“Avropa Oyunlarında Azərbaycana gələcək qonaqlar tolerant ölkə ilə qarşılaşacaqlar”

“Azərbaycanda Avropa Oyunlarının keçirilməsinin bir mühüm cəhəti də odur ki, avropalılar ölkəmizdə mövcud olan yüksək tolerantlıq dəyərləri ilə tanış olaraq, onun Qərbdə yayılmasına, imicinin daha da artmasına stimul vermiş olacaq”.

Bu sözləri jurnalistlərə açıqlamasında millət vəkili Gövhər Baxşəliyeva deyib: “Avropa Oyunları zamanı ölkəmizə çoxlu sayda qonaqlar gələcək. Onlar arasında 6 min idmançı, 2 minə yaxın jurnalist və on minlərlə azarkeş də olacaq. Həmin insanlar idman yarışlarının keçirildiyi müddətdə Azərbaycanın həyatı, burada mövcud olan reallıqlarla tanış olacaqlar. O cümlədən, Azərbaycanda yüksək səviyyədə inkişaf etmiş tolerant mühitin olduğunun əyani şəkildə şahidi olacaqlar. Azərbaycan tolerantlıq sahəsində dünyaya örnək olan ölkədir. Ölkəmizdə müxtəlif sivilizasiyalara, mədəniyyətlərə mənsub insanların dinc yanaşı yaşamasını əyani şəkildə bir daha görəcəklər”.

G. Baxşəliyeva qeyd edib ki, bütün bunların nəticəsində Avropa Oyunları ərəfəsində ölkəmizə gələn qonaqlarda Azərbaycanın tolerant ölkə olması təsəvvürü formalaşacaq: “İdman oyunlarının ölkəmizdəki tolerant dəyərlərin Avropaya təsirinin olduğunun da şahidi olacağıq. Avropada bir daha görəcəklər ki, müsəlman Şərq ölkəsi hər iki sivilizasiyanın müsbət dəyərlərini özündə ehtiva etməyə qadirdir. Bir daha aydın olacaq ki, Azərbaycan həm Şərq dəyərlərini, həm də Qərb düşüncə tərzini, modern inkişafını özündə ehtiva edən ölkədir. Qərbdə bəzi insanlar hələ də elə bilirlər ki, Azərbaycan əhalisi də Misir, Pakistan, İraq əhalisi kimidir. Halbuki belə deyil”.

Millət vəkili movqe.az-a açıqlamasında isə qeyd edib ki, Azərbaycan əhalisi kifayət qədər modernləşmiş, qərbləşmiş əhalidir: “Avropa Oyunlarına təşrif buyuranlar da bütün bu dəyərlərin bir daha şahidi olacaqlar. Bir müsəlman ölkəsində müasir dəyərlərə mənsub tolerant insanları görülməsi Qərbdəki islamofobiya, qatı millətçilik kimi meyllərin arxa plana keçməsində də mühüm rol oynaya bilər. Bəzi Qərb dairələrində müsəlman deyəndə sanki, bir terrorçu obrazı canlanır. Bu da təəssüf ki, Şərqdəki müəyyən radikal dairələrin törətdiyi əməllərdən irəli gəlir. Amma Azərbaycanda olmaqla Qərb insanı görəcək ki, müsəlman millətinə mənsub insanlar heç də onların düşündüyü kimi deyil. Əksinə, Azərbaycan kimi müsəlman ölkəsi bəşər sivilizasiyasının yaratdığı ən gözəl dəyərləri özündə cəmləşdirən sivil, tolerant bir dövlətdir. Onlar bir daha buna əmin olacaqlar”.

Fransız senator Natali Qule isə ölkəmizdə səfərdə olarkən jurnalistlərə açıqlamasında deyib ki, ilk Avropa Oyunları üçün Azərbaycana gələcək qonaqlar tolerant ölkə ilə qarşılaşacaqlar və Azərbaycan üçün idman tədbirinin əhəmiyyəti də məhz budur: “Şübhəsiz ki, Bakı Avropa Oyunlarına hazırdır, lakin əsas olan Oyunların arxasında dayanan məqsəd və onun niyə Azərbaycan üçün əhəmiyyətli olmasıdır. Məqsəd multikultural ölkə nümayiş etdirməkdir”.

Senator həmçinin deyib ki, Azərbaycanın müsəlman ölkəsi olmasına baxmayaraq, digər dinlərin nümayəndələri də burada sülh şəraitində yaşayırlar: “Bura sanki tolerantlıq adasıdır”.

Xanım N. Qulenin də vurğuladığı kimi, idmana radikalizmə qarşı mübarizə vasitəsi kimi baxılır: “İdman sahəsində insanların ümumi dəyərləri var. Əhəmiyyətli olan idmanın insanları birləşdirməsidir ki, Avropa Oyunlarında da məhz bu baş verəcək”.

