Bakı ovcumuzun içində olacaq; yeni “Şeytan çarxı”nın tikintisi yekunlaşır

ELVIN ƏLIYEV,

Yeni attraksionun diametri 60 metrdir. Bu attraksionda 8 nəfərlik 30 kabinə var. Kabinələr kondisonerlərlə təchiz edilib.

Bakı sakinlərinin və şəhərə gələn digər qonaqların istirahət üçün üz tutduqları məkanlardan biri də Dənizkənarı Milli Parkdır. Bura üz tutanların dincəlmələri üçün hər cür şərait yaradılıb. Dənizkənarı Milli Parka gələnlərin maraqla gözlədiyi anlardan biri də, el arasında “Şeytan çarxı” kimi tanınan attraksionun tikintisinin başa çatdırılmasıdır. Tikintisi başa çatmaqda olan bu attraksion haqqında ətraflı məlumat almaq üçün Dənizkənarı Bulvar İdarəsinin rəis müavini Nazim Məcidovla görüşdük. İlk olaraq müsahibimizdən sözügedən attraksionun nə üçün “Şeytan çarxı” adlandırılmasının səbəbini öyrənməyə çalışdıq. N. Məcidov isə bildirdi ki, dünyanının müxtəlif ölkələrində belə attraksionlar fəaliyyət göstərir. Buna görə də, hər ölkədə onu müxtəlif cür adlandırırlar: “Bildiyiniz kimi, bu attraksionun dünyada ən məşhur olanı İngiltərənin paytaxtı London şəhərindədir. Onun diametri 130 metrə yaxındır. İngilislər bu attraksionu “Londonun gözü” adlandırırlar. Keçmiş SSRİ ölkələrində isə bu attraksionlara “Şeytan çarxı” və yaxud “Şeytan təkəri”i deyilir. Amma bu, rəsmi ad deyil. Bizim bulvardakı bu tip köhnə attraksionun rəsmi adı “Ətrafa baxış”dır. Tikinti işləri başa çatmaqda olan təzə attraksiona nə ad veriləcəyi isə hələ məlum deyil”.

N. Məcidov “Ətrafa baxış” adlı attraksionun köhnəldiyini və diametrinin 20 metr olduğunu xatırladaraq bildirdi ki, bu attraksion günü-gündən genişlənən, müasirləşən Dənizkənarı Milli Bulvarın tələbatını ödəmir: “Ətrafa baxış” attraksionu köhnə olmaqla yanaşı, həm də balacadır. Bu da istirahət üçün milli parka gələnlərin yuxarıdan şəhərə tamaşa etmələri üçün yaramır. Çünki Bakı günü-gündən inkişaf edir. Bunun nəticələrindən biridir ki, hündür mərtəbəli binaların sayı çoxalmaqdadır. Hündür binaların sayının çoxalması, şəhər ərazisinin genişlənməsi bu tip yeni attraksionun tikilməsi ehtiyacını doğurdu”.

Kondisionerli attraksion

Əsas tikinti işlərinin başa çatdığı yeni attraksionun əvvəlkinə nisbətən üstünlükləri haqqında da məlumat verən N. Məcidov onun daha böyük və konfortlu olduğunu söylədi: “Yeni attraksionun diametri 60 metrdir. Bu attraksionda 8 nəfərlik 30 kabinə var. Kabinələr kondisonerlərlə təchiz edilib. Qapıları təhlükəsizlik məqsədilə, metrolarda olduğu kimi vahid mərkəzdən açılıb bağlanacaq. Bu da attraksiondan istifadə edənlərin təhlükəsizliyini ən yaxşı şəkildə təmin edəcək. İstifadəçilərin təhlükəsizliyinin təmin edilməsi məqsədilə kabinələrin dörd bir yanı şəffaf şüşə konstruksiyalarla örtülüdür”.

Müsahibimizin sözlərinə görə, təhlükəsizlik tədbirləri bununla bitmir. Belə ki, hər bir kabinəyə çıxmaq üçün nəzərdə tutulmuş xüsusi nərdivanlar da vardır ki, bu da attraksionda hansısa nasazlıq halları meydana gəldiyi təqdirdə sərnişinlərin təxliyə edilməsini asanlaşdıracaq. N. Məcidovdan onu da öyrəndik ki, yeni attraksionun tikinti işlərini Niderland Krallığına aid şirkət həyata keçirir. Tikinti işlərində istifadə olunan materiallar isə Niderlan Krallığı ilə yanaşı, Almaniya və Fransadan gətirilib. Dənizkənarı Bulvar İdarəsinin rəis müavini N. Məcidov yeni attraksionun Əl Oyunları Sarayının yaxınlığında tikilməsinin də səbəbsiz olmadığını bildirdi: “Yeni nəhəng attraksionun tikintisi üçün müəyyən edilmiş yer məqsədəuyğundur. Belə ki, attraksionun istifadəçiləri yüksəklikdən Bakı buxtasını, Bayraq meydanını, Büllur Sarayı və bütün şəhəri sərbəst şəkildə seyr edə biləcəklər”. Müsahibimizin sözlərinə görə, yeni tikilən attraksion xüsusi işıq effektləri ilə təchiz olunub ki, bu da Alov Qüllələri, Büllur Saray kimi şəhərin gecə görünüşünü heyrətamiz edəcək.

