Qəbələ sosial-iqtisadi inkişafın yeni mərhələsində

Qəbələ rayonunda 2014-cü ilin I yarısında sosial-iqtisadi inkişaf sahəsində görülmüş işlərə dair geniş hesabat yığıncağı keçirilib.

Rayon İcra Hakimiyyətinin (RİH) başçısı Səbuhi Abdullayev bildirib ki, rayonun ictimai həyatında baş verən əsas əlamətdar hadisə Prezident İlham Əliyevin 2014-cü ilin yanvar ayının 3-də Qəbələyə gəlişi və “Tufan” Dağ-Xizək Yay-Qış İstirahət Kompleksinin birinci mərhələsinin açılışında iştirak etməsidir. Azərbaycan hökuməti və Dünya Bankının maliyyə dəstəyi əsasında Qəbələ şəhərinin su təchizatı və kanalizasiya sisteminin yenidən qurulması istiqamətində 1-ci mərhələ üzrə işlərin tamamlandığını söyləyən S.Abdullayevin sözlərinə görə, 2-ci mərhələ üzrə tikinti işləri davam etdirilib. Rayonun “Qaraçay”, “Duruca” su mənbələrində yerləşən anbarlar lil və qumdan təmizlənib, cari təmir işləri görülüb. Şəhərin küçələrində aparılan abadlıq işləri ilə əlaqədar mövcud su təchizatı və kanalizasiya xətlərində müxtəlif diametrli borular dəyişdirilib, təmir-bərpa işləri aparılıb. 2014 -cü ilin ikinci yarısında “Mirzəbəyli - Çuxur Qəbələ - Dizaxlı - Çarxana avtomobil yolunun əsaslı təmiri”, Daxili İşlər Nazirliyi Daxili Qoşunların N saylı alayı, cipsi istehsalı müəssisəsi, limonad istehsalı müəssisəsi, kartof soyuducu anbarı, Çuxur Qəbələ kəndində “Çuxur Qəbələ Arxeleoji Araşdırmaların Tədqiqat Mərkəzi” obyektlərində tikinti işləri başa çatdırılıb və Qəbələ şəhər 5 saylı tam orta məktəb binası, YAP Qəbələ rayon şöbəsinin inzibati binası, “Qafqaz Thermal Hotel” binası, Bum qəsəbəsində “Stend və ox atıcılığı “ kompleksi, Yengicə kəndində 80 şagird yerlik ümumi orta məktəb binası və Ziring kəndində 220 şagird yerlik ümumi orta məktəb binası obyektlərində son tamamlanma işləri aparılır. Qeyd olunub ki, hazırda Qəbələ Futbol Akademiyası və stadionlar kompleksi, Dəmiraparan çayı üzərində 10 aşırımlı dəmir-beton körpü, “Aquapark” istirahət kompleksi, “Qolf klub” kompleksi, “Tufandağ” dağ xizək yay-qış istirahət kompleksi, səfərbərlik və hərbi xidmətə çağırış üzrə Dövlət Xidmətinin rayon şöbəsinin inzibati binası, yeni 3 ulduzlu otel binası, rayon məhkəməsinin inzibati binası, Savalan kəndində “Raftinq Mərkəzi”, “Laza” sərhəd zastavası, Nohur gölü ərazisində müalicəvi sanatoriya obyektlərində tikinti quraşdırma işləri davam etdirilir.

RİH başçısı qeyd edib ki, 2014-cü ildə Qəbələ Peşə Məktəbinin yeni binasının, rayon mərkəzi xəstəxanası kompleksinin, Xarici Dillər Universitetinin Qəbələ Filialının, Gömrük Akademiyasının, Turizm Akademiyası, “ASAN xidmət”in Qəbələ rayon filialının inzibati binasının, 37 hektar ərazidə yeni şəhərciyin, Yengicə su anbarının, “Hərbi Vətənpərvərlik və Mütəxəssis Hazırlığı Cəmiyyəti” MMC-nin Qəbələ Rayon Şöbəsinin inzibati binasının, Soltannuxa kəndi və Qəbələ şəhərində elektrik yarımstansiyalarının, Qəbələ şəhərində 2 ədəd 100 yerlik uşaq bağçası və rayon prokurorluğunun inzibati binası obyektlərinin tikintisinə başlanılması nəzərdə tutulub. Tədbirdə qeyd olunub ki, 2014-cü ilin birinci yarısında yaşayış məntəqələri üzrə RİH başçısının 20 səyyar görüş-qəbulu keçiriliB, qəbullarda 2865 nəfər vətəndaş iştirak edib. Yekunda Səbuhi Abdullayev idarə, təşkilat və müəssisə rəhbərlərinə cari tapşırıqlarını və tövsiyələrini verib.

Pərviz Əliyev

Zaman.- 2014.- 22 iyul.- S. 6.