Azad mətbuatın hüquqi dövlət quruculuğunda önəmi

Əvvəli ötən sayımızda...

Azərbaycanda mətbuat, söz, fikir azadlıqlarının, media siyasətinin dövlətimizin prioriteti səviyyəsinə qaldırılmasının və hüquqi dövlət quruculuğunun daha bir nümayişi o dövrdə Heydər Əliyev tərəfindən qəzet və jurnalların “Azərbaycan” nəşriyyatına olan borclarının dondurulması və ləğvi ilə bağlı imzaladığı sərəncam oldu. Bununla bağlı Heydər Əliyev demişdi ki, bizim ümumi məqsədimiz mətbuata daha çox azadlıq verməkdən, söz azadlığını daha geniş təmin etməkdən, Azərbaycanda demokratiyanı bütün sahələr üzrə inkişaf etdirməkdən ibarətdir. Azərbaycanda hüquqi dövlət quruculuğu prosesinin uğurla davam etdirilməsi və bu çərçivədə də ölkəmizdə sivil medianın, azad sözün, milli mətbuatın daha da inkişaf etdirilməsi sahəsindəki xidmətlərinə görə Heydər Əliyev 2002-ci ildə “Jurnalistlərin dostu” mükafatına layiq görüldü.

Sonrakı illərdə də azad mətbuat hüquqi dövlətin quruculuğunda prioritet sahə olaraq qalmaqda davam etdi. Hüquqi dövlət quruculuğu müstəvisində söz, fikir azadlıqlarının, müstəqil mətbuatın inkişaf etdirilməsinə dövlət səviyyəsində göstərilən qayğı, yeni media siyasəti ölkəmizin MDB-nin ən demokratik dövlətlərindən birinə çevrilməsinə yol açdı. Bununla belə hadisələrin gedişi göstərdi ki, hüquqi dövlət quruculuğu prosesi zamanı mətbuat, söz azadlığı, fikir plüralizminin inkişaf etdirilməsinə baxmayaraq, müəyyən neqativ halları tam şəkildə aradan qaldırmaq olmur. Bu da öz növbəsində mətbuatın özünü-tənzimləmə mexanizminin formalaşdırılması və hüquqi dövlət quruculuğu prosesinin daha da sürətləndirilməsi üçün elektron KİV sahəsində dövlətin tənzimləyici funksiyasın həyata keçirməsini zərurət kimi ortaya çıxardı. Məsələ ilə bağlı bir qrup jurnalistin Prezident Heydər Əliyevlə görüşündən və problemi onunla müzakirəsindən sonra, 2003-cü ildə mətbuatda özünütənzimləmə mexanizmini həyata keçirən Mətbuat Şurası yaradıldı. Bununla da müstəqil KİV-lərin fəaliyyətinin genişləndirilməsi təmin edildi. Bu da öz növəsində mətbuatın hüquqi dövlət quruculuğu prosesinə öz töhfəsini verməsi və xalqla dövlət arasında mətbuatın birləşdirici funksiyasını uğurla yerinə yetirməsi ilə müşahidə olunmaqdadır.

***

Azərbaycanda hüquqi dövlət quruculuğu sahəsində həyata keçirilən tədbirlər və bu müstəvidə mətbuatın oynadığı böyük rol, həmçinin söz, fikir azadlıqlarının inkişaf etdirilməsi və media siyasətinin dövlətin prioritet sahəsi olaraq qalması Heydər Əliyevin vəfatından sonra da davam etdirildi. Belə ki, Heydər Əliyevin vəfat etməsindən sonra Azərbaycanı idarə etməyə başlayan İlham Əliyev ilk günlərdən demokratik və hüquqi dövlət quruculuğunun ən önəmli vasitəsi olan azad mətbuatın inkişafına yönəlmiş media siyasətini davam etdirdi. 2005-ci ildən başlayaraq hüquqi dövlət quruculuğunun yeni zirvələrə daşınmasına xidmət edən KİV-lərin maddi-texniki bazasının möhkəmləndirilməsi, jurnalistlərin əməyinin qiymətləndirilməsi istiqamətində müəyyən tədbirlər həyata keçirilməyə başlandı. Bu baxımdan Prezident İlham Əliyev tərəfindən imzalanan sərəncamla Azərbaycan Respublikası Prezidentinin yanında Kütləvi İnformasiya Vasitələrinin inkişafına Dövlət Dəstəyi Fondunun yaradılması mətbuata dövlət dəstəyinin və qayğısının növbəti nümayişinə çevrilərək ölkəmizdə hüquqi dövlət quruculuğunun aynası olan jurnalistikanın inkişafına yeni bir təkan verərərək sivil və demokratik dövlət quruculuğunda təsiredici gücə çevrildi. Bu da KİV-lərin maddi-texniki bazasının möhkəmləndirilməsinə, jurnalist peşəkarlığının artırılmasına, onların əməklərinin qiymətləndirilməsinə və buna paralel olaraq onların hüquqi dövlət quruculuğu prosesində daha yaxından iştirak etməsinə yol açıb. Azərbaycanda hüquqi dövlət quruculuğunda mətbuatın oynadığı əvəzsiz rola dövlət tərəfindən verilən yüksək qiymətindaha bir nümayişi isə Azərbaycan mətbuatının yubleyinin hər il yüksək səviyyədə keçirilməsi ilə əlaqədardır. Belə ki, dövlət tərəfindən fikir, söz azadlıqlarının təmini və media siyasəti sahəsində həyata keçirilən uğurlu tədbirlərdən biri də Azərbaycan mətbuatının illik yubleyləri ilə əlaqədar KİV-lərin mükafatlandırılması, jurnalistlərin Prezident təqaüdünə, dövlət mükafatı və fəxri adlara layiq görülməsidir.

