Dinlərarası və mədəniyyətlərarası
dialoq tolerantlığın əsasıdır
(2)
ƏVVƏLI ÖTƏN SAYIMIZDA,
Konfransda “Mədəniyyət siyasəti və mədəniyyətlərarası dialoq: müxtəlif mədəniyyətlərin idarə edilməsinə dair yeni konsepsiya”, “İrs və mədəniyyətlərarası dialoq: hamımız birgə milli irsdən dünyəvi irsə doğru” başlıqlı mövzular müzakirə olunub.
Bu mövzuları müzakirə
edən konfrans iştirakçıları belə
qərara gəliblər
ki, millətlərarası
dialoqa və regionların davamlı inkişafına təkan verən amillərdən biri millətlərin bütün dəyərlərini
göstərən milli
irsdir. Milli irsin qorunub saxlanılması isə hər bir millətin
və xalqın prinsipial məsələsidir.
Konfransda fəal iştirak edən Azərbaycan Respublikasının
Prezidenti İlham Əliyev mədəniyyətlərarası
dialoq, milli və dini tolerantlığın
möhkəmlənməsində Azərbaycanın təcrübəsindən
danışaraq deyib: “Azərbaycan öz dövlət müstəqilliyini
bərpa etdikdən sonra əlbəttə, millətlərarası münasibətlərə,
milli və dini tolerantlığın
möhkəmlənməsi işinə
çox böyük diqqət verilmişdir. Bu gün Azərbaycan
sözün əsl mənasında dostluq, qardaşlıq məkanıdır.
Burada bütün xalqlar,dinlərin nümayəndələri bir
ailə kimi yaşayırlar. Mən əminəm ki,
Azərbaycanın bu istiqamətdə əldə
etdiyi təcrübə
çox önəmlidir.
Şübhə etmirəm ki,
konfrans zamanı bu barədə geniş söhbət açılacaqdır”.
Şərqlə Qərb arasında
körpü rolu oynayan Azərbaycanın mədəniyyətlərin dialoqunda
mühüm əhəmiyyət
kəsb etdiyini vurğulayan AŞ-nın sabiq baş katibi T. Devis konfransdakı çıxışında
deyib: “Bakı, Azərbaycan qeyri-adi bir məkandır. Bura tarix boyu müxtəlif
mədəniyyətlərin qovuşma nöqtəsi, Şərq və Qərb, Şimal və Cənub arasında təbii bir körpüdür”.
Tarixi reallıq göstərir ki, hər hansı
bir xalq, hər hansı bir millət o halda mövcud olub inkişaf edə bilir ki, həmin millət və xalqlar öz mədəniyyətinin özünəməxsusluğunu
itirmədən, öz
mədəni identikliyini
qoruyub saxlamaqdadır.
Bu baxımdan bütün xalq və millətlər öz mədəni sərvətlərini başqa
xalqlarla mübadilə
edərək qarşılıqlı
fəaliyyət əsasında
ömür sürürlər.
Buradan belə çıxır ki, tarixdə ayrı-ayrı ölkələr,
xalqlar, sosiumlar və ayrı-ayrı şəxslər bəşəriyyətin
mədəniyyətlə bağlı
olan dialoq fəaliyyətinin konsepsiyasını
hazırlamağa və
onu həyata keçirməyə həmişə
israrla səy göstəriblər.
Tarixi inkişaf
prosesində kulturoloji
nəzəriyyələrin, bütövlükdə müxtəlif
mədəniyyətlərin biri-birinə təsirində
dialoq amili mühüm rol oynayıb. Məhz dialoq vasitəsilə
ayrı-ayrı xalqların
mədəniyyətləri öz milli xüsusiyyətlərini
saxlamaq şərtilə
biri-birini zənginləşdirmiş
və inkişaf etdirmişdir.
Dialoq anlayışının fəlsəfi
mahiyyəti...
Dialoq anlayışının
fəlsəfi mahiyyətini
şərh etmək üçün, hər şeydən əvvəl monoloq və poliloq anlayışına
diqqət yetirmək lazımdır. Monoloq dedikdə bir nəfərin müəyyən
fikir
irəli sürməsi,
yaxud fərdin özünə, ya da ki bir
qrup dinləyicilərə
müraciəti başa
düşülür. Poliloq - iki
nəfərdən çox
tərəflərin müəyyən
ünsiyyət prosesində
iştirakıdır. Dialoq ünsiyyət prosesində
iki, yaxud daha çox fərdlərin bir-biri ilə fakir mübadiləsinə
deyilir. Rus alimi professor V. M. Pivoyev dialoqu fəlsəfi anlamda şərh edərək yazır ki, dialoqda ünsiyyətin
iki subyekti, iki “şüuru” iştirak edir və onlar öz
fikirlərini ifadə
etmək, bir-birini başa düşmək və anlamağa nail olmağa çalışırlar.
Hər bir dialoq iştirakçısı
üçün vacib
şərt birincisi, öz fikrinin başqası tərəfindən
eşidilməsi, sonra
isə başqasını
düzgün anlamaq arzusudur. Dialoq “özünün” və “özgənin” şüurunun dialektik ziddiyyətidir. Dialoq
- hər biri ayrı-ayrılıqda mövcud
olan, biri-digərindən
asılı olmayan “özgəni” anlamağa
və onun fikrini mənimsəməyə,
“özünün fikrinin
suverenliyini saxlamağa
cəhd edən prosesdir. Biz dialoq
anlayışını əgər
mədəniyyətə tətbiq
etsək V. M. Pivoyevin yuxardakı fikri ilə razılaşmamaq mümkün deyildir.
