Əməkdar jurnalist Möhsüm Xəlilov: “Jurnalistin özünəməxsus üslubu olmalıdır”

Azərbaycanda mətbuatın keçdiyi uzun və şərəfli yolda region qəzetlərinin də özünəməxsus yeri var.

Mətbuatın ən ağır günlərində mərkəz qəzetləri maddi mənada bir sıxıntı çəkiblərsə, bölgə qəzetləri bundan da ağır vəziyyətə dözməli olublar. Lakin bütün çətinliklərə baxmayaraq, öz fəaliyyətlərini davam etdiriblər. Respublikamızın demək olar ki, bütün şəhər və rayonlarında yerli mətbuat orqanları fəaliyyət göstərir. Şirvan şəhərində fəaliyyət göstərən “İşıq” qəzeti də belələrindəndir. “İşıq” qəzetinin redaktoru Möhsüm Xəlilov ilə görüşüb bu mövzu ətrafında söhbətləşdik. Məlumat üçün bildirək ki, Möhsüm Xəlilov Şirvan şəhərində kifayət qədər tanınan jurnalistlərdəndir. Bu sahədəki xidmətlərinə görə, “Əməkdar jurnalist” və “Şərəf nişanı” ordeninə layiq görülüb. O, 1935-ci ildə Əli Bayramlı rayonunda (indiki Şirvan şəhəri) anadan olub. Şirvan şəhər 1 nömrəli məktəbi, Azərbaycan Dövlət Universitetinin Jurnalistika fakültəsini bitirib. Möhsüm müəllim bizimlə söhbətində 78 yaşının olmasına baxmayaraq, hələ bu sahədə çalışma əzmini itirmədiyini vurğuladı: “Universiteti bitirdikdən sonra 1959-cu ildə Qazıməmməd rayonunda (indiki Hacıqabul) çıxan “Kommunizm Yolu” rayon qəzetində məsul katib kimi işə başlamışam”.

Dediyinə görə, 1965-ci ilin iyul ayından etibarən Mərkəzi Komitə “İşıq” qəzetinin nəşri barədə qərar çıxarıb: “Redaktor vəzifəsinə isə mən təyin edildim. 1973-cü ilədək bu qəzetin redaktoru kimi çalışdım. Daha sonra şəhər partiya komitəsinin ikinci katibi vəzifəsinə təyin edildim. Bir müddətdən sonra təkrar “İşıq” qəzetinin redaktor müavini, 1988-ci ildə isə baş redaktoru oldum. İndiyədək bu vəzifədə çalışıram”.

Möhsüm Xəlilov mətbu orqanını şəhərin yaddaşı hesab edir: “Olub keçənlər, uğurlar onun səhifələrində əbədi yer tapır və istənilən vaxt yaşanan illəri dilləndirmək, danışdırmaq mümkündür”.

“Əsl jurnalist hansı xüsusiyyətlərə sahib olmalıdır?”,-sualımıza müsahibimiz belə cavab verdi: “Əsl jurnalist işinə can yandırmalı, qəzetin bütün qayğıları ilə yaşamalı, kifayət qədər savada malik olmalıdır. Seçdiyi sənətin vurğunu olmalıdır. Birinci növbədə, bu peşənin vurğunu olmalıdır və Azərbaycan dilini, ədəbi dilimizi gözəl bilməlidir. Yazını elə yazmalıdır ki, başqalarının təkrarı olmasın. Jurnalistin özünəməxsus üslubu olmalıdır. Tənqidi elə yazmalıdır ki, kiminsə şəxsiyyətinə toxunmasın. Obyektiv və əsaslı yazmalıdır. Jurnalist yeniliyin, müasirliyin təbliğatçısıdır. Jurnalistin müəyyən mənada digər sahələrlə də bağlı əsaslı biliyi olmalıdır. Özümə gəlincə, bir daha qeyd edim ki, mən öz peşəmi çox sevirəm. Orta məktəbdə oxuyarkən divar qəzetinin redaktoru olmuşam və bu həvəslə də gedib Azərbaycan Dövlət Universitetinin Jurnalistika fakültəsinə daxil olmuşam”.

“Qəzetlər Azərbaycan dilinin saflaşmasında, zənginləşməsində böyük rol oynayır”,-deyə qeyd edən Möhsüm Xəlilovun sözlərinə görə, qəzet, televiziya, radio, telefon, internet kimi informasiya vasitələrinin və onların çatdırdıqları məlumatların insanlar və cəmiyyət üzərində təsirləri var: “Bu təsirlər müsbət və mənfi olaraq bir-birindən ayrılır. Hər bir jurnalist bu mənada gördüyü işin əhəmiyyətini anlamalı, məsuliyyətini dərk etməlidir”. Babək Əsgər, Şirvan

Zaman.-2014.-8 fevral.-S.4.