Yeri gəlmişkən onu da qeyd edək ki, ötən ilin iyul ayında keçirilən Azərbaycan jurnalistlərinin VI qurultayının iştirakçılarına ünvanladığı təbrik məktubunda İlham Əliyev media siyasətinin dövlətin aparıcı sahələrindən biri olaraq qalmaqda davam edəcəyini, gələcəkdə də milli mətbuatımızın inkişafı üçün kompleks tədbirlərin həyata keçiriləcəyini bildirib.

Bu müstəvidə də dövlət tərəfindən evsiz jurnalistlər üçün yaşayış binasının tikilməsi və 22 iyul Milli Mətbuat Günündə onlara mənzillərin paylanması ilə Azərbaycan hüquqi dövlət quruculuğu sahəsində dünyada bir ilkə imza ataraq, media siyasətinin dövlətimizin ayrılmaz atributlarından birinə çevrildiyini, ölkəmizin demokratik dəyərlərə sadiq olduğunu bir daha təsdiq etmiş oldu. Amma bu da son deyil. Belə ki, hüquqi dövlət quruculuğu ilə bağlı həyata keçirilən tədbirlərə uyğun olaraq mediaya dövlət qayğısını diqqət mərkəzində saxlayan Prezident İlham Əliyev ötən il “Azərbaycan mətbuat işçilərinin sosial müdafiəsinin gücləndirilməsinə dair əlavə tədbirlər haqqında” daha bir sərəncam imzaladı . Sərəncama əsasən, mənzilə ehtiyacı olan jurnalistlər üçün daha bir yaşayış binası tikilir. Ölkənin iqtisadi qüdrətinin artmasından irəli gələn belə addımlar bir daha təsdiqləyir ki, bütün sahələrin kompleks şəkildə inkişafı, tərəqqisi dövlətin həyata keçirdiyi siyasətin əsasını təşkil edir, ən əsası hansı sahədə çalışmasından asılı olmayaraq hər kəs hüquqi dövlət quruculuğu ilə bağlı ölkəmizin sürətli sivil inkişafını özünün gündəlik həyatında hiss edir.

***

Azərbaycanın dünyanın sivil və hüquqi dövlətinə çevrilməsi yönündə dövlət tərəfindən həyata keçirilən uğurlu islahatalar qeyd etdiyimiz kimi cəmiyyətin aparıcı sahələrindən və sivil inkişafın aynası olan azad mətbuatın dövlətçiliyimizin möhkəmləndirilməsində oynadığı rolun daha da artmasına gətirib çıxarıb. Bütün bunlar isə Azərbaycanda hüquqi, sivil dövlət quruculuğuna, azad mətbuatın inkişaf etdirilməsinə xidmət edən media siyasətinin gələcəkdə də uğurla həyata keçiriləcəyini göstərir. Azərbaycanda hüquqi dövlət quruculuğu prosesi çərçivəsində dövlət səviyyəsində söz, mətbuat azadlığının inkişafına mane olan əngəllərin aradan qaldırılması, Kütləvi İnformasiya Vasitələrinin inkişaf etmiş ölkələrin səviyyəsinə çatdırılması yönündə həyata keçirilən tədbirlər ölkəmizin informasiya blokadasından xilas edilməsində, onun dünyada hüquqi dövlət kimi özünü tanıtmasında, sübut etməsində böyük rol oynadı. Bütün bunlar isə Azərbaycanda hüquqi dövlət quruculuğunun yeni inkişaf mərhələsinə daxil olduğunu, söz, fikir azadlıqlarının təmin edildiyini bir daha sübut etməkdədir.

Zaman.-2014.-29 oktyabr.-S.12.