Dekorativ-tətbiqi sənətsevərlərin II festivalı

TÜRKANƏ ƏSƏDOVA,

Dekorativ-tətbiqi sənət xalqın əməyi sayəsində formalaşıb, onun həyatını təmin edən və özündə xalqın bədii zövqünü əks etdirən bir sənət növüdür. Məhz bu səbəbdən dekorativ-tətbiqi sənətə həm də “xalq sənəti” deyilir. Bu sənətin Azərbaycanın çoxəsrlik mədəniyyət tarixində xüsusi yeri var.

Bu sənətin növləri arasında xalçaçılıq, keramika, zərgərlik, batika (ipək parça üzərində rəsm), Avropa incəsənətinə aid olan qobelen (xalçaçılığın bir növü) və bir çox digər sahələr özünəməxsus üslubda formalaşmışdır. Adət ənənələri qorumaq, gənclərin əl işlərini nümayiş etdirmək, dekorativ-tətbiqi sənəti daha da inkişaf etdirmək məqsədilə “Art Villa” incəsənət qalereyasında “Potensial-2 Dekorativ-Tətbiqi Sənət Festivalı” keçirilib. Festival Azərbaycan Respublikasının Prezidenti yanında Gənclər Fondunun maliyyə, Azərbaycan Mədəniyyət və Turizm Nazirliyinin isə təşkilatı dəstəyi ilə “Arts Council Azərbaycan” tərəfindən təşkil olunub. Layihənin rəhbəri “Arts Council Azərbaycan” təşkilatının Dekorativ-Tətbiqi Sənət bölümünün sədri Əsmər Abdullayeva, kuratoru ( layihəni idarə edən) isə Aynur Əzizova olub.

Tədbirdə ilk çıxış edən “Arts Council Azərbaycan” təşkilatının rəhbəri Dadaş Məmmədov bu festivalın artıq bir ənənəyə çevrildiyini qeyd etdi: “Potensial 2” festivalı təşkilatımız və “Arts Council” Dekorativ-Tətbiqi Sənət bölümünün rəhbəri Əsmər xanımla birgə ərsiyə gətirdiyimiz bir layihədir və bu il artıq ikincisini təşkil etdik”.

Rəssamlıq Akademiyasının müəllimi, sənətşünas, “Arts Council Azərbaycan” təşkilatının Dekorativ-Tətbiqi Sənət bölümünün sədri, eyni zamanda İçərişəhər Qoruq İdarəsinin Elmi Mədəni Mərkəzinin mütəxəssisi Esmira Abdullayeva qəzetimizə bildirdi ki, bu layihənin keçirilməsində əsas məqsəd Azərbaycanda dekorativ-tətbiqi sənətin yenidən inkişaf etməsini göstərmək, bu istiqamətə gəncləri həvəsləndirmək və onlara dəstək olmaq, bəzi unudulmaqda olan tətbiqi sənətin növlərini yenidən inkişaf etdirməkdir: “Azərbaycanın qədim sənətkarlarının gözəl nümunələri dünyanın bir çox muzeylərində nümayiş olunub. Bu ənənəni yenidən dirçəltməliyik. Bu sənətə son illərdə maraq elə də qənaətbəxş deyil. Çalışmalıyıq ki, bizim tarixi ənənələrimizi, folklorumuzu hər kəs tanısın. Bu istiqamətdə həvəsi olan gənclərin çox böyük potensialı var. Bu rəssamları üzə çıxartmalıyıq. Azərbaycanda qədim dövürdən bu sənətin demək olar ki, bir çox növü istifadə olunub və insanların maraqlarına səbəb olmuşdur. Ən qədim sənətlərdən biri də zərgərlik, keramikadır. Keramikanın ənənələri çox zəngindir və indi də davam edir”.

Milli Konservatoriyanın məzunu, kurator Aynur Əzizova qəzetimizə bildirdi ki, tədbirin keçirilməsində əsas məqsəd dekorativ-tətbiqi sənət növlərini təbliğ etmək, gənc nəsil arasında maraq yaratmaq və bu milli sənət növlərinin inkişafına kömək etməkdir: “ Folklorumuzun inkişaf etməsi, ölkələrdə tanıdılması biz gənclərdən asılıdır və buna təkan verməliyik. Rəssamlıq sənəti inkişaf etməkdədir və sərgilərin keçirilməsi də buna bir növ sübutdur”. A. Əzizova həmçinin onu da bildirdi ki, bu festivalda Rəssamlıq Akademiyasının və İncəsənət Universitetinin gənc rəssam, tələbə və məzunlarının dekorativ-tətbiqi sənət üzrə əl işləri də sərgilənir.

Zaman.-2013.-14 noyabr.-S.13.