.

Məktəb dövründə təhsilimə çox diqqət yetirmişəm. Buna görə universitetə qəbul olduqdan sonra ictimai işlərə qoşulmaq üçün mənə daha əlverişli imkan yarandı. İlk olaraq, oxuduğum universitetin tələbə gənclər təşkilatında fəaliyyətə başladım. Tələbə yoldaşlarımla tədbirlər təşkil edirdik, layihələr hazırlayırdıq. Bütün bu sosial fəaliyyətlərim ictimai işlərə marağımı artırdı. 2006-cı ildə “İrəli” İctimai Birliyinə üzv oldum və bu uzun bir yolun başlanğıcı idi.

- İctimai işin özəlliyi nədədir? Burada sizi özünə bağlayan nədir?

- İctimai işlərin kökündə fədakarlıq dayanır. Yəni sizin gördüyünüz işdən özünüz deyil, başqaları da faydalanır. Biz gənclərlə işləyirik. Etdiyimiz müxtəlif layihələrlə, tədbirlərlə gənclərə özlərini inkişaf etdirməkdə, arzularını gerçəkləşdirməkdə, uğur qazanmaqda yardımçı oluruq. Gördüyün işlərin real nəticələrinin olması insana böyük zövq verir. Bir sözlə, mən sevdiyim işi görürəm və ya gördüyüm işi sevirəm.

- İctimai işlərə qoşulanda hansısa Birliyin sədri olmaq barədə fikirləşmisinizmi?- Karyera yüksəlişində bəzən gənclər qarşısında seçim olur: böyük mexanizmin kiçik hissəsi olmaq və ya kiçik mexanizmin böyük hissəsi olmaq. Daha böyük və daha faydalı işlər görmək üçün mən birinci yolu seçdim. Peşəkar və təcrübəli “İRƏLİ” ailəsinə qoşulmaq və burada fəaliyyət göstərmək mənim fərdi inkişafımda çox böyük rol oynadı. Sədr və rəhbərlik vəzifəsinə gəlincə, bu, ilk öncə məsuliyyətdir. Bu məsuliyyəti daşımaq gücü və iradəsi illərin təcrübəsi və zəhməti ilə formalaşır.

“İnsanın gələcəyə aid planları uzunmüddətli olmalıdır”

- Rauf bəy, həyatda uğur qazanmağın yolları hansılardır?

- Arzular insanı yönəldir. İnsanın uğur qazanması üçün hədəflərinin olması çox önəmlidir. İlk öncə nə isə istəməlisiniz, ürəyinizin səsini dinləməlisiniz və hədəfinizə doğru addımlamağa başlamalısınız. Bəzən uğurun formulu çox sadədir: düzgün bildiyiniz işləri, doğru vaxtda və doğru formada etməlisiniz. Uğura aparan yol heç zaman düz olmur. Əgər siz hədəfinizə heç bir maneəsiz irəliləyirsinizsə, ehtimal var ki, səhv yoldasınız. İstədiyini əldə etmiş hər kəsin həyat hekayətində çətinliklər və mübarizə vardır.

Bundan başqa, gərək ilk növbədə gördüyün işi sevəsən. Gördüyün işi sevmək hələ o demək deyil ki, iş seçimin doğrudur. Eyni zamanda özünə peşə olaraq seçəcəyin işi sevməklə yanaşı, onu bacarmağın da çox önəmlidir. Yəni işində uğur qazanmaq istəyən kəs sevdiyi və bacardığı peşə sahəsi ilə məşğul olmalıdır. Bundan başqa, işində müvəffəqiyyət qazanmaq üçün məsuliyyətli və zəhmətsevər olmaq da əsas şərtlərdən biridir. Mən həyatda uğur qazanmaq iddiasında olan şəxslərə tövsiyə edirəm ki, işlərində rastlaşa biləcəkləri enişli, yoxuşlu yollar onları həvəsdən salmasın. Gördüyüm qədərilə bilirəm ki, tutduğumuz yol nə qədər doğru olursa olsun, hansısa problemlə üzləşmək ehtimalımız var. Həyatda tutduğumuz yolda heç bir maneə yoxdursa, bu yol bizi hədəfimizə aparmaya da bilər. Buna görə heç nəyə fikir vermədən məqsədlərimizə doğru inadla və inamla addımlamalıyıq.

“İctimai işlər insanın formalaşmasında əvəzolunmaz təcrübədir”

- İnsanın formalaşmasında ictimai işlərin nə kimi əhəmiyyəti var?

- İctimai işlər insanın formalaşmasında əvəzolunmaz təcrübədir. Xüsusən də gənclərin ictimai fəaliyyətlərdə iştirak etmələri çox önəmlidir. İctimai işlərdə təcrübəsi olan insanlar daha təşəbbüskar olurlar. Çünki ictimai işlərlə məşğul olanda yeni insanlar tanıyırsan, onlarla əməkdaşlıq edirsən, ünsiyyətdə olursan və s. Bütün bunlar insanın yenilikçi, təşəbbüskar fərd olaraq formalaşmasına müsbət təsir edir. Sosial fəaliyyətlər zamanı insan birinci növbədə özünü təsdiqləmiş və yeni üfüqlər müəyyənləşdirmiş olur. Bundan başqa, sosial işlərdə təcrübəsi olan adamlar hansısa problemə münasibəti, onun həlli yolları haqqında təşəbbüslərin irəli sürülməsi bacarığının olması baxımından digər insanlardan fərqlənirlər.

- “İrəli” İctimai Birliyi minlərlə gənci ətrafına toplamağa və onların etibarını qazanmağa necə nail olub?

