Ramiz Mehdiyev tarixi həqiqətləri “Dağlıq Qarabağ: məxəzlərdən oxunmuş tarix” kitabında topladı

Azərbaycanın siyasi xadimi, Prezident Administrasiyasının rəhbəri, Azərbaycan Fəlsəfə və Sosial-Siyasi Elmlər Assosiassiyasının prezidenti, AMEA-nın həqiqi üzvü, AR-nın Həqiqi Dövlət Müşaviri, akademik Ramiz Mehdiyevin yeni kitabı işıq üzü görüb.

Dünən təqdimatı keçirilən “Dağlıq Qarabağ: məxəzlərdən oxunmuş tarix” adlı kitabda bir çox tarixi həqiqətlər öz əksini tapıb. Rus dilində çap olunan kitabda Azərbaycan-Ermənistan münasibətləri, Dağlıq Qarabağ regionunun tarixi və iki ölkə arasında baş verən münaqişənin tarixi kökləri araşdırılıb. Müəllif ilk növbədə bir neçə xarici dillərdə, eyni zamanda erməni dilində nəşr olunmuş mənbələrdəki faktlara istinad edərək Dağlıq Qarabağın ən qədim dövrlərdən Azərbaycanın tərkib hissəsi olduğu və burada Azərbaycan xalqının yaşadığı barədə tarixi həqiqəti rusdilli oxuculara çatdırır. Akademik R. Mehdiyev ermənilərin Şimali Azərbaycana 1828-ci ildən etibarən köçürülmə siyasəti nəticəsində gətirildiklərini sübut etməklə yanaşı, ən qədim tarixi keçmişə qayıdaraq Herodota, onlarla qədim Roma, yunan, erməni, Suriya, rus, ingilis və bir sıra elmi mənbələrdən bəhrələnərək ermənilərin Asiya qitəsinin də yerli əhalisi olmadığını, onların Kiçik Asiyaya kimmer tayfalarının təzyiqi ilə Balkan yarımadasından köçüb gəldiyini açıqlayır. Kitabda erməni etnosu və onun dili, əlifbası ayrı-ayrı dövrlərdə yunan, Suriya, İran mənşəli etnosların təsiri ilə və onların qarışığından yarandığı qeyd olunub.

Təqdimat mərasimində çıxış edən tarix elmləri doktoru, professor, AMEA A. Bakıxanov adına Tarix İnstitutunun direktoru, BDU-nun Qədim dünya və orta əsrlər tarixi kafedrasının müdiri, Milli Məclisin deputatı Yaqub Mahmudov kitabı tarix elminin mühüm bir nailiyyəti kimi dəyərləndirdi: “Bu kitab həqiqətən də bizim tarixşünaslığımız adına böyük qələbədir. Ona görə ki, müstəqillik dövründə tariximiz yeni inkişaf yoluna çıxıb. Bu dövr bizim tarixi saxtakarlıqdan, yalan məlumatlardan təmizlənmə və doğruları dünyaya çatdırma kimi dəyərləndirilir. Qeyd etmək istəyirəm ki, bu yolun təməli ulu öndər Heydər Əliyevin dəstəyi ilə qoyulub. “Kitabi-Dədə Qorqud”un 1300 illiyinin keçirilməsi ilə biz sübut etdik ki, biz min illər bundan əvvəl formalaşmış bir xalqıq və bizim qəhrəmanlıq eposumuz var. Bu baxımdan hesab edirəm ki, həmkarımız Ramiz Mehdiyevin sözügedən kitabı bizim Azərbaycan torpaqlarının ən qədim sakinləri olduğumuzu sübut edir. “Dağlıq Qarabağ: məxəzlərdən oxunmuş tarix” kitabının məhz Moskvada çap olunması xüsusilə sevindirici haldır. Çünki Rusiya erməni lobbisinin ən güclü olduğu ölkələrdən biridir. Buna görə də, bizim tarixi nailiyyətimizi rusdilli xalqların bilməsi vacibdir”.

XƏYALƏ SADIQOVA

Zaman. - 2014.- 11 sentyabr.- S. 3.