“Mingəçevir Bələdiyyəsinin sədri “Qızıl bələdiyyə nişanı” ilə təltif olundu”

Bələdiyyələrin Mükafatlandırılması Komissiyasının qərarı ilə bələdiyyə işində xidmətlərinə görə bir qrup şəxs “Qızıl bələdiyyə nişanı” ilə təltif olunub.

Mükafata layiq görülənlərin içərisində Mingəçevir Bələdiyyəsinin sədri Coşqun Əli oğlu Abdullayev də var. Coşqun müəllimi təbrik etmək üçün bələdiyyədə onunla görüşdük, təbrikdən sonra Mingəçevir bələdiyyəsinin gördüyü işlərlə də maraqlandıq. Qeyd edək ki, Mingəçevir bələdiyyəsi 12 dekabr 1999-cu ildə yaradılıb. Bələdiyyənin mülkiyyətində iki park, 8 fəvvarə vardır. Bələdiyyənin büdcəsinə uyğun olaraq, park və fəvvarələrdə, məhəllələrdə tikinti-abadlıq işləri aparılır. Məhəllələrin problemlərinin müəyyənləşdirilməsi və həll edilməsi məhəllə komitələri vasitəsilə həyata keçirilir. Hazırda bələdiyyənin şəhərin müxtəlif ərazilərini əhatə edən 90 məhəllə komitəsi var.

“Öncə qeyd edim ki, mən 1999-cu ildən bələdiyyə üzvüyəm. Bələdiyyə seçkilərində bələdiyyə üzvlüyünə namizədliyimi vermişəm və seçilmişəm. 2009-cü ildən bələdiyyə sədrinin müavini vəzifəsində çalışmışam, 2013-cü ilin dekabr ayının 9-dan isə Mingəçevir Bələdiyyəsinə sədr seçilmişəm. Əsası ulu öndər Heydər Əliyev tərəfindən qoyulan, möhtərəm Prezidentimiz İlham Əliyev cənabları tərəfindən uğurla davam etdirilən inkişaf strategiyası bu gün də öz bəhrəsini verir. Belə ki, həyata keçirilən irimiqyaslı islahatlar, məqsədyönlü şəkildə reallaşdırılan və ölkəmizin sosial-iqtisadi inkişafında mühüm rol oynayan dövlət proqramının uğurlu icrası nəticəsində əhalinin yaşayış səviyyəsi yüksəlir, yerli idarəetmənin mövqelərini möhkəmləndirir, bələdiyyələrin də fəaliyyətinin müasir səviyyədə qurulmasını tələb edir. Ötən ilin dekabrında keçirilmiş seçkilər nəticəsində bələdiyyələrə iş təcrübəsinə, yüksək peşəkarlıq səviyyəsinə və müasir düşüncəyə malik üzvlərin seçilməsi bələdiyyələrin gələcək inkişafına zəmin yaradır”, - deyə qeyd edən müsahibimiz layiq görüldüyü mükafatın bələdiyyə sədrlərinin 6 ay ərzində gördükləri işlərin nəticəsinə uyğun olaraq verildiyini vurğuladı: “Bələdiyyə sədri seçildikdən bir az sonra öz işimizdə güclü dönüş yaratdım. Belə ki, əvvəlcə, vətəndaşlarla görüşlər keçirdik. Onları narahat edən problemlərlə yaxından tanış olduq. Məhəllə komitələrinin gördüyü işlərə baxış keçirdik. Həmin komitələrin müraciətləri əsasında reallaşan layihəyə görə məhəllələrdə xeyir-şər yerlərinin tikintisi üçün inşaat materialları alınıb və sakinlər tərəfindən təmir işləri aparılıb. Hazırda iki məhəllədə yeni mağar tikilir”.

“Digər gördüyümüz iş bələdiyyənin mülkiyyətində olan, icarəyə verilmiş torpaqlardan vergilərin yığılmasıdır” - sözləri ilə söhbətini davam etdirən Bələdiyyə sədri bildirdi ki, əmlak vergisi hələ də problem olaraq qalır: “Demək olar ki, bu bütün respublika bələdiyyələrinin ümumi bəlasıdır. 2012-13-cü illər ərzində mövcud olmuş əmlak vergisi ilə bağlı problemlərimiz qalmaqdadır. Son altı ayda əmlak vergisindən 4 min 600 manat pul yığa bilmişik. Mən elə başa düşürəm ki, bu, respublikada ən yüksək göstəricidir. Məhəllələrdə mağarların yenidən qurulması, təmiri və tikintisinə 16 min manatdan artıq vəsait ayırmışıq. Bir sözlə, işlərimizi günün tələbinə uyğun qururuq və çalışırıq ki, şəhər bələdiyyəsi olaraq üzərimizə düşən işin öhdəsindən gələk. Mingəçevir şəhərində aparılan abadlıq işlərində də bələdiyyənin üzərinə çoxlu işlər düşür. Çalışırıq ki, bu işlərin də öhdəsindən gələk”.

“30 ildən artıqdır ki, Mingəçevir şəhərində yaşayıram”

“Bələdiyyələr vətəndaşlara aid bütün sosial məsələlərlə məşğul olmalıdırmı?” - sualmıza bələdiyyə sədrinin cavabı belə oldu: “30 ildən artıqdır ki, mən Mingəçevirdə yaşayıram. Demək olar ki, şəhərdə hamını tanıyıram. Bizə aid olan-olmayan, hər hansı bir problem olur-olsun çalışıram ki, vətəndaşlarla bir bələdiyyə sədri kimi yox, bir vətəndaş kimi dil tapım. Bütün idarə, müəssisə təşkilatlarla ilə qarşılıqlı işləyirik. Hər hansı bir problem yaşanarsa, onlardan xahiş edirik və bu işdə bizə onlar da yardımçı olurlar. Onu da deyim ki, bizi ən çox narahat edən problemlərdən biri də mədən vergiləri ilə bağlıdır. Mingəçevirdə 10-a yaxın qum-çınqıl karxanası fəaliyyət göstərir, onlardan ancaq 1-2-si bizimlə qarşılıqlı işləyir. Vaxtlı-vaxtında hesabatlarını da verirlər. Yerdə qalanlarla isə dil tapa bilmirik. Demək olar ki, onlar hər gün öz işlərini görürlər, lakin heç bir vergi ödəmirlər. Onlar barədə heç bir tədbir görülmür, bununla bağlı vətəndaşlardan da bizə şikayətlər daxil olur. Bir neçə gün öncə bir daha 5 karxanaya məktubla müraciət etmişik, lakin heç bir səs-səda yoxdur. Dəfələrlə məhkəməyə də müraciət etmişik, onların borclarına dair məhkəmənin qərarları da var, lakin həmin borcları yığa bilmirik. Texnikalarına da həbs qoymaq mümkün deyil. Çünki bizə sənəd təqdim edirlər ki, işlətdikləri texnikanı icarəyə götürüblər. Bu günlərdə karxanaların mühasiblərini dəvət edib, söhbətlər aparmışıq, əgər söhbətimiz alınmasa, məcburuq ki, yenidən məhkəmə orqanlarına müraciət edək”.

Zaman.- 2014.- 15 iyul.- S. 6.