- “İrəli” 30 mindən çox gənci ətrafında birləşdirməyə nail olan ictimai birlikdir. Onun öz prinsipləri var. “İrəli” İctimai Birliyinin qarşısında duran əsas məqsədlərdən biri Azərbaycan gəncliyinin inkişaf etdirilməsinə dəstək olmaqdır. Bizim ictimai birlik gəncliyin inkişafını cəmiyyətin inkişafı, cəmiyyətin inkişafını isə Azərbaycanın inkişafı kimi dəyərləndirir. Buna görə də bütün fəaliyyətlərimizin təməlində gəncliyin-cəmiyyətin-dövlətin inkişafı prinsipi durur. Azərbaycan gəncliyinin inkişaf etdirilməsi istiqamətində respublikamızın Prezidenti cənab İlham Əliyevin siyasətini dəstəkləyirik. Dövlətin gənclər siyasətinin uğurla həyata keçirilməsi üçün bizim ictimai birlik də öz töhfəsini verir.

“Azərbaycan gəncliyinin böyük potensialı var”

- İşinizlə əlaqədar olaraq gənclərlə daha çox ünsiyyətdə olursunuz. Azərbaycan gəncliyinin potensialını necə qiymətləndirirsiniz?

- Gənclər dövlətin onlar üçün qurduğu bütün şəraitdən fəal şəkildə yararlanmağa çalışırlar. Ümumiyyətlə, Azərbaycan gəncliyinin böyük potensialı var. Dövlətimiz də bunu dəyərləndirir. Hazırda Azərbaycan gənclərinin bir çoxunun ölkənin hüdudlarını aşacaq geniş-miqyaslı fəaliyyətləri var və ən əsası bu fəaliyyətin miqyası və keyfiyyəti zaman ötdükcə artmaqdadır.

- Yuxarıda qeyd etdiniz ki, Azərbaycan gəncliyinin inkişafına nail olmağı qarşınıza məqsəq qoymuş bir qurumsunuz. Gənclərin inkişafına maraqlı olan digər təşkilatlarla əməkdaşlıq edirsinizmi?

- Biz, “İrəli” İctimai Birliyi olaraq, Azərbaycan gəncliyinin inkişafına dəstək olmaq istəyən bütün təşkilatlarla əməkdaşlıq etməyə hazırıq. Hazırda bu istiqamətdə 200-dən çox yerli və xarici təşkilatla əməkdaşlıq edirik. Bizim tərəfdaşlar arasında dövlət qurumları, özəl şirkətlər, ictimai təşkilatlar vardır.

“İrəli” həmişə yeniliklər axtarışındadır

- Xarici təşkilatlarla əməkdaşlığınızın əhəmiyyətini necə qiymətləndirirsiniz?

- Demək olar ki, dünyadakı bütün gənclərin problemləri ümumi olaraq eynidir. Biz xarici təşkilatlarla əməkdaşlıq edərək, onların gənclərin problemlərinin həlli istiqamətlərində qazandıqları təcrübədən yararlanmaq istəyirik. Ümumiyyətlə isə, istər yerli, istərsə də xarici təşkilatlarla əməkdaşlıq rəqabət mühitini formalaşdırır. Bu da bir-biriləri ilə əməkdaşlıq edən təşkilatların inkişafını sürətləndirir. Bu günə kimi “İrəli” həyata keçirdiyi bütün fəaliyyətlərində yüksək keyfiyyət prinsipinə sadiq qalıb. İnkişaf strategiyamıza uyğun olaraq, hər il bir pillə irəliləmiş oluruq. Bunu da cəmiyyətimiz dəyərləndirir. Çünki bizim ictimai birliyin ətrafına bu qədər gənc toplaması təsadüfi deyil. “İrəli” İctimai Birliyi olaraq, həmişə yeniliklər, yeni təşəbbüslər axtarışındayıq.

- Ümumiyyətlə, Azərbaycan reallığının dünyaya çatdırılması istiqamətində nə kimi fəaliyyətləriniz var?

- “İrəli” İctimai Birliyi təsis edildiyi gündən etibarən Azərbaycan reallığının dünyaya çatdırılması işi ilə fəal şəkildə məşğul olur. Bu istiqamətdə bir çox layihələr həyata keçirmişik. Demək olar ki, bu qəbildən olan layihələrimiz hər il olur. Azərbaycan həqiqətlərinin dünyaya çatdırılması işinin səmərəli olması üçün gərək birinci növbədə dediklərimizi xarici vətəndaşlar bilib, dərk etsinlər. Onlar bizim dediklərimizə inandıqdan sonra eşitdikləri məlumatların daşıyıcılarına çevrilirlər. Buna görə çalışırıq ki, dediklərimizə xarici tərəfdaşlarımız inansınlar.

- Dövlətin gənclərə diqqət və qayğısını qənaətbəxş hesab edirsinizmi?

- Prezident cənab İlham Əliyev öz çıxışlarında dəfələrlə bildirib ki, gənclər cəmiyyətin aparıcı qüvvəsidir və gəncliyin inkişafı dövlətin prioritetidir. Şübhəsiz ki, Azərbaycanın gələcəyi gənclərin əlindədir. Prezident İlham Əliyevin bütün fəaliyyətləri ölkə gəncliyinin intellektual potensialının üzə çıxarılmasına yönəlib. Bunun nəticəsidir ki, ölkənin neft kapitalını insan kapitalına çevirmək məqsədilə dövlət səviyyəsində bir çox proqramlar həyata keçirilir. Dövlətin ümumi inkişaf strategiyası ölkənin gələcəyinə hesablanıb. Amma insan kapitalına investisiya uzunmüddətli investisiyadır və biz indiki yatırımların real nəticələrini yaxın gələcəkdə daha aydın görəcəyik.

Zaman.-2013.-10 dekabr.-S.7.