Şəkidə “Ər və arvad” musiqili komediyası səhnəyə qoyulub

Birinci Şəki Beynəlxalq Teatr Festivalının növbəti günü teatrsevərlər Şəki Dövlət Dram Teatrında Üzeyir Hacıbəylinin “Ər və arvad” musiqili komediyası əsasında səhnələşdirilmiş eyniadlı tamaşanı izləyiblər.

Mingəçevir Dövlət Dram Teatrının aktyorları ilk dəfə repertuarlarına daxil etdikləri “Ər və arvad” musiqili komediyasını oynayıblar. Mingəçevir Dövlət Dram Teatrının təqdim etdiyi tamaşanın quruluşçu rejissoru Xalq artisti Vaqif Əsədov, rəssamı Yusif İmamverdiyev, musiqi tərtibatçısı Elnur Rəsulovdur. Tamaşada əsas rolları Asim Məmmədov, Hüseyn Mustafayev, Fəridə Məmmədova, Firuz Hacıyev və başqaları ifa ediblər. Uğurla başa çatan tamaşanın sonunda kollektivə Mədəniyyət və Turizm Nazirliyi və Şəki Şəhər İcra Hakimiyyəti tərəfindən festivalın diplomları təqdim olunub.

Coşqun Mövlamov

Zaman. - 2014.- 18 sentyabr.- S. 6.