Payız günəşi, kitab karvanı və sevincə bələnən günlər (2)

SƏMƏD MƏLİKZADƏ,

Avtobus dəmir yolunun üstündən keçib üzüyuxarı burulandan sonra dayandı. Heydər Əliyev Mərkəzinin binası qarşısındakı meydanda hazırlıq işləri gedirdi. Səliqə ilə döşənmiş xırda beton daşların üzərinə bir neçə xalça sərilmiş, mikrofon qoyulmuşdu.Məktəblilərdən ibarət ansambl yəqin ki, son məşqini edirdi. Xalçaların qarşısında xeyli stol sıralanırdı. Bu stolların üstündə heç nə yox idi. Geniş meydandan ötüb keçənlərin bəzisi dayanıb bu mənzərəni maraqla seyr edirdi. Cavan bir oğlan əlindəki telefonu fırlada-fırlada mənə yaxınlaşıb soruşdu ki, bilmirsiz, burada nə olacaq? Mən əvvəlcə ona nə cavab verəcəyimi bilmədim. Az sonra dedim ki, kitab bayramı keçiriləcək. Oğlan qəribə təbəssümlə üzümə baxıb: “Mən də deyirəm, yəqin konsert verəcəklər”-, dedi və uzaqlaşdı. Çox keçmədi ki, kitab karvanının Şirvan məktəblilərinə hədiyyə kimi gətirdiyi kitablardan nümunələr stolların üzərini bəzədi. “Uşaq kitab karvanı Şirvan yolunda” yazılmış lövhə çoxlarının diqqətini çəkdi. Məktəblilər, təhsil və kitabxana işçiləri, şəhər sakinləri meydana toplaşdılar. Şəhər Mədəniyyət və Turizm Şöbəsinin müdiri Əziz Abbasovun “xoş gəlmişsiniz” sözlərindən və qısa çıxışından sonra Dövlət Himnimiz səsləndirildi və kitab bayramına start verildi.

F. Köçərli adına Respublika Uşaq Kitabxanasının direktoru Şəhla Qəmbərova tədbirin məqsədi barədə dedi:

- Son illər ölkəmizdə kitab nəşrinə və kitabxanalara böyük qayğı göstərilir. Məlumat üçün deyək ki, Azərbaycan Prezidenti İlham Əliyev 2007-ci ildə “Kitabxanaların maddi-texniki bazasının yaxşılaşdırılması haqqında” sərəncam imzalayıb. Bir il sonra isə, yəni 2008-ci il oktyabrın 8-də ölkə rəhbərinin sərəncamı ilə təsdiq edilən “Azərbaycan Respublikasında kitabxana-informasiya sahəsinin 2008-2013-cü illərdə inkişafı üzrə Dövlət Proqramı” qəbul olunub. Həmin proqrama əsasən, kitabxanamız Mədəniyyət və Turizm Nazirliyinin təşkilati dəstəyi ilə üçüncü ildir ki, kitab karvanı ilə bölgələrimizdə uşaq və yeniyetmələr üçün səyyar sərgilər keçirir. Müstəqilliyimizin 20 illiyinə həsr edilən ilk kitab karvanı 2011-ci ildə Goranboy, Gəncə şəhəri, Şəmkir, Ağstafa, Tovuz və Qazax rayonlarını əhatə edib. Ötən ilin payızında isə kitab karvanı Cənub bölgəmizdəki rayonlarda olub. Bu il isə ümummilli liderimiz Heydər Əliyevin 90 illiyi ilə əlaqədar belə sərgilər “Uşaq kitab karvanı Şirvan yolunda” adı altında keçirilir. Karvan ilk səfərini Şirvan şəhərinə edib. Sonra isə Hacıqabul, Saatlı, İmişli və Beyləqana da qonaq gedəcək, mərkəzləşdirilmiş kitabxana sistemlərinin uşaq şöbələrinə ölkəmizin müxtəlif nəşriyyatları tərəfindən son illərdə çap olunmuş kitablar hədiyyə edəcəyik. Tədbirin özəlliyi ondadır ki, məktəblilər burada yeni kitablarla tanış olmaqla yanaşı, çağdaş uşaq ədəbiyyatının yazarları- şairlər, yazıçılar və uşaq qəzetlərinin redaktorları, nəşriyyat əməkdaşları ilə görüşürlər.Bu sərginin başlıca məqsədi müstəqil respublikamızın gələcək qurucuları olacaq yeni nəslin kitaba olan marağını artırmaq, onların hərtərəfli inkişafına dəstək verməkdir. Bəllidir ki, hər cür mənəvi inkişafın və yüksəlişin təməli kitabla bağlıdır. Kitab dünəni bu günə, bu günü sabaha daşıyan vasitədir...Neçə-neçə şeiri uşaqların dilində əzbər olan və mahnılara çevrilən şair İlyas Tapdıq mikrofona yaxınlaşan kimi alqışlar başladı. İlyas müəllim uşaq və yeniyetmələrə müraciətlə bildirdi:- Əziz uşaqlar, siz xoşbəxtsiniz. Çünki müstəqil Azərbaycan Respublikasının vətəndaşlarısınız. Dövlətimiz getdikcə qüvvətlənir. Azərbaycan indi dünyada ən sürətlə inkişaf edən ölkələrdən biridir. Buna görə də Azərbaycanı “Qafqazın parlayan ulduzu” adlandırırlar. Siz həm də ölkəmizin sabahısınız. Buna görə də biliklərə dərindən yiyələnməlisiniz. Dərs kitabları indi sizə pulsuz verilir, gözəl siniflərdə oxuyursunuz. Hər il yeni-yeni məktəblər, bağçalar, kitabxanalar, idman meydançaları, sağlamlıq ocaqları istifadəyə verilir. Bizim uşaqlığımız isə müharibə illərinə düşdü- qırğınlar, aclıq, qan-qada gördük. Buna baxmayaraq oxuduq, Azərbaycana, xalqımıza xeyirli olmağa çalışdıq. İndi ümidimiz sizlərsiniz. Buna görə də yaxşı oxuyun. Kitab elə bir süfrədir ki, onun neməti heç vaxt azalmaz. Sonra İlyas müəllim uşaqlarla birlikdə “Zoğal”, “Dəmirağac” və digər şeirlərini oxudu. Şeirlərindən birini ən yaxşı söyləyən məktəbliyə isə hədiyyə verdi.Uşaq yazıçısı Gülzar nənə (İbrahimova ) dedi ki, payız bolluq, bərəkət fəslidir. Bu ilin payızı xoş keçir. Bu da insanlarımıza gələn ilin məhsulu üçün yaxşı zəmin yaratmağa imkan verir. Noyabr ayında bir neçə bayram və tarixi günlər var. Ümid edirik ki, bu kitab bayramı da sizin üçün yaddaqalan günlərdən biri olacaq.Gülzar nənə çıxışını uşaqlar üçün təzə yazdığı hekayələrindən birini oxumaqla bitirdi. Meydan şəhər 16 saylı məktəbin oğlanlarına verildi. Onlar müxtəlif şairlərin şeirlərini söylədilər. Fədail Əzimov isə qarmonda oynaq bir hava çaldı. Bundan sonra “Şirvannəşr”in direktoru, şair Qəşəm İsabəyli “Vətən”,”Çörək” və “Əriştə” şeirlərini oxudu. Məktəblilər 65 yaşı tamam olması münasibətilə onu təbrik etdilər və gül dəstələri verdilər.“Şirvan” rəqs qrupu “Bayram” rəqsini ifa etdi və meydan bir qədər də coşdu. Azərbaycan Televiziyası və Radiosunun radio üzrə uşaq proqramları redaksiyasının baş redaktoru, şair Ələmdar Quluzadənin yumor dolu şeirləri hamının ürəyincə oldu. Buna görə də uşaqlar Ələmdar müəllimdən daha çox şeir oxumasını xahiş etdilər.Yazıçı Sevinc Nuruqızı çıxışına bu sözlərlə başladı:

