Sumqayıtlı qəhrəman Belarusda ehtiramla yad edildi

Bu günlərdə Belarusun Sumqayıtla qardaşlaşmış şəhəri olan Mogilyovda bu şəhərin alman faşizmindən azad edilməsinin 70 illiyi münasibətilə “Şəhər günü” keçirilib.

Paytaxt Minskdən 200 kilometr məsafədə yerləşən, Belarusun qədim yaşayış məskənlərindən olan Mogilyov qardaşlaşdığı Sumqayıt kimi (xüsusilə xoşdur ki, Təbriz də Mogilyovun “qardaş”larındandır) iri sənaye şəhəridir. Orada 70-ə yaxın müəssisə, o cümlədən maşınqayırma, metal emalı, kimya və neft-kimya, yüngül və yeyinti sənayesi müəssisələri fəaliyyət göstərir. Əhalisinin sayı da təxminən elə Sumqayıtınkı qədərdir - 370 min nəfər. Mogilyov yalnız sənaye şəhəri kimi deyil, həm də zəngin tarixi yerlərə və abidələrə malik olan bir şəhər kimi də bura gələnləri, o cümlədən turistləri özünə cəlb edir. Təsadüfi deyil ki, vaxtilə bu şəhərdə görkəmli rus şairi və yazıçıları Aleksandr Puşkin, Sergey Yesenin, Konstantin Simonov, hətta Rusiya imperatorları I Pyotr, II Nikolay da olmuş, şəhərin gözəlliyinə vurulmuşlar. Mogilyovda təşkil edilmiş biznes-forumda və böyük təmtəraqla keçirilən “Şəhər günü” tədbirlərində belaruslularla yanaşı, qardaşlaşmış şəhərin qonağı olan Sumqayıt Bələdiyyəsinin sədr müavini Sultan Əsədov da iştirak edib. Bu barədə qəzetimizə Sumqayıt Bələdiyyəsinin mətbuat xidmətindən Rəhman Orxan xəbər verib. Onun sözlərinə görə, Sumqayıtdan olan nümayəndəni hörmət və səmimiyyətlə qarşılayan şəhər rəhbərliyi Azərbaycan-Belarus dostluğundan, ölkələrimiz arasında yaranmış iqtisadi-mədəni əlaqələrin inkişafından məmnunluğunu bildirib, bu dostluq, qardaşlıq əlaqələrinin uzun illər əvvəlki təməlindən söhbət açıb. Xüsusi bir minnətdarlıqla diqqətə çatdırılıb ki, II Dünya müharibəsi zamanı Azərbaycanın minlərlə igid və mərd oğulları Belarus torpaqlarında alman faşistlərinə qarşı rəşadətlə döyüşərək, qəhrəmanlıq nümunələri göstəriblər. Qeyd edilib ki, Azərbaycanın igid, cəsur oğlu, 2-ci Belarus cəbhəsinin 1-ci Mogilyov şturm qvardiya briqadasının komandiri, Sovet İttifaqı Qəhrəmanı polkovnik Aslan Vəzirovun xatirəsi Belarus xalqı üçün xüsusilə əzizdir. Döyüşlərdə göstərdiyi igidliklərə görə, “Kutuzov”, “Boqdan Xmelnitski” ordenlərinə də layiq görülmüş azərbaycanlı komandir Belarusun bir çox şəhər və kəndlərinin düşməndən azad edilməsində böyük fədakarlıqlar göstərib. Təsadüfi deyil ki, müharibədən sonra bir zamanlar düşmənə qarşı qəhrəmanlıqla vuruşduğu Belarus torpağında, Mogilyovda olmuş, döyüş dostları ilə görüşmüş, bu gün isə hər bir belaruslunun minnətdarlıq hissi ilə xatırladığı Aslan Vəzirov sağlığında “Mogilyov şəhərinin Fəxri vətəndaşı” adına layiq görülmüşdür. Şəhərin Pervomaysk küçəsində onun xatirə lövhəsi asılmış, Kocmonavtlar və Lazarenko küçələrinin kəsişməsində yerləşən bağda azərbaycanlı qəhrəmanın büstü qoyulmuşdur. Mogilyov şəhərinin rəhbərliyi sumqayıtlı qonaqla birgə igid azərbaycanlı döyüşçünün xatirəsinə ehtiram əlaməti olaraq, onun büstünü ziyarət etmiş, önünə gül-çiçək dəstələri düzmüşlər.

Nicat Xıdırlı

Zaman.-2014.-3 iyul.-S.9.