“ADEX 2014” Azərbaycanın dünyada artan nüfuzunun göstəricisidir”

“Qafqaz regionunda ilk dəfə Azərbaycanda keçirilən “ADEX 2014” I Azərbaycan Beynəlxalq Müdafiə Sənayesi Sərgisində 34 dövlətdən 200 şirkət və 22 rəsmi nümayəndə heyəti iştirak edəcək.

Bu, o deməkdir ki, Azərbaycan Respublikası inkişaf etmiş və güclü dövlət kimi özünü sübut edib”. Bunu müdafiyə sənayesi nazirinin müavini Yəhya Musayev “ADEX 2014” I Azərbaycan Beynəlxalq Müdafiə Sənayesi Sərgisi münasibətilə dünən keçirdiyi mətbuat konfransında bildirdi. Müdafiə sənayesi sərgilərinin dünyanın ancaq inkişaf etmiş ölkələrində keçirildiyinə diqqət çəkən nazirlik rəsmisi qeyd etdi ki, Azərbaycan postsovet məkanında belə sərginin keçirildiyi 4-cü ölkədir: “Postsovet məkanında müdafiə sənayesi sərgiləri Azərbaycandan əvvəl Rusiya, Belarusiya və Qazaxıstanda keçirilib. Amma “ADEX 2014” I Azərbaycan Beynəlxalq Müdafiə Sənayesi Sərgisi iştirakçı şirkətlərin sayının çoxluğu baxımından əvvəlki sərgilərdən ciddi şəkildə fərqlənir. Azərbaycanın və xarici ölkələrin dövlət orqanları, biznes dairələri və sənaye strukturları tərəfindən “ADEX 2014” sərgisinə göstərilən böyük maraq bu tədbirin aktuallığını və region üçün əhəmiyyətini sübut edir. Belə ki, sərgidə Azərbaycan, Türkiyə, Rusiya, Belarus, Koreya, Polşa, İsrail və Ukraynanın 8 milli qrupu öz ekspozisiyalarını nümayiş etdirəcəklər”. Onun sözlərinə görə, Azərbaycan, Türkiyə (37 şirkət), Polşa (16 şirkət), İsrail (16 şirkət) və Belarus (16 şirkət) öz irimiqiyaslı ekspozisiyaları ilə fərqlənirlər. Azərbaycan Müdafiə Sənayesi Nazirliyinin 2005-ci ildə Prezident İlham Əliyevin müvafiq sərəncamı ilə yaradıldığını xatırladan Y. Musayev bu illər ərzində bir çox nailiyyətlərin əldə olunduğunu ifadə etdi: “Bütün sənaye sahələrində müşahidə olunan iqtisadi inkişaf sayəsində Azərbaycan həm regional, həm də beynəlxalq bazarlarda mühüm aparıcı fiqur və strateji tərəfdaşa çevrilib. Ölkə rəhbərliyinin təşəbbüsü ilə həyata keçirilən layihələr regionda təhlükəsizlik və əməkdaşlığın inkişafına münasibət təsir göstərir. Həmçinin, Azərbaycanın hərbi sənaye kompleksi də bir sıra irimiqyaslı lahiyələr həyata keçirərək öz imkanlarını əsaslı şəkildə genişləndirib. Hazırda Azərbaycan 900 adda müxtəlif hərbi təyinatlı məhsul, o cümlədən bütün növ döyüş sursatı, müxtəlif texnika və silah istehsal edir. Azərbaycan Respublikası Müdafiə Sənayesi Nazirliyi bir çox ölkələrlə hərbi-texniki əməkdaşlığı sürətlə genişləndirir”. Məlumat üçün bildirək ki, “ADEX 2014” I Azərbaycan Beynəlxalq Müdafiə Sənayesi Sərgisində iştirakçı dövlətlərin sənaye müəssisələrinin əldə etdiyi ən yeni nailiyyətlərin nümayişi quru qoşunları və hərbi dəniz qüvvələrinin silah və texnikaları, aviasiya və aviasiya silahları, hava hücumundan müdafiə üzrə sistem və vasitələr, xüsusi təyinatlı vasitələr və əmlak, informasiya texnologiyaları, rabitə sistemləri, ordunun inzibati və texniki təminatı, kosmik texnologiyaları tematik istiqamətləri üzrə həyata keçiriləcək. Sərgi sentyabrın 11-13 tarixlərində Bakı Ekspo Mərkəzində təşkil olunacaq.

Zaman. - 2014.- 11 sentyabr.- S. 1-2.