“Gənclərimizin milli ruhda böyüməsini mətbuatın prioritet istiqaməti kimi qəbul etməliyik”

Dünən M. F. Axundov adına Azərbaycan Milli Kitabxanasında “Azərbaycan mətbuatı və milli-mənəvi dəyərlərimiz” mövzusunda konfrans keçirildi. Konfrans iştirakçıları ilk olaraq, Azərbaycan milli mətbuatının 140 illiyi münasibətilə nümayiş olunan sərgi ilə tanış oldular.

“Azərbaycan mətbuatı milli-mənəvi dəyərlər məsələsində diqqətli olmalıdır”

Daha sonra çıxış edən mədəniyyət və turizm naziri Əbülfəs Qarayev bildirdi ki, müxtəlif inkişaf yolu keçmiş Azərbaycan mətbuatı azaddır. Ölkə Prezidenti İlham Əliyevin mətbuata böyük dəstək verdiyini dilə gətirən nazir əlavə etdi ki, bəzi xarici KİV-lər Azərbaycanda demokratiyanın olmamasını iddia edirlər: “Onlar öz ölkələrindəki problemləri görmürlər. Azərbaycanda mətbuat tam müstəqildir. İstənilən mövzunu sərbəst şəkildə qabarda bilər. Reallıq bundan ibarətdir”. İlk mətbu orqanımız olan “Əkinçi” qəzeti haqqında da danışan Ə. Qarayev fikirlərini belə dilə gətirdi: “İctimai fikrin formalaşdırılması və inkişaf etdirilməsi sahəsində cəmi iki illik ömrü olan “Əkinçi” qəzetinin xidmətləri böyükdür”. Ə. Qarayev qeyd edib ki, Azərbaycan mətbuatı milli-mənəvi dəyərlər məsələsində diqqətli olmalıdır, çünki bu, həssas məsələdir.

“Mətbuatın üzərinə böyük missiya və vəzifə düşür”

Konfransda çıxış edən Prezident Administrasiyası İctimai-siyasi məsələlər şöbəsinin müdir müavini Ərəstun Mehdiyev isə bunları dedi: “Dövlət siyasəti ona yönəlib ki, Azərbaycan mətbuatı inkişaf etsin, fəaliyyətini yeni dövrün tələblərinə uyğun qursun. Bu sahədə atılan addımlar onu deməyə əsas verir ki, bizim peşəkar mətbuatımız bunun öhdəsindən gəlir”. Onun sözlərinə görə, mətbuat müxtəlif istiqamətlərdə öz məsuliyyətini bir az artırmalıdır: “Milli mətbuatımızın qaranquşu olan “Əkinçi”nin nəşrindən sonra çap olunan digər mətbu orqanlar Azərbaycan xalqının milli özünüdərkinə böyük diqqət yetirib və bu yolda böyük rol oynayıb. O dövrdən bu günə qədər mətbuatımızı izləsək, görərik ki, Azərbaycanın milli dəyərləri geniş şəkildə işıqlandırılıb. Bu gün müharibə şəraitində yaşayırıq. Gənclərimizin milli ruhda böyüməsini mətbuatın prioritet istiqaməti kimi qəbul etməliyik. Mətbuatın peşəkarlığı burada böyük rol oynayır. Azərbaycan Prezidentinin vurğuladığı kimi, jurnalistlərin vətənpərvər olması vacib məsələlərdəndir. Mətbuatın cəmiyyətdə tutduğu rol çox əhəmiyyətli və önəmlidir. Onun üzərinə böyük missiya və vəzifə düşür. İnanıram ki, Azərbaycan mətbuatı üzərinə götürdüyü böyük missiyanı indiyə qədər olduğu kimi, bundan sonra da davam etdirəcək”.

Daha sonra Prezident yanında Kütləvi İnformasiya Vasitələrinin İnkişafına Dövlət Dəstəyi Fondunun icracı direktoru Vüqar Səfərli, Azərbaycan Mətbuat Şurasının sədri Əflatun Amaşov, Bakı Dövlət Universitetinin Jurnalistika fakültəsinin dekanı, professor Şamil Vəliyev, “Yeni Azərbaycan” qəzetinin baş redaktoru Hikmət Babaoğlu 140 ildə Azərbaycan milli mətbuatının keçdiyi yola nəzər saldı, müasir dövrdəki inkişaf perspektivləri təhlil etdilər.

Konfransın sonunda Mədəniyyət və Turizm Nazirliyinin və Mətbuat Şurasının “Milli rəqslərimiz milli dəyərimizdir” mövzusunda keçirdikləri fərdi jurnalist yazıları müsabiqəsinin qalibləri mükafatlandırılıb. Qaliblər arasında “Zaman-Azərbaycan” qəzetinin əməkdaşı Qvami Məhəbbətoğlu da var idi.

Daha sonra mətbuatla fəal əməkdaşlığa görə, mədəniyyət və turizm naziri Ə. Qarayev Azərbaycan Mətbuat Şurasının Fəxri diplomu ilə təltif olundu. Mədəniyyət və Turizm Nazirliyi tərəfindən isə adıçəkilən qurumla sıx əməkdaşlıq edən KİV işçilərinə Fəxri fərmanlar verildi.

Məlumat üçün bildirək ki, adıçəkilən konfrans Azərbaycan milli mətbuatının 140 illik yubileyinin keçirilməsi haqqında Azərbaycan Respublikası Prezidentinin Sərəncamı ilə bağlı hazırlanmış tədbirlər planına uyğun olaraq keçirilib.

Elvin Əliyev

Zaman.-2015.- 11 iyul.- S. 2.