Bakıda Azərbaycan vikipediyaçılarının birinci milli forumu keçirilib

Dünən Bakıda “Vikipediya” virtual ensiklopediyası Azərbaycanda: problemlər və perspektivlər” mövzusunda Azərbaycan vikipediyaçılarının birinci milli forumu keçirilib.

Tədbirdə çıxış edən Milli Məclisin deputatı Aydın Mirzəzadə “Vikipediya”nın məlumat mənbəyi olmaqla yanaşı, həmdə siyasi mübarizə müstəvisi olduğunu deyib. Onun sözlərinə görə, hazırda bir gündə Azərbaycan dilində orta hesabla 20 məqalə hazırlanır ki, bu da il ərzində 6 min məqalə deməkdir: “Bu azdır. Biz “Vikipediya” hərəkatını cəmiyyətin daxilinə yeridə bilməmişik. Çox yaxşı olardı ki, “Vikipediya”ya elm və təhsil müəssisələri qoşulsun, universitetlərdə “Vikipediya qrup”ları yaradılsın. Mətbuat da virtual ensiklopediya ilə bağlı məlumatlara yer ayırmalıdır. Bu bir ziyalı fəaliyyətidir”.

Xəzər Universitetinin təsisçisi, professor Hamlet İsaxanlı Azərbaycanda “Vikipediya” hərəkatının gec başladığını deyib. Onun sözlərinə görə, Azərbaycan “Vikipediya”ya qoşulduğu ilk vaxtlarda müsəlman ölkələri arasında 5-ci yerdə idi: “Amma getdikcə bu proses zəiflədi. Bu işi canlandırmaq üçün kütləvilik lazımdır. Bunun vacibliyi məsələsini tələbələr arasında geniş yaymaq lazımdır”. Azərbaycan Milli Elmlər Akademiyası (AMEA) İnformasiya Texnologiyaları İnstitutunun əməkdaşı İradə Ələkbərova çıxışında vikicəmiyyət haqqında danışıb. O bildirib ki, hazırda Azərbaycandan “Vikipediya”da 70 min insan qeydiyyatdan keçib, amma buna baxmayaraq, məqalələrin sayı çox azdır: “Materialların sayını artırmaq üçün vikicəmiyyəti fəallaşdırmaq lazımdır. Alimlər və tələbələr birlikdə fəaliyyət göstərməlidirlər. Vikicəmiyyətin formalaşması üçün seminarlar, simpoziumlar vasitəsilə diqqət cəlb etmək lazımdır. Azərbaycanda vikimaniya konfransı keçirməklə bütün dünyanın vikipediyaçılarını Bakıya toplamaq olar”.

AMEA-nın İnformasiya Texnologiyaları İnstitutunun digər əməkdaşı Rasim Mahmudov da Azərbaycanda Vikipediya fəaliyyətinin zəif olduğunu qeyd edərək, gəncləri bu işə fəal qoşulmağa dəvət edib.

Zaman.-2014.-11 mart.-S.7.