Cəmiyyəti qorumaq fərdin özünü qorumaq deməkdir”

Dünən Beynəlxalq Mətbuat Mərkəzində Milli Dəyərlərin Təbliği ictimai birliyi tərəfindən “Milli-Mənəvi Dəyərlərimiz və müasirlik” mövzusunda tədbir keçirilib.

Tədbiri açıq elan edən ictimai birliyin sədri Rövşən Məmmədov ilk növbədə Milli Dəyərlərin Təbliği İctimi Birliyinin milli dəyərlərin təbliğində və qorunub saxlanılmasındakı əhəmiyyətli rolundan bəhs etdi: “Birliyimizin bu tədbiri keçirməkdə məqsədi zəngin milli-mənəvi dəyərlərimizi araşdırmaq, təbliğ etmək və qorunmasına köməklik göstərməkdir. Bugünkü dəyirmi masamızda da, “Milli-mənəvi dəyərlərimiz və müasirlik” mövzusu ətrafında müzakirələr edəcək, dəyərli qonaqlarımızın fikirlərini dinləyəcəyik”.

Sonra AMEA Fəlsəfə və Hüquq İnstitutu, İdrak nəzəriyyəsi və elmin fəlsəfəsi şöbəsinin müdiri, fəlsəfə üzrə fəlsəfə doktoru Füzuli Qurbanov çıxış etdi. Müasirləşmənin təsiri ilə milli-mənəvi dəyərlərimizin yavaş-yavaş unudulduğunu deyən F. Qurbanov bu dəyərlərin qorunmasında xüsusilə gənc nəslin üzərinə böyük vəzifə düşdüyünü də vurğuladı: “Hər fərdin, hər cəmiyyətin kimliyini, həyat tərzini, adət-ənənəsini əks etdirən dəyərlər toplusuna milli-mənəvi dəyərlər deyilir. Dövlətimizi qorumaq üçün ilk növbədə dəyərlərimizi qorumalıyıq. Çünki cəmiyyəti qorumaq fərdin özünü qorumaq deməkdir”.Tədbirin sonunda jurnalistlərin sualları cavablandırıldı.

Qeyd edək ki, tədbirdə AMEA Folklor İnstitutu, Mifologiya şöbəsinin müdiri, filologiya elmləri doktoru Seyfəddin Rzasoy, Jurnalist Seymur Verdizadə, fəlsəfə üzrə fəlsəfə doktoru Elvüsal Məmmədov, AMEA akad. Z.M.Bünyadov adına Şərqşünaslıq İnstitutu “Şərq-Qərb” şöbəsi, aparıcı elmi işçi, şərqşünas-islamşünas, ilahiyyat üzrə fəlsəfə doktoru Məmmədəli Babaşlı, qonaqlar və mətbuat nümayəndələri iştitak ediblər.

Zaman.- 2015.- 1 dekabr.- S.2