“TRT həm də Azərbaycanın kanalıdır”

Türkiyənin ictimai televiziyası - TRT-nin (Türkiyə Radio-Televiziya Qurumu) baş direktoru İbrahim Şahin “Odlar Yurdu” Universitetinin Elmi Şurasının qərarı ilə “Fəxri doktor” adına layiq görülüb. Bu münasibətlə dünən “Odlar Yurdu”nda təşkil olunan tədbirdə TRT-nin baş direktoru İ. Şahin, Türkiyənin Azərbaycandakı səfiri İsmail Alpər Coşqun, millət vəkilləri Qənirə Paşayeva, Nizami Cəfərov və digər qonaqlar iştirak ediblər.

Qonaqlar ilk olaraq, universitetin foyesində ulu öndər Heydər Əliyevin büstü qarşısına qərənfil dəstələri qoyublar. Daha sonra isə adıçəkilən ali təhsil ocağında tələbələr üçün hazırlanmış şəraitlə tanış olublar.

Tədbir hər iki qardaş ölkənin dövlət himni ilə başlayıb. Daha sonra çıxış edən “Odlar Yurdu”nun rektoru, professor Əhməd Vəliyev TRT-nin baş direktoru İbrahim Şahinin türk mədəniyyətinin, Qarabağ problemi və Xocalı soyqırımının dünyaya tanıdılması, iki ölkə arasındakı münasibətlərin daha da gücləndirilməsi və genişləndirilməsində göstərdiyi xidmətə görə fəxri doktor adına layiq görüldüyünü bildirib. Daha sonra çıxış edən Nizani Cəfərov TRT-nin baş direktorunun “Odlar Yurdu”nun “Fəxri doktor” adına layiq görülməsini və onun bu münasibətlə adıçəkilən ali təhsil ocağına təşrif buyurmasını böyük hadisə kimi qiymətləndirib. Tədbir əsnasında iştirakçılara TRT kanalı haqqında video təqdimat da göstərilib.

İki qardaş ölkə arasındakı münasibətlərin daha da möhkəmləndirilməsində media və mətbuat orqanlarının önəmli rolundan danışan Qənirə Paşayeva TRT kanalının Türkiyə ilə yanaşı, Azərbaycanın da kanalı olduğunu bildirib. Onun sözlərinə görə, adıçəkilən kanal öz fəaliyyəti ilə bunu təsdiqləyib. Qənirə Paşayeva bu kanalın 2007-ci ildən bu yana - İbrahim Şahinin baş direktor seçilməsindən sonra Azərbaycanla bağlı 13 mindən çox xəbər, mindən çox 30 dəqiqəlik proqramlar hazırlayıb dünyaya nümayış etdirdiyini vurğulayıb. O, bununla da TRT-nin həm də Azərbaycanın kanalı adını doğrultduğunu sübut etdiyini söyləyib. Q. Paşayeva tədbir iştirakçılarının nəzərinə çatdırıb ki, Azərbaycan üçün Türkiyə televiziya kanalları arasında TRT qədər efir vaxtı ayıran ikinci bir kanal yoxdur.

Tədbir iştirakçıları qarşısında çıxış edən İbrahim Şahin “Fəxri doktor” adına layiq görüldüyü üçün çox şad olduğunu bildirib. Onun sözlərinə görə, bununla ilk dəfə xaricdə fəaliyyət göstərən ali təhsil ocağı tərəfindən belə bir ada layiq görülüb. TRT kanalının baş direktoru buna görə universitetin bütün əməkdaşlarına təşəkkür edib. Türkiyənin Azərbaycandakı səfiri İsmail Alpər Coşqun isə çıxışında yerli televiziya kanalları ilə yanaşı, TRT-nin də Azərbaycanın dünyadakı səsi olduğunu vurğulayıb.

Dünən həmçinin İbrahim Şahin “Türk dünyasına üstün xidmət mükafatı” ilə də təltif olunub. Azərbaycan Mətbuat Şurası, Avrasiya Beynəlxalq Mətbuat Fondu, Avrasiya Beynəlxalq Araşdırmalar İnstitutu İctimai birliyi bu mükafatı TRT-nin baş direktoruna türk dünyasına göstərdiyi xidmətlər, “TRT Avaz” kanalının fəaliyyəti və digər nailiyyətlərinə görə veriblər.

ELVİN ƏLİYEV

Zaman.-2013.-1 oktyabr.-S.2.