Şirvan şəhərində İmadəddin Nəsiminin 645 illiyi keçirildi

Şirvan Şəhər Mərkəzi Kitabxanasında böyük Azərbaycan şairi İmadəddin Nəsiminin (1369-1417) 645 illiyi ilə əlaqədar “Mən də sığar iki cahan...” adlı ədəbi-bədii gecə keçirildi.

Tədbirdə şəhər 16 saylı məktəbin şagirdləri, müəllimləri və mədəniyyət işçiləri iştirak etdilər. Tədbiri giriş sözü ilə açan jurnalist Yaqut Hüseynova qeyd etdi ki, artıq 600 ildir ki, böyük Azərbaycan şairi İmadəddin Nəsiminin adı Yaxın Şərqdə mərdlik, fədakarlıq və iradə rəmzi kimi hörmətlə çəkilir. Heydər Əliyev Mərkəzinin əməkdaşı Aynur Fərzəliyeva çıxışında dahi Azərbaycan şairi Nizami Gəncəvinin Yaxın Şərq ədəbiyyatına gətirdiyi ümumbəşəri ideyaları davam və inkişaf etdirən bu böyük sənətkar-insana, onun qüdrətinə olan yüksək inamını tərənnüm edərək, şeirlərində insanı həyati gözəlliklərin əsl mənbəyi kimi vəsf etdiyini xüsusi olaraq vurğuladı. Sonda 1973-cü ildə çəkilmiş “Nəsimi” ( ssenari müəllifi İsa Hüseynov, quruluşçu rejissor Həsən Seyidbəyli)” filmi nümayiş olundu. “Nəsimi-645” başlıqlı kitab sərgisi tədbir iştirakçıları tərəfindən maraqla qarşılandı.

Babək Əsgər

Zaman. - 2014.- 2 oktyabr.- S. 7.