“Azərbaycanda hərbi sənaye çox inkişaf edib”

“Bizim iştirak etdiyimiz bir çox sərgidən daha mükəmməldir. Azərbaycan Prezidenti İlham Əliyevin də sərgini ziyarət etməsi bizi məmnun etdi. Biz Azərbaycanı güclü görmək istəyirik”. Milli silahlarımız ilə tanış olduqlarını bildirən Səlcuq Yaşar müdafiə sənayesi sahəsində Azərbaycanla hər cür əməkdaşlığa hazır olduqlarını ifadə etdi: “2003-cü ildən etibarən Azərbaycana gəlirəm. Bu illər ərzində Azərbaycanda bir çox sahələr ilə yanaşı hərbi sənaye də çox inkişaf edib. Azərbaycan müəssisələri ilə əməkdaşlığa maraqlıyıq”.

Artıq üçüncü gündür ki, Qafqaz regionunda ilk dəfə ölkəmizdə keçirilən “ADEX 2014” I Azərbaycan Beynəlxalq Müdafiə Sənayesi Sərgisi davam edir. 34 dövlətdən 200 şirkət və 22 rəsmi nümayəndə heyətin iştirak etdiyi sərgiyə vətəndaşların da marağı böyükdür. Sərgidə həm ziyarətçilərin, həm də xarici şirkətlərin ən çox diqqətini çəkən isə milli silahlarımızdır.

“Azərbaycan şirkətləri ilə bir çox sahələrdə əməkdaşlıq edirik”

Tədbir ilə bağlı fikirlərini “Zaman-Azərbaycan” qəzeti ilə bölüşən “Roketsan” şirkətinin müdiri Səlcuq Yaşar bildirdi ki, “ADEX 2014” I Azərbaycan Beynəlxalq Müdafiə Sənayesi Sərgisinin ilk dəfə keçirilməsinə baxmayaraq, yaxşı təşkil olunub: “Bizim iştirak etdiyimiz bir çox sərgidən daha mükəmməldir. Azərbaycan Prezidenti İlham Əliyevin də sərgini ziyarət etməsi bizi məmnun etdi. Biz Azərbaycanı güclü görmək istəyirik”. Milli silahlarımız ilə tanış olduqlarını bildirən Səlcuq Yaşar müdafiə sənayesi sahəsində Azərbaycanla hər cür əməkdaşlığa hazır olduqlarını ifadə etdi: “2003-cü ildən etibarən Azərbaycana gəlirəm. Bu illər ərzində Azərbaycanda bir çox sahələr ilə yanaşı hərbi sənaye də çox inkişaf edib. Azərbaycan müəssisələri ilə əməkdaşlığa maraqlıyıq”.

Sərgidə böyük stendlə iştirak edən şirkətlərdən biri də “Havelsan” idi. “Havelsan”nın nümayəndəsi Alparslan Kuloğlu bizimlə söhbətində “ADEX 2014” I Azərbaycan Beynəlxalq Müdafiə Sənayesi Sərgisinin önəmindən danışdı: “Azərbaycan bizim üçün çox önəmli ölkədir. Sərgidə iştirak edən ölkələrin və şirkətlərin çoxluğu bizə şərait yaradır ki, onlarla əməkdaşlığımızı genişləndirək”. Əsasən hərbi texnologiyalar üçün simuliyator sistemləri hazırladıqlarını ifadə edən A. Kuloğlu bir çox ölkələrlə yanaşı Azərbaycanla da sıx əməkdaşlıq etdiklərini bildirdi: “Azərbaycan şirkətləri ilə bir çox sahələrdə əməkdaşlıq edirik. Sizin şirkətlərdən biri ilə önəmli sahələrdən biri kiber təhlükəsizliyinin təmin edilməsi istiqamətində iş aparırıq”.

“Azərbaycan istehsalı olan silahlar tamamilə millidir”

Sərgidə ölkəmizin nümayiş etdirdiyi silahlarla bağlı Azərbaycan Respublikası Müdafiə Sənayesi Nazirliyinin Elmi-tətqiqat İnstitutunun müdiri Novruz Abdullayevdən ətraflı məlumat aldıq: “Müdafiə Sənayesi Nazirliyi 900 adda silah və sursat istehsal edir. Burada nümayiş olunan silahlar isə onların bir qismidir. Sevindirici haldır ki, artıq Müdafiə Sənayesi Nazirliyi ordumuzu bütün növ silah-sursat ilə təmin etmək iqtidarındadır”. Müdafiə Sənayesi Nazirliyinin hərbi aviasiya sahəsində də ciddi uğurlarının olduğunu dilə gətirən N. Abdullayev bunları əlavə etdi: “Bizim hazırladıqlarımız aviasiya bombaları parametrlərinə görə, dünyanın aparıcı ölkələrinə məxsus silahlardan heç də geri qalmır”. Müsahibimizin sözlərinə görə, Azərbaycan istehsalı olun silahlar tamamilə millidir: “Dünya təcrübəsi göstərir ki, hansısa silahın detallarından birini xaricdə hazırladan dövlətlər, tərəfdaş ölkə ilə hansısa fikir ayrılıqları yaşadıqları təqdirdə, müəyyən problem yaşayırlar. Buna görə də, bizim əsas hədəflərimizdən biri budur ki, istehsal etdiyimiz bütün avadanlıqlar tamamilə milli olsun”.

“Mübariz” snayper tüfəngimizi görəndə iftixar hissi keçirdim”

“Mübariz”, “Yalquzaq”, “Yırtıcı”, “İstiqlal” və digər silahlarımızla daha yaxından maraqlana vətəndaşlarımızdan biri də İlkin Əmirov idi. Azərbaycan stendində nümayiş olunan stendləri görüb çox sevindiyini dilə gətirən İ. Əmirov fikirlərini “Zaman-Azərbaycan” ilə bölüşdü: “Vətənimizin inkişafını, gücləndiyini görmək biz vətəndaşlar üçün çox qürur vericidir. Milli qəhrəmanımız Mübariz İbrahimov adına “Mübariz” snayper tüfəngimizi görəndə isə sözün əsl mənasında iftixar hissi keçirdim. Bütün bunlar Prezidentimiz İlham Əliyevin ordu quruculuğu siyasətinin doğruluğunun və uğurla həyata keçirildiyinin göstəricisidir”.

“Vətənimizi qorumaq üçün artıq milli silahlarımız var”

“ADEX 2014” I Azərbaycan Beynəlxalq Müdafiə Sənayesi Sərgisi ilə bağlı fikirlərini bizimlə bölüşən vətəndaşlardan biri də Sənan Şabanzadə idi: “Mən bu sərgiyə əsasən milli silahlarımıza baxmaq üçün gəlmişəm. Gördüklərim isə məni çox sevindirdi. Vətənimizi qorumaq üçün artıq milli silahlarımız var. İnanıram ki, işğal olunan torpaqlarımız da milli silahlarımız ilə daha tez azad olunacaq”.

ELVIN ƏLIYEV

Zaman. - 2014.- 13 sentyabr.- S. 9.