Kürdəmirdə “İlin rayonu” mükafatının təqdimatı keçirildi

Kürdəmir rayonunun Gənclər Evində Rayon İcra Hakimiyyətinin və Azərbaycan-Slavyan Gəncləri Assosiasiyasının təşkilatçılığı ilə “Milli dirçəlişin banisi - Heydər Əliyev” mövzusunda konfrans və “İlin rayonu” mükafatının təqdimat mərasimi keçirilib.

Konfransda Kürdəmir Rayon İcra Hakimiyyətinin başçısı Ceyhun Cəfərov çıxış edərək, ulu öndər Heydər Əliyevin fəaliyyəti haqqında geniş tarixi arayış verdi. Daha sonra Azərbaycan-Slavyan Gəncləri Assosiasiyası İctimai Birliyinin təsisçisi və sədri Səbuhi Abbasov çıxış edərək, ulu öndər Heydər Əliyevin ikinci dəfə hakimiyyətə qayıdışının Azərbaycan gəncliyinin həyatında yeni bir səhifə açdığını dedi: “Bu qayıdış Azərbaycan xalqını xaosdan xilas etdi. Ulu öndərin həyata keçirdiyi islahatlardan ən vacibi Gənclər Proqramının hazırlanması və tətbiqi oldu. Bu, gəncliyimizin gələcəyinin xilası idi”. S. Abbasov Heydər Əliyev Fondunun prezidenti Mehriban xanım Əliyevanın təşəbbüsü ilə həyata keçirilən layihələrin tək Azərbaycanda deyil, bütün dünya miqyasını əhatə etdiyini söylədi. Səbuhi Abbasov keçirilən sorğu əsasında Kürdəmirin “İlin rayonu” seçildiyini dedi və bu münasibətlə təbriklərini çatdırdı: “Bu sorğunun keçirilməsində əsas məqsəd Qeyri- hökumət təşkilatları ilə dövlət təşkilatları arasında münasibətlərin daha da yaxşılaşdırılmasından ibarətdir. Fürsətdən istifadə edib Kürdəmir Rayon İcra Hakimiyyətinin başçısını və rayon ictimaiyyətini təşkilatımız adından təbrik edirik. Kürdəmir rayonunun QHT-lərə, bütövlükdə Vətəndaş Cəmiyyətinə münasibəti olduqca təqdirəlayiqdir”. Daha sonra rayon fəal gəncləri - Elnur Məmmədli, Xəyalə Veyisova, Məhəmməd Heydərli çıxış etdilər. Sonda bir qrup kürdəmirli gənc Azərbaycan-Slavyan Gəncləri Assosiasiyası tərəfindən sertifikatla təltif olundu. Pərviz Əli

Zaman.-2014.-18 noyabr.-S.7.