Tarixi təkamül prosesində
bütün mədəniyyətlər
qarşılıqlı təsir
nəticəsində bir-birini
zənginləşdirib. Bu qarşılıqlı təsir prosesi eyni regionda yerləşən
və bir-birinə qonşu olan xalqların mədəniyyətində
daha çox özünü göstərmişdir.
Məsələn, Qərbin və
Şərqin təsiri
ilə formalaşan Rusiya mədəniyyətinin
inkişafını buna
misal göstərmək
olar. Bu fikri
Azərbaycan mədəniyyətinə
də aid etmək olar. Belə ki, Şərq
və Qərbin qovuşuğunda yerləşən
Azərbaycanın mədəniyyətinin
formalaşması və
inkişafında həm
Şərq, həm də Qərbin təsiri tarixən özünü göstərib.
Tarixən həm Şərq, həm də Qərb sivilizasiyası ilə bağlı olan Azərbaycan indiki dövrdə də, həm Qərb, həm də Şərq mədəniyyətinin daşıyıcısı kimi çıxış edir. Bu fikri əsaslandırmaq üçün Prezident İ. Əliyevin 7-9 aprel 2011-ci il tarixində Bakıda keçirilən Ümumdünya Mədəniyyətlərarası Dialoq Forumundakı çıxışında söylədiyi fikirlərə diqqət yetirək. Forumdakı çıxışında Azərbaycanın İslam dünyasının, Şərq mədəniyyətinin tərkib hissəsi olduğunu vurğulayan Prezident İ. Əliyev bu haqda deyib: “Azərbaycan İslam dünyasının tərkib hissəsidir. İslam dəyərləri, milli dəyərlər bizim üçün çox əzizdir. Müstəqillik dövründə Azərbaycan çox böyük və uğurlu yol keçmişdir. Müstəqillikdən əvvəlki dövrdə milli mənsubiyyətimizi, milli xarakterimizi qoruyub saxlamaq üçün bizim tariximiz, mədəniyyətimiz, dilimiz, dinimiz müstəsna rol oynamışdır”. Azərbaycanın İslam ölkələri ilə siyasi-iqtisadi və mədəni əlaqələrinin hazırki şəraitdə çox geniş olduğunu qeyd edən İ. Əliyev Azərbaycan mədəniyyətinin Şərq mədəniyyətinin tərkib hissəsi olmaqla yanaşı, həm də Qərb mədəniyyətinə çox yaxın olduğunu vurğulayaraq deyib: “Azərbaycan İslam Konfransı Təşkilatının üzvüdür və müsəlman ölkələri ilə bizim çox sıx əlaqələrimiz vardır. 2009-cu ildə Bakı İslam mədəniyyətinin paytaxtı elan edilib. 2018-ci il üçün isə bu şərəfli ada Azərbaycanın qədim şəhəri Naxçıvan layiq görülmüşdür. Eyni zamanda, Azərbaycan bütün dövrlərdə Qərb dünyasına da çox bağlı, çox yaxın olubdur. Müsəlman şərqində ilk demokratik respublika 1918-ci ildə Azərbaycanda yaradılmışdır. İlk teatr məhz Azərbaycanda yaranmış, ilk opera burada səhnəyə qoyulmuşdur. Qadınların səs vermək hüququ müsəlman aləmində ilk dəfə məhz Azərbaycanda təmin edilmişdir.”
Azərbaycan mədəniyyət tədbirlərinin
keçirildiyi mərkəzə çevirilib
Son illərdə Azərbaycan bir çox beynəlxalq mədəniyyət tədbirlərinin keçirildiyi mərkəzə çevirilmişdir. Məsələn, təkcə, 2010-cu ildə Üzeyir Hacıbəyli adına Beynəlxalq Musiqi Festivalı, Qəbələ II Beynəlxalq Musiqi Festivalı, Bakı Birinci Teatr konfransı, Milli Teatr Festifalı, Çexov adına Beynəlxalq Teatr Festivalının “İpək yolu” mərhələsi, Vokalçıların Bülbül adına V Beynəlxalq Müsabiqəsi, IV Beynəlxalq Rostropoviç Festivalı və s. Bütün bunlar mədəni əməkdaşlıq və mədəniyyətlərarası dialoqda Azərbaycanın rolunu və əhəmiyyətini göstərən mühüm hadisələrdir. Xüsusən, “Euronews” telekanalının 2010-cu ilin yekununa həsr olunan verilişində Avropanın ən nüfuzlu mədəniyyət hadisələrinin sırasında Bakıda Beynəlxalq Caz Festivalının keçirilməsinin xüsusi qeyd edilməsi də Azərbaycan mədəniyyətinin dünya mədəniyyətinə inteqrasiyası və beynəlxalq mədəniyyət tədbirlərindəki fəaliyyətini göstərən faktlardan biridir. Azərbaycan mədəniyyətinin genişmiqyaslı təbliği ilə bağlı həyata keçirilən tədbirlər mədəniyyətimizin hərtərəfli inkişafının geniş vüsət alması ilə şərtlənir.
Davamı növbəti sayımızda
Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyəsi əsasında səhifəni hazırladı:
Elvin Əliyev
Zaman.-2015.-21 fevral.-S.13.