Yevlaxda region KİV-ləri üçün maarifləndirici regional konfrans keçirilib

Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu Yevlax Şəhər İcra Hakimiyyəti ilə birgə “İnformasiya əldə etmək haqqında” qanunun şərhi sahəsində region KİV-lərin maarifləndirilməsi mövzusunda regional konfrans keçirib. Tədbirdə mətbuatın maddi texniki problemlərinin həllindən, bu sahədə qanunvericilik bazasının yaxşılaşdırılmasından danışılıb.Konfrans iştirakçıları, əvvəlcə, ümummilli liderimiz Heydər Əliyevin Yevlax şəhərindəki heykəli önünə tər güllər düzüblər. Yevlax Şəhər İcra Hakimiyyətinin başçısı Qoca Səmədov milli mətbuatın inkişafına göstərilən dövlət qayğısından, jurnalistlərin sosial problemlərinin həlli istiqamətində atılan addımlardan danışıb; belə maarifləndirici tədbirlərin əhəmiyyətini yüksək qiymətləndirib. Azərbaycan Respublikası Prezidenti yanında KİV-lərin inkişafına Dövlət Dəstəyi Fondunun icraçı direktoru Vüqar Səfərli rəhbərlik etdiyi qurumun həyata keçirdiyi layihələr barədə ətraflı məlumat verib. Bildirib ki, “İnformasiya əldə etmək haqqında” Azərbaycan Respublikası qanunvericiliyinin izahı ilə bağlı maarifləndirmə tədbirlərinin həyata keçirilməsi və informasiya almaq hüququnun səmərəli təmin edilməsi icra orqanı kimi fonda həvalə olunub.Konfransda Milli Məclisin deputatı, Mətbuat Şurasının sədri Əflatun Amaşov, fondun Müşahidə Şurasının sədri Umud Mirzəyev, “İki sahil” qəzetinin baş redaktoru Vüqar Rəhimzadə, Jurnalistlərin Həmkarlar İttifaqının sədri Müşfiq Ələsgərli və digərləri çıxış edərək, informasiya əldə etmək haqqında qanunvericilik, jurnalistlərin hüquqi məsuliyyət normaları, informasiya əldə etmək sahəsində real vəziyyət və praktiki fəaliyyət imkanları barədə geniş məlumatlar veriblər. Sonra müzakirələr aparılıb.

Esmira Hidayətova

Zaman.- 2015.- 29 dekabr.- S.- 4