“Torpağımın qarşısında günahkar bilirəm özümü”

- Sizə görə həyatda ən asan və ən çətin şey nədir? - Ən asanı deyə bilmərəm, ən çətini isə elə yaşamaqdır.

- Ucqar bir kənddə yaşamağa məcbur olsaydınız, dolanışığınızı necə çıxarardınız?

- Ucqar bir kənddə yox, Şuşada yaşamağa məcbur olmaq istərdim. Belədə, dolanışıq çox da vacib olmazdı.

- Keçdiyiniz ömür yoluna baxanda ən çox nəyə üzülür, nəyə sevinirsiniz?

- Çox şeyə üzülürəm. Ən çox da Azərbaycan torpaqlarının işğalına. Bu işğal mənim şəxsi həyatımı da alt-üst etdi. Sevinmək… Ürəkdən sevindiyimi çoxdan xatırlamıram.

- Valideyn və müəllimlərdən başqa özünüzü kimlərə borclu bilirsiniz?

- Məni doğma və əziz bilən hər kəsə. Amma ən çox doğma torpağa, məni yetişdirən Şuşa torpağına.

- Uğrunda hər şeydən keçə biləcəyiniz varlığın adı?

- Təmiz ad. Çox şeydən keçmişəm buna görə… Amma hər şeydən keçmək… Mənə ağır gəlir belə hökm vermək.

- Özünüzü hansı peşədə daha yaxşı ifadə edə bilərdiniz? İndiki işinizdən razısınızmı?

- Jurnalist peşəsi mənim şüurlu seçimimdir. Peşman deyiləm.

- Üzr istəmək sizə ağır gəlmir ki?

- Yox. Səhvimi etiraf edirəm hər zaman.

- Sabir deyir: “Ağladıqca kişi qeyrətsiz olur”. Siz necə düşünürsünüz?

- Bu deyimi kontekstdən çıxarmaq düz deyil. Amma böyük həqiqət var bu deyimdə.

- “Kaş ki ... ölkədə doğulaydım, ... xalqın nümayəndəsi olaydım” dediyiniz olurmu?

- Hərdən olur. Amma mən daha çox öz taleyimizi necə dəyişmək barədə düşünürəm. Azərbaycan bizim əsas sərvətimizdir.

- Evinizdə inciklik olurmu? Olursa, birinci kim barışır?

- Mən küsəyən adam deyiləm.

- Özünüzü kimin qarşısında günahkar bilirsiniz və kiminsə günahını bağışlamısınızmı?

- Torpağımın qarşısında günahkar bilirəm özümü. Sualın ikinci hissəsinə gəlincə, çox günahlar bağışlamışam.

- Sizcə, azadlıq, istədiyini eləməkdir, yoxsa istəmədiyini?

- Azadlığa belə üzdən yanaşmağın tərəfdarı deyiləm.

- Sevgi nədir: ümid, qorxu, ya xoşbəxtlik?

- Sevgi hər şeydir.

- Ən çox nə zaman utanırsınız?

- Ölkənin xəritəsinə baxanda. Qarabağın yoxluğu məni utandırır.

- Ölüm nədir?

- Haqq.

- Çoxlu pulunuz olsa, hara xərclərdiniz?

- O qədər yer var ki… Amma mənim çoxlu pulum olan deyil.

- “Mən almasam, bir başqası alacaq, mən olmasam, başqası olacaq” düşüncəsi nəyi ifadə edir?

- Özünü inandırmaq cəhdini.

- Həyatda ən böyük təsəlliniz?

- Namuslu adamların varlığı.

- Sizə hansı mövzuda sual verilməsini heç arzulamırsınız?

- Şəxsi həyatdan danışmağı çox da xoşlamıram.

- Yubiley və ad günlərində özünüzü necə hiss edirsiniz?

- Bəzən qüssəli oluram.

- Dünyanın hər yerindən görünən uca bir lövhəyə iki-üç kəlməlik nəsihət yazmağı xahiş etsələr, nə yazardınız?

- Özünə rəva görmədiyini özgəyə də rəva görmə.

- Sizə görə insanda ən yaxşı və ən pis xarakter hansılardır?

- Nisbi məsələdir.

- Nə vaxtsa hansısa müğənniyə, sənətçiyə heyran, ya da aşiq olmusunuzmu?

- Olub. Amma çox dərinə getməmişəm.

- Övladlarınız sizi atsalar, onlara nə deyərdiniz?

- Bir oğlum var. Güman edirəm atmaz məni.

- Ən çox sevdiyiniz və sevmədiyiniz sözlər?

- Baxır məqamına…

- Fürsət olsa, ölümqabağı nə vəsiyyət edəcəksiniz?

- Qismət olsa, bir şey fikirləşərik…

- Ən çox nədən qorxursunuz?

- Şərdən.

- Xoşbəxt olmaq üçün nəyiniz çatmır?

- Çox şey çatmır.

- Sizin kimlərə və nə kimi xeyriniz var?

- Bu suala başqaları cavab verə bilər.

- Bu dünya bir insan şəklində qarşınızda dursa, ona nə deyərdiniz?

- Aman Allah!

- Həyatınızda sizə təklif edilmiş nədənsə imtina etmisinizmi?

- O qədər imtina olub…

- Gənclik hansı yaşda bitir?

- Adam özünü qoca hiss edəndə.

- Dostlarınız çoxdurmu? İnsanlar niyə dost olurlar?

- Dostlarsız bir günümüz olmasın.

NİCAT İNTİQAM

Zaman.-2013.-18 yanvar.-S.7.