N. Məcidovla söhbətimiz zamanı dünyada bu tip attraksionun daha böyük örnəklərinin olduğunu onun nəzərinə çatdıraraq, yeni attraksionun diametrinin niyə məhz 60 metr olmasının səbəblərini öyrənməyə çalışdıq.

Yeni attraksionların quraşdırılması davam edəcək

Həmsöhbətimizin sözlərinə görə, attraksionun böyüklüyünün müəyyən edilməsində Bakının küləkli iqlim şəraiti nəzərə alınıb. Onun sözlərinə görə, milli parkda tikilən bu tip attraksion üçün 60 metr optimal böyüklükdür. N. Məcidovdan onu da öyrəndik ki, yeni attraksionun tikintisi başa çatmaq üzrədir: “İlin sonuna kimi bu nəhəng attraksionun tikinti işləri tamamlanıb vətəndaşların istifadəsinə veriləcək”. Sözügedən attraksionun istifadəyə verildikdən sonra qiymətinin nə qədər olacağı Bakı sakinlərini maraqlandıran əsas məsələlərdən biridir. Qimyət məsələsi ilə bağlı N. Məcidov bildirdi ki, hələ bu barədə onda heç bir məlumat yoxdur: “Attraksion hələ istifadəyə verilmədiyi üçün ondan istifadə biletinin qiymətinin neçə manat olacağını bilmirəm. Bu barədə mənim məlumatım yoxdur. Amma hesab edirəm ki, sözü gedən attraksionun biletinin qiyməti 5 manatdan çox olmayacaq”. Bizimlə söhbət zamanı müsahibimiz “Ətrafa baxış” attraksionunun bundan sonrakı fəaliyyətinə də aydınlıq gətirdi: “Ətrafa baxış” attraksionu hələ bir müddət öz fəaliyyətini davam etdirəcək. Gələcəkdə onun sökülüb-sökülməyəcəyi isə hələ məlum deyil”. Sonda N. Məcidov onu da əlavə etdi ki, Dənizkənarı Milli Parkın ərazisi genişləndirildikcə vətəndaşların yüksək səviyyədə istirahəti üçün yeni attraksionlar quraşdırılacaq.

Bakı bulvarı “Şaxta baba” və “Qarqız”ların yolunu gözləyir

Dənizkənarı Bulvar İdarəsinin rəisi Nazim Məcidovla görüşümüzün Yeni İl və Dünya Azərbaycanlılarının Həmrəylik Günü bayramı ərəfəsinə düşdüyü üçün ondan milli parkda bayram hazırlığı işləri haqqında da məlumat aldıq. Müsahibimizin sözlərinə görə, hər il olduğu kimi bu il də milli parkda “yolka” quraşdırılacaq: “Qarşıdan gələn Yeni İl bayramı ilə əlaqədar milli park ərazisində 15 yerdə şam ağacları bəzədiləcək. Bundan başqa ənənəvi şəkildə hər şam ağacının yanında “Şaxta Baba” və “Qarqız” olacaq”. N. Məcidov “Şaxta Baba” və “Qarqız”ın necə müəyyən olunması məsələsinə də aydınlıq gətirdi: “Dənizkənarı Milli Park ərazisində “Şaxta Baba”, “Qarqız” olmaq istəyən hər kəs ilk olaraq Bakı şəhəri Ticarət Departamentində qeydiyyatdan keçməlidir. Məhz qeydiyyatdan keçmiş və yaşı 18-dən yuxarı olan hər kəs sözügedən məsələ ilə bağlı idarəmizə müraciət edə bilər”.

Məlumat üçün bildirək ki, Dənizkənarı bulvar 1909-cu ildə Bakı şəhər Dumasının müvafiq qərarı ilə salınıb. 1970-ci illərdə dövlət tərəfindən respublikada və birinci növbədə Bakı şəhərində yaşıllaşdırma və abadlaşdırma işlərinin genişləndirilməsi nəticəsində Dənizkənarı bulvarda da yenidənqurma işləri aparılıb. Bulvar şərq və qərb istiqamətlərində genişləndirilib. 29 dekabr 1998-ci ildə Azərbaycan Respublikası Prezidentinin fərmanına uyğun olaraq Azərbaycanın milli sərvəti kimi bu parka Milli Park statusu verilib. Hazırda Dənizkənarı Milli Park dünyanın ən böyük parklarından biridir.

Zaman.-2013.-18 ndekabr.-S.7.