Mövzu ilə bağlı açıqlama verən millət vəkili Rafael Cəbrayılov deyib ki, Avropa Oyunlarının Azərbaycanda keçirilməsi həm də ölkəmizin Şərqlə Qərb arasında mühüm mədəniyyət və tolerantlıq körpüsü olmasından irəli gəlir: “Bu Oyunlar Azərbaycan xalqını dünyaya bir daha qonaqpərvər, mədəni, zəngin milli-mənəvi dəyərlərin daşıyıcısı, insanpərvər və tolerant xalq kimi tanıdacaq. Belə sanballı idman tədbirinin Azərbaycana həvalə edilməsi həm də onu göstərir ki, respublikamız bütün sahələrdə, o cümlədən idmanda tərəqqi dövrünü yaşayır”.

Azərbaycanın birinci xanımı Mehriban Əliyeva “Rossiya-24” telekanalına müsahibəsində deyib ki, Avropa Oyunlarının ölkəmizdə keçirilməsi Avropa idmanı tarixində yeni səhifə açacaq: “Bu, Avropa idman ictimaiyyətinin bizim ölkəmizə etimadının göstəricisidir. İş elə gətirdi ki, hazırlıq üçün vaxtımız xeyli az oldu - cəmi iki il yarım. Adətən, bu səviyyəli, bu miqyaslı idman tədbirinə hazırlaşmaq üçün, əlbəttə, xeyli çox vaxt tələb olunur. Lakin biz, demək olar ki, bu işləri vaxtında görə bildik və qarşımızda duran bütün vəzifələri yerinə yetirdik. Bütün komanda öz diqqətini detallar üzərində cəmləşdirib. Lakin artıq bu gün demək olar ki, Bakı Avropanı qəbul etməyə hazırdır. Ümidvaram ki, birinci Avropa Oyunları dostluq, həmrəylik, birlik, sağlam rəqabət şəraitində keçəcək və bu, ümumi bayram olacaq”.

Jurnalistin: “Birinci Avropa Oyunlarının konsepsiyasında tolerantlıq, tolerantlıq ideyası necə nəzərə alınıb?” sualına Mehriban xanımın cavabı belə olub: “Bütövlükdə Olimpiya hərəkatının ideyası birlik, bərabərlik, ədalət deməkdir. Təəssüf ki, müasir dünyada məhz bu anlayışların qıtlığı çox münaqişələrin, çox gərginlik ocaqlarının əsasını təşkil edir. Ona görə də bu cür tədbir - istər idman tədbiri, istər mədəni tədbir həmişə müxtəlif ölkələrdən olan, müxtəlif konfessiyalara mənsub insanların və xalqların birləşməsi baxımından daha böyük əhəmiyyət kəsb edir. Bu baxımdan düşünürəm ki, Bakının birinci Avropa Oyunlarının vətəni olması təsadüfi olmayacaq. Ona görə ki, Azərbaycan geosiyasi baxımdan minilliklər boyu Böyük İpək Yolu üzərində Şərq ilə Qərbin qovuşuğunda yerləşir. Ölkəmizin ərazisində müxtəlif mədəniyyətlər, müxtəlif sivilizasiyalar qaynayıb-qarışıb, müxtəlif dinlərin nümayəndələri yaşayıb. Bütün bunların təsirini, müxtəlif mədəniyyətlərin təsirini hətta bizim şəhərlərin memarlığında da görə bilərsiniz. Lakin ən başlıcası odur ki, Azərbaycan xalqının qəlbində bu həqiqi tolerantlıq, dözümlülük, dostsevərlik, başqa mədəniyyətin qəbul edilməsi ruhu uzun illər boyu, demək olar ki, əsrlər boyu formalaşıb. Biz öz köklərimizə, öz mədəniyyətimizə, ənənələrimizə çox həssaslıqla, hörmətlə, qayğıkeşliklə yanaşırıq. Lakin biz dünyanın mədəni müxtəlifliyini də eynilə bu cür qəbul edirik və bu, uğurun rəhnidir. Ona görə ki, özünə məxsus olanları hətta qiymətləndirmək, onu qiymətləndirməyi və sevməyi bacarmaq üçün özgəninkini qəbul etmək lazımdır. İndiki halda heç də təsadüfi deyildir ki, bu gün Bakı özünəməxsus bir multikulturalizm mərkəzidir. Keçən il Prezidentin Fərmanı ilə ölkəmizin paytaxtında Multikulturalizm Mərkəzi yaradılıb. Hər il keçirilən Beynəlxalq Humanitar forumlar, mədəniyyətlərarası, sivilizasiyalararası dialoqa dair görüşlər buna sübutdur. Bir misal göstərim: Azərbaycan birinci Avropa Oyunlarını qəbul edir, 2017-ci ildə isə biz İslam Həmrəyliyi Oyunlarını qəbul edəcəyik”.

Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyəsi əsasında səhifəni hazırladı:

Nicat İntiqam

Zaman.-2015.-6 iyun.-S.13.