Görkəmli dövlət xadimi Kamran Hüseynovun 100 illik yubileyi qeyd olunub

Mədəniyyət və Turizm Nazirliyinin təşkilatçılığı ilə Azərbaycan Dövlət Akademik Milli Dram Teatrında görkəmli dövlət xadimi Kamran Hüseynovun 100 illiyinə həsr olunmuş yubiley tədbiri keçirilib. Prezident İlham Əliyevin 2013-cü il 6 avqust tarixli Sərəncamına əsasən keçirilən yubiley tədbirində dövlət və hökumət nümayəndələri, millət vəkilləri, elm və mədəniyyət xadimləri, Qubadlı rayonundan olan ziyalılar iştirak ediblər.

Tədbirdə çıxış edən mədəniyyət və turizm naziri Əbülfəs Qarayev görkəmli dövlət xadimi Kamran Hüseynovun zəngin həyat yolundan və fəaliyyətindən söhbət açıb. Nazir Kamran Hüseynovun 1970-80-ci illərdə ulu öndər Heydər Əliyevin rəhbərliyi altında respublikamızda başlanmış geniş quruculuq işlərində yaxından iştirak etdiyini bildirib və onun yüksək əxlaqi-mənəvi keyfiyyətlərindən danışıb. Ə. Qarayev K. Hüseynovun vətənə, xalqa layiqli xidmət nümunəsi olan şərəfli ömür yolunun həmişə örnək kimi xatırlanacağını vurğulayıb. Nazir Kamran Hüseynovun: “Taleyimdən razıyam, onu özüm yaratdım. Oxutmadılar-oxudum. Evləndirmədilər-evləndim. Böyütmədilər-böyüdüm. Dayağa söykənmədim, dayaq oldum”- sözlərində böyük həyat fəlsəfəsi olduğunu diqqətə çatdırıb. Ə. Qarayevin sözlərinə görə, bu sadə sözlərdə Kamran Hüseynovun mənalı ömür yolu və bitkin obrazı öz əksini tapıb. Diqqətə çatdırılıb ki, Kamran Hüseynov çalışdığı bütün sahələrdə yüksək peşəkarlıq, təşkilatçılıq qabiliyyəti nümayiş etdirmişdir. Sumqayıt, Mingəçevir, Naftalan kimi yeni yaşayış məntəqələrinin salınmasında, onların iri yaşayış, sənaye-mədəniyyət mərkəzlərinə çevrilməsində Kamran Hüseynovun səmərəli xidmətləri olub.

Azərbaycan Həmkarlar İttifaqları Konfederasiyasının sədri, Milli Məclisin deputatı Səttar Mehbalıyev isə Kamran Hüseynovun 1958-1961-ci illərdə respublika Həmkarlar İttifaqları Şurasının sədri, 1961-1968-ci illərdə Moskva şəhərində Ümumittifaq Həmkarlar İttifaqları Mərkəzi Şurasının katibi, 1968-1980-ci illərdə Azərbaycan SSR Nazirlər Soveti sədrinin müavini, 1980-1993-cü illərdə respublika Ticarət və Sənaye Palatasının sədri vəzifələrində işləyərkən üzərinə düşən işləri layiqincə yerinə yetirdiyini söyləyib. O, Kamran Hüseynovun Moskva şəhərində Ümumittifaq Həmkarlar İttifaqları Mərkəzi Şurasının katibi işləyərkən həmkarlar ittifaqı hərəkatına verdiyi töhfələrdən, fəhlələrin əmək hüquqlarının qorunması və onların istirahətinin təşkilində göstərdiyi xidmətlərdən də danışıb. Çıxışlarda Kamran Hüseynovun əməyinin dövlət tərəfindən yüksək qiymətləndirildiyi də qeyd edilib. Diqqətə çatdırılıb ki, o, bir sıra orden və medallarla, o cümlədən müstəqil Azərbaycan Respublikasının “Şöhrət” ordeni ilə təltif edilib və Azərbaycan Prezidentinin fərdi təqaüdçüsü olub.

Daha sonra çıxış edən Kamran Hüseynovun qızı Hicran Hüseynova atasının vətənə sonsuz sevgisindən danışıb və ümummilli lider Heydər Əliyev tərəfindən onun xidmətlərinin həmişə yüksək qiymətləndirildiyini bildirib. O, Prezident İlham Əliyevə görkəmli ictimai-siyasi xadim Kamran Hüseynovun 100 illik yubileyinin qeyd olunması barədə Sərəncam imzaladığına görə minnətdarlığını da dilə gətirib. Yubiley tədbiri bədii hissə ilə başa çatmışdır.

Zaman.-2013.-19 dekabr.-S.7.