- Mən ilk dəfədir ki, Şirvan şəhərinə gəlirəm. Şəhəriniz gözəldir. Mən “Təhsil” nəşriyyatında çalışıram. Sevinirəm ki, dərsliklərinizin çapa hazırlanmasında və sizin biliklərə yiyələnmənizdə mənim də əməyim var. Eyni zamanda sizlər üçün şeirlər, hekayələr, nağıllar yazır, dünya uşaq ədəbiyyatında bəzi nümunələri tərcümə edirəm. Kitab karvanı ilə sizin görüşünüzə gəlməkdə məqsədim oxucularım olan sizləri dinləmək, arzu və istəklərinizi öyrənməkdir... İstedadlı məktəblilər mahnı və rəqslərlə, şeirlərlə kitab bayramını daha yaddaqalan etməyə çalışdılar. Bu arada Şirvan Şəhər Mərkəzi Kitabxana Sisteminin direktoru İltifat Nəbiyevlə görüşdük. İltifat müəllim bildirdi ki, kitabxana sistemimizdə 186 min 500 nüsxə kitab var. Həmin kitabların 37 min nüsxəyə yaxını latın qrafikalı ədəbiyyatdır. O cümlədən 33 min nüsxə Azərbaycan Prezidentinin sərəncamı ilə nəşr edilən və kitabxanalara hədiyyə edilən kitabdır. Şəhərimizdə iki uşaq kitabxanası fəaliyyət göstərir. Həmin kitabxanaların ümumi kitab fondu 30 min 200 nüsxədir. Son illər latın qrafikası ilə nəşr edilən kitablar uşaqların daha çox kitab oxumasına səbəb olub. Kitabxana işçiləri kitaba marağı artırmaq üçün müxtəlif tədbirlər təşkil edir, müsabiqələr keçirirlər. Eyni zamanda məktəblərdə səyyar sərgilər təşkil olunur. Bütün bunlar məktəblilərin mütaliəyə marağını xeyli artırır. Fikrimcə, kitab bayramının keçirilməsi də uşaq və yeniyetmələrin kitaba həvəsini bir qədər də artıracaq. Çünki kitabxanalarımıza hədiyyə kimi təqdim olunacaq kitablar çox rəngarəng və nəfisdir. Digər tərəfdən, uşaq ədəbiyyatına xidmət edən yazarların uşaqlarla canlı görüşü, məktəblilərin sevimli qəzeti “Tumurcuq” barədə eşitdikləri onları çox sevindirir. Arzu edirəm ki, kitaba həsr edilən belə tədbirlər tez-tez keçirilsin. Çünki bu, biz kitabxanaçıların işinin səmərəsinə də müsbət təsir göstərir.Kitab sərgisi gün əyilənədək şeir, mahnı, rəqs və viktorinalarla davam etdirildi. Tədbiri izləyənlər evlərinə sevinc və könül xoşluğu, qaliblər isə qazandıqları hədiyyələrlə döndülər (ardı var).

Zaman.-2013.-14 noyabr.-S.7.