Lerikdə ilk dəfə uzunömürlülərin yaradıcılıq festivalı keçirilib

Lerik rayonu uzunömürlülər diyarıdır. Təsadüfi deyil ki, dünyanın ən unikal muzeylərindən olan Uzunömürlülər muzeyi də məhz Lerikdə yerləşir. Azərbaycanın ən uzunömürlü sakini olan 168 il yaşamış Şirəli Müslümov da Lerikdəndir. Nəhayət, bu insanların şərəfinə həsr olunan çoxdan gözlənilən festifal keçirildi.

Mədəniyyət və Turizm Nazirliyinin Lerik Rayon İcra Hakimiyyəti ilə birgə təşkil etdiyi festival çərçivəsində əvvəlcə Respublika Kulinariya Mərkəzinin təşəbbüsü ilə plov yarışması oldu. Plov yarışmasının sonunda qaliblərə mükafatlar və fəxri fərmanlar təqdim edildi. Festivalda iştirak edən mədəniyyət və turizm naziri Əbülfəz Qarayevi, millət vəkillərini, Lerik rayon rəhbərliyini və ictimaiyyət nümayəndələrini uzunömürlülərdən ibarət folklor qrupları maraqlı ifaları ilə qarşılayıblar. Sonra nazir uzunömürlülərlə səmimi söhbətlər aparıb, onların festival barədə xoş sözlərini dinləyib. Nazir və digər qonaqlar Lerik rayonunda yaşamış uzunömürlülərin foto sərgisi ilə tanış olub, rayonun tarixini, etnoqrafiyasını özündə əks etdirən kitablara, əl işlərinə, musiqi alətlərinə və digər yaradıcılıq nümunələrinə baxış keçiriblər. Uzunömürlülər və ictimaiyyət nümayəndələrinin iştirakı ilə festival öz işinə başlayıb. Festivalı açıq elan edən Lerik Rayon İcra Hakimiyyətinin başçısı Rövşən Bağırov qonaqları və festival iştirakçılarını salamlayıb, tədbirə uğurlar arzulayıb. Festivalda çıxış edən mədəniyyət və turizm naziri Əbülfəz Qarayev ölkəmizdəki inkişafdan danışaraq deyib: “Bu gün regionlarda abadlıq işləri aparılır, yollar asfaltlanır, ucqar rayonlara, kəndlərə qaz xətləri çəkilir. Müstəqil Azərbaycanın tarixində ilk dəfə təşkil olunan bu festival respublikamızın uzunömürlülər diyarı kimi təbliğ edilməsi, ahıl insanların yaradıcılıq potensialının üzə çıxarılması və stimullaşdırılması, regionlararası mədəniyyət mübadiləsinin gücləndirilməsi məqsədini daşıyır”. Festifalda Astara, Lənkəran, Lerik, Yardımı, Masallı, Cəlilabad, Biləsuvar, Salyan, Balakən və İsmayıllı rayonlarının folklor kollektivləri, xalq tətbiqi sənətinin biliciləri, uzunömürlülərdən ibarət folklor kollektivləri, paytaxtdan gəlmiş incəsənət ustaları maraqlı konsert proqramı ilə çıxış ediblər, tanınmış aktyorlar uzunömürlülər qarşısında duzlu, məzəli səhnəciklər göstəriblər.

MƏRDAN QURBANOV

Zaman. - 2014.- 10 sentyabr.- S. 6.