Dini təhlükəsizlik milli təhlükəsizliyin tərkib hissəsidir

“Gənclərimiz dinimizi olduğu kimi öyrənməli, qəbul etməli və ondan istifadə etməlidirlər. Biz heç vaxt imkan verə bilmərik ki, ayrı-ayrı şəxslər, ayrı-ayrı qüvvələr öz şəxsi mənafelərini güdərək, İslam dini pərdəsi altında Azərbaycan gənclərinin tərbiyəsini və mənəviyyatını zədələsinlər”. Heydər Əliyev

Vətəndaşlarının təhlükəsizliyinin təmin olunması hər bir ölkənin qarşısında duran vacib məsələlərdəndir. Bu baxımdan hər bir ölkə öz milli maraqlarını, geosiyasi vəziyyətini, seçdiyi inkişaf modelini nəzərə alaraq, öz milli təhlükəsizlik konsepsiyasını hazırlayaraq onu həyata keçirir. Azərbaycan Respublikası da öz milli təhlükəsizlik konsepsiyasını hazırlayaraq, onu həyata keçirməkdədir. 23 may 2007-ci il tarixli Prezident Sərəncamı ilə təsdiq edilən Milli Təhlükəsizlik Konsepsiyası xalqımızın milli maraqlarını əhatə edən uzunmüddətli strateji proqramdır. Milli Təhlükəsizlik Konsepsiyasında öz əksini tapan əsas məsələlərdən biri separatçılıq, etnik siyasət və dini ekstremizmdir. Dini təhlükəsizlik milli təhlükəsizlik konsepsiyasının 3.3-cü yarımbölməsində konkret şəkildə öz ifadəsini tapıb. Azərbaycan Respublikasının Milli Təhlükəsizlik siyasətinin əsas istiqamətləri konsepsiyanın IV bölməsində geniş şərh edilib. Konsepsiyanın 4.32-ci yarımbölməsində “Milli və dini tolerantlıq mühitinin qorunması” - adlanan hissə Milli Təhlükəsizlik Konsepsiyasının əsas istiqamətlərindən biri kimi qarşıya qoyulub. Dünyada dini təhlükələr, dinlərarası münaqişələr, təriqətlərarası ziddiyyətlərlə bağlı müxtəlif bölgələrdə baş verən toqquşmalar bizlərə yaxşı məlumdur.

“Azərbaycanda heç vaxt ayrıseçkiliyə yol verilməib”

Lakin qeyd etmək lazımdır ki, başqa bölgələrdən fərqli olaraq Şərqlə Qərbin qovuşuğunda yerləşən Azərbaycanda tarixən müxtəlif dinlərə və mədəniyyətlərə mənsub olan xalqlar bir ailə kimi həmişə sülh və əminamanlıq şəraitində yaşayıblar. 2011-ci il 10-11 oktyabrda Bakıda “XXI əsr: ümidlər və çağırışlar” devizi ilə keçirilən Beynəlxalq Humanitar Forumda çıxış edən Azərbaycan Respublikasının Prezidenti İlham Əliyev tarixən ölkəmizin milli və dini dözümlülük ənənəsinə malik olduğunu vurğulayaraq deyib: “Heç vaxt Azərbaycanda milli, yaxud dini zəmində heç bir qarşıdurma, anlaşılmazlıq olmamışdır. Heç vaxt ayrıseçkiliyə yol verilməmişdir və bu gün müstəqil Azərbaycan bu ənənələrə sadiqdir”. Qeyd edək ki, Prezident İlham Əliyevin Forumda söylədiyi bu fikirlər Milli Təhlükəsizlik Konsepsiyasının müvafiq bölməsində öz əksini tapıb. Bununla yanaşı, dinindən və milliyyətindən asılı olmayaraq, bütün vətəndaşların qanun qarşısında bərabərliyi prinsipləri, ölkədə bərqərar edilmiş milli və dini tolerantlıq mühitinin qorunması da dövlət qarşısında duran prioritet məsələlərdən biri kimi mövcud konsepsiyada öz ifadəsini tapıb.

Bu məsələ konsepsiyada belə formulə edilib: “Azərbaycan Respublikası həmişə müxtəlif millətlərin və dinlərin sülh şəraitində birgə yaşayışına nümunə olmuşdur. Azərbaycan dövləti cəmiyyətin maraqlarından irəli gələn rasional milli siyasət kursunu, dini tolerantlıq mühitinin qorunması və inkişafını, bütün vətəndaşların qanun qarşısında bərabərliyi və qanunun aliliyini, demokratik hüquq və azadlıqların, həmçinin insanların bu hüquq və azadlıqlarından sərbəst istifadə imkanlarının təmin edilməsini müvafiq riskin real təhdidə çevrilməsinin qarşısının alınması və neytrallaşdırılmasının mühüm şərtləri qismində nəzərdən keçirilir. Hazırkı mərhələdə ölkədə bərqərar edilmiş milli və dini tolerantlıq mühitinin qorunması və inkişafı dövlət qarşısında duran başlıca vəzifələrdən hesab olunur”. Qeyd edək ki, Azərbaycanda dövlət-din münasibətlərinin tənzimlənməsində Dini Qurumlar üzrə Dövlət Komitəsinin (DQDK) fəaliyyəti mühüm əhəmiyyət kəsb edir. DQDK yarandığı gündən Respublikamızda fəaliyyət göstərən müxtəlif dini icmaların qeydiyyatdan keçirilməsi, onların müvafiq qanunvericiliyə uyğun şəkildə fəaliyyət göstərməsinə nəzarət edilməsi, başqa ölkələrin dini qurumları ilə əməkdaşlıq məsələlərinin həyata keçirilməsi, respublikamızda mövcud olan müxtəlif dini konfessiyalar arasında dini dözümlülüyün qorunub saxlanması sahəsində mühüm rol oynaıb.

“Dini maarifləndirmədə mövcud boşluqları tamamilə aradan qaldırmaq mümkün olmayıb”

DQDK-nin 10 illik fəaliyyətinə nəzər salmaq, bu müddətdə komitənin dövlət-din münasibətlərinin tənzimlənməsi sahəsində gördüyü işlərə bir daha diqqət yetirmək məqsədilə 2011-ci il 21 iyunda Bakıda dinşünaslıq sahəsində mütəxəssislər, dini icma rəhbərləri, QHT və KİV nümayəndələrinin iştirakı ilə “DQDK 10 il” mövzusunda dəyirmi masa keçirilib. Toplantının yekununda tədbir iştirakçıları Azərbaycan Prezidenti İ. Əliyevə müraciət ünvanlayıblar. Müraciətdə ulu öndər H. Əliyevin 21 iyun 2001-ci il tarixli, 512 saylı Fərmanı ilə DQDK-nin yaradılmasının əhəmiyyəti vurğulanmış və göstərilmişdir ki, ölkəmizdə zərərli dini cərəyanların və ekstremist meyllərin qarşısının alınması, eləcə də bu sahədə mövcud problemlərin həlli istiqamətində xeyli iş görülüb. Bununla yanaşı dini problemlər sahəsində qarşıda hələ görüləsi işlərin çox olduğunu bildirərək, xüsusən, gənclər arasında dini maarifləndirmə işlərini genişləndirməyi vurğulayan tədbir iştirakçıları aşağıdakı məzmunda Prezidentə müraciət etmişlər: “Bununla belə, ümumiyyətlə, regionda dini problemlərin mürəkkəb olduğu və həlli müəyyən zaman tələb etdiyi üçün ölkəmizdə uzun müddət ərzində siