“Qəbələdə Olimpiya Atıcılıq Növləri üzrə Dünya Kubokunda təşkilatçılıq yüksək səviyyədədir”

Qəbələ rayonunda Olimpiya Atıcılıq Növləri üzrə Dünya Kuboku yarışlarının final mərhələsinin rəsmi açılış mərasimi keçirilib.

Qəbələ şəhərindəki Heydər Əliyev Konqres Mərkəzində təşkil olunan mərasimdə öncə Azərbaycanın Dövlət himni səsləndirilib. Tədbirdə “Qəbələ” İdman Klubunun prezidenti Tale Heydərov, gənclər və idman nazirinin müavini İsmayıl İsmayılov, Qəbələ Rayon İcra Hakimiyyətinin başçısı Səbuhi Abdullayev, Azərbaycan Atıcılıq Federasiyasının prezidenti Hafiz Cəfərov, Beynəlxalq İdman Atıcılıq Federasiyasının prezidenti Oleqario Vaskes Ranyan və baş katibi Frans Şrayber çıxış ediblər. Natiqlər Azərbaycanda idmanın maddi-texniki bazasının möhkəmləndirilməsi istiqamətində görülən işlərdən, ölkə Prezidenti cənab İlham Əliyev tərəfindən idmançılara göstərilən diqqət və qayğıdan, qazanılan uğurlardan danışıb, yarış iştirakçılarına uğurlar arzulayıblar.

“Qəbələ” İdman Klubunun prezidenti Tale Heydərov qeyd edib ki, Azərbaycan Olimpiya Atıcılıq Növləri üzrə Dünya Kuboku yarışlarına ev sahibliyi etməklə dinamik inkişaf edən idman ölkəsi kimi tanınmasına və olimpiya hərəkatına qoşulmasına böyük təkan verir.

Diqqətə çatdırılıb ki, ölkə Prezidenti cənab İlham Əliyevin yaxından dəstəyi ilə ölkəmizdə düzgün idman siyasətinin həyata keçirilməsi nəticəsində bu il birinci Avropa Oyunları məhz Azərbaycanda keçirilib. Avropa Oyunlarından sonra ən böyük yarış hesab olunan Atıcılıq üzrə Dünya Kuboku yarışlarının Qəbələdə keçirilməsi isə ölkəmizdə aparılan uğurlu idman siyasətinin ən böyük nailiyyətlərindəndir.

Natiq öz çıxışında qeyd edib ki, bu yarış Qəbələnin dünyada tanınmasına çox böyük töhfə verəcək. Mərasimdə diqqətə çatdırılıb ki, Milli Olimpiya Komitəsinin, Gənclər və İdman Nazirliyinin dəstəyi və “Qəbələ” Atıcılıq Klubunun, Azərbaycan Atıcılıq Federasiyasının təşkilatçılığı ilə keçirilən Dünya Kuboku yarışlarının final mərhələsində dünya reytinq cədvəlində xüsusi yer tutan olimpiya atıcılıq növləri üzrə 100-ə yaxın ölkədən 2 minə yaxın idmançı, eləcə də rəsmi qonaq və idman nümayəndəsi iştirak edir.

Məlumat verilib ki, Dünya Kuboku uğrunda yarışların 5 mərhələsi ötən bir il ərzində ABŞ, Almaniya, BƏƏ, Kipr və Meksikada keçirilib. Həmin yarışlarda xal toplayaraq dünya reytinqində yer tutan idmançılar Qəbələdə keçirilən dünya kuboku uğrunda yarışların final mərhələsində iştirak etmək hüququ qazanıblar. Yarışların 6-cı mərhələsi, yəni final görüşləri avqust ayının 16-dək Qəbələdə keçiriləcək. Bu yarışlar 2015-ci il ərzində Beynəlxalq İdman Atıcılıq Federasiyasının təqvim planında Avropa və Dünya çempionatından sonra ən mühüm yarış hesab olunur.

Yarışlara Qəbələ Stend və Ox Atıcılığı Kompleksində start verildi. Atıcılığın 17 növü üzrə keçirilən bu yarışlarda idmançılar 2016-cı ildə Braziliyanın Rio-de-Janeyro şəhərində keçiriləcək Yay Olimpiya Oyunları üçün 34 lisenziya uğrunda mübarizə aparır. Yarışlar Beynəlxalq İdman Atıcılıq Federasiyasının rəsmi televiziya kanalı olan “ISSF TV” vasitəsi ilə canlı yayımlanır.

Çıxışlardan sonra Beynəlxalq İdman Atıcılıq Federasiyasının prezidenti Oleqario Vaskes Ranyan Dünya Kuboku yarışlarının rəsmi açılışını elan edib və federasiyanın himni səsləndirilib.

Tədbir möhtəşəm konsert proqramı ilə davam etdirilib.

“İlk dəfədir ki, Azərbaycana gəlirəm. Burada gördüklərim məni, sadəcə, heyran edib”. Bunu atıcılıq üzrə Rusiya millisinin üzvü Kira Mozqalova deyib. Qəbələdə keçirilən Dünya Kubokunda 25 metr məsafədən atəş açmaqda qüvvəsini sınayan Mozqalova Atıcılıq Mərkəzini tərifləyib: “möhtəşəm Atıcılıq Mərkəzində mübarizə aparırıq. Belə idman qurğuları heç bizdə yoxdur. Təşkilatçılıq yüksək səviyyədədir. Komandamızın bütün üzvləri Qəbələdən məmnun qalıb. Yalnız havanın isti olması bir az çətinlik yaradır. Lakin deyirlər ki, Bakı buradan da istidir. Bunu nəzərə alsaq, hava problemi ciddi deyil. Həm də ki biz yarışdan iki həftə əvvəl Qəbələyə gəlmişik. Burada təlim-məşq toplanışı keçdik. Artıq havaya uyğunlaşdıq”.

Rusiyalı idmançı yarışla bağlı hədəfini də açıqlayıb: “Azərbaycana yaxşı nəticə göstərməyə gəlmişəm. Bacardığım qədər Olimpiya lisenziyası üçün mübarizə aparacağam. Hədəfim mükafatçılar sırasına düşməkdir. Təəssüf ki, startda o qədər də uğurlu çıxış edə bilmədim. Amma çalışacağam ki, vəziyyəti düzəldim”.

Qeyd edək ki, Qəbələ Stend və Ox Atıcılığı Kompleksində keçirilən Olimpiya Atıcılıq Növləri üzrə Dünya Kuboku yarışları davam edir. Avqustun 9-da kişilər arasında dairəvi səngər stend atıcılığı üzrə keçirilən yarışlarda 108 idmançı mükafat uğrunda mübarizə aparıb. İkiqat Olimpiya çempionu Vincent Hankok (ABŞ) birinci, Sebastian Kuntşik (Avstiya) ikinci, Qabriele Rossetti (İtaliya) üçüncü yeri tutublar. İlk iki yeri tutan idmançılar gələn il Braziliyada keçiriləcək Yay Olimpiya Oyunlarına lisenziya qazanıblar. İdmançılara medalları gənclər və idman nazirinin müavini İsmayıl İsmayılov və Beynəlxalq İdman Atıcılıq Federasiyasının baş katibi Frans Şrayber təqdim ediblər.

Olimpiya və dünya çempionlarının iştirak etdikləri bu yarışda Azərbaycanı təmsil edən Emin Cəfərov 28-ci, Niyaz Ağazadə 64-cü, Paşa Əhədpur 88-ci yeri tutublar. Dünya kuboku yarışlarında Olimpiya Oyunları zamanı medal qazanmış 50-dən çox idmançı iştirak edir. Həmçinin atıcıların 100-dən çoxu dünya çempionatlarının mükafatçısıdır. Burada elə idmançılar var ki, 3 və ya 4 dəfə Olimpiya çempionu olublar.

Dünən qadınlar arasında tapançadan 10 və 25 metr məsafəyə, kişilər arasında isə 50 metr məsafəyə atəş açma yarışları keçirilib. Bu yarışlarda Azərbaycanı qadınlardan Nigar Nəsirova, Zərifə Qasımova, Xəyalə Hüseynli, Leyla Mirzəzadə, Rübabə Quluzadə, Ülviyyə Eyvazova, kişilərdən Ülfan Axundov, Elvin Astanov, Məmmədəli Abdullayev və Rəsul Məmmədov təmsil ediblər.

Pərviz Əliyev, Qəbələ

Zaman.-2015.-11 avqust.-S.7.