Həqiqi azadlıq xeyirlini eləməkdir

Səlim Babullaoğlu 1972-ci il dekabrın 10-da Şirvan şəhərində anadan olub. Şair, esseist, tərcüməçidir. Şeir və

esseləri bir çox dünya dillərinə çevrilib.

Prezident təqaüdçüsüdür.

- Sizə görə həyatda ən asan və ən çətin şey nədir?

- Ləyaqətlə yaşamaq, imtina etmək çətindir. Tərsi asan. Necə deyərlər, utanmasan oynamağa nə var ki...

- Ucqar bir kənddə yaşamağa məcbur olsaydınız, dolanışığınızı necə çıxarardınız?

- Heyvandarlıq və əkin-biçin, müəllimlik…

- Keçdiyiniz ömür yoluna baxanda ən çox nəyə üzülür, nəyə sevinirsiniz?

- Səhvlərimə, günahlarıma üzülürəm...

- Valideyn və müəllimlərdən başqa özünüzü

kimlərə borclu bilirsiniz?

- Onlardan əvvəl Allaha, onlardan sonra dostlarıma...

- Uğrunda hər şeydən keçə biləcəyiniz

varlığın adı?

- Anam idi, ailəmdir...

- Özünüzü hansı peşədə daha yaxşı ifadə edə bilərdiniz? İndiki işinizdən razısınızmı?

- Müəllimlikdə. Ümumiyyətlə hə.

- Üzr istəmək sizə ağır gəlmir ki?

- Yox. Əksinə sonra yüngülləşirəm.

- Sabir deyir: “Ağladıqca kişi qeyrətsiz olur”, siz necə düşünürsünüz?

- Sabir ağlamağı peşə edənləri nəzərdə tuturdu məncə, bu halda onunla razıyam. Ümumiyyətlə, isə göz yaşları qəlbin buzunu əridir.

- “Kaş ki, filan ölkədə doğulaydım, filan xalqın nümayəndəsi olaydım” dediyiniz olurmu?

- Yox, amma köçüb getmək haqqında düşündüyüm tez-tez olub.

- Evinizdə inciklik olurmu? Olursa, birinci kim barışır?

- Olur. Mən. Çünki daha çox incidən də mən oluram, təəssüf…

- Özünüzü kimin qarşısında günahkar bilirsiniz və kiminsə günahını bağışlamısınızmı?

- Bir xeyli adam var ki, onlara qarşı səhv etmişəm. Bağışlamaq Allaha məxsusdur. Mənə qarşı səhv edənlərə kin saxlamıram və birdən başa düşürəm ki, unutmuşam…

- Sizcə, azadlıq istədiyini eləməkdir, yoxsa istəmədiyini?

- Həqiqi azadlıq xeyirlini eləməkdir, istəməsən belə…

- Sevgi nədir: ümid, qorxu, ya xoşbəxtlik?

- Sevgi, eşq - bu söylədiklərinizdən çox böyük, daha vacib anlayış və haldır.

- Ən çox nə zaman utanırsınız?

- Səhv edəndə…

- Ölüm nədir?

- Kamyü deyirdi: ölüm yeganə şeydir ki, bunu yalnız bir dəfə və yalnız öz təcrübəndə yaşaya bilərsən, özü də heç kimlə bölüşə bilməzsən…. Doğru deyirdi. Məncə, ölüm - keçiddir. Necə? Bu suala isə artıq Kamyü cavab verib.

- Çoxlu pulunuz olsa, hara xərclərdiniz?

- Eee…

- “Mən almasam, bir başqası alacaq, mən olmasam, başqası olacaq” düşüncəsi nəyi ifadə edir?

- Hərdən yaxşı şeyləri, hərdən də pis…

- Həyatda ən böyük təsəlliniz?

-Allahın Böyük və Bağışlayan olması.

- Sizə hansı mövzuda sual verilməsini heç arzulamırsınız?

- Hə. Olub. Adətən, jurnalistlərin əksəriyyəti ədəbiyyatla bağlı ümumi suallar verirlər. Arzulamışam ki, detallı suallar versinlər.

- Yubiley və ad günlərində özünüzü necə hiss edirsiniz?

- Normal.

- Dünyanın hər yerindən görünən uca bir lövhəyə iki-üç kəlməlik nəsihət yazmağı xahiş etsələr, nə yazardınız?

-Ədalətli olun.

- Sizə görə, insanda ən yaxşı və ən pis xarakter hansılardır?

- Ədalət və səmimiyyət yaxşıdır. Əksi isə pis.

- Nə vaxtsa hansısa müğənniyə, sənətçiyə heyran, ya da aşiq olmusunuzmu?

- Hə, 5-6 yaşım vardı, dayım rəssamdı, deyəsən Nisə Qasımovanın rəsmini çəkmişdi. O şəklə vurulmuşdum. İfalarını sevə-sevə dinlədiyim ifaçılar var.

- Övladlarınız sizi atsalar, onlara nə deyərdiniz?

- Yəqin gözlərim dolardı və onlar üçün dua edərdim.

- Ən çox sevdiyiniz və sevmədiyiniz sözlər?

- İnşAllah, Allahdan xeyirlisi- bunlar sevdiyim sözlərdir. O biriləri isə bilmirəm.

- Fürsət olsa, ölümqabağı nə vəsiyyət edəcəksiniz?

- …bilmirəm.

- Ən çox nədən qorxursunuz?

- Bağışlanmamaqdan.

- Xoşbəxt olmaq üçün nəyiniz çatmır?

- Xoşbəxtlikdən daha vacib şeylər var.

- Sizin kimlərə və nə kimi xeyriniz var?

- Doğrusunu Allah bilir.

- Bu dünya bir insan şəklində qarşınızda dursa, ona nə deyərdiniz?

- Deyərdim ki, biz bir-birimizə çox oxşayırıq, çox qürurlanma, sən də fanisən, mən də.

- Həyatınızda sizə təklif edilmiş nədənsə imtina etmisinizmi?

- Çox olub.

- Gənclik hansı yaşda bitir?

- Bunun yaşla bağlı sərhədi çox qeyri-müəyyəndir.

- Dostlarınız çoxdurmu? İnsanlar niyə dost olurlar?

- Dost çox olmur. Var əlbəttə. Yəqin ona görə ki, Allah belə istəyib.

Zaman.-2014.-11 aprel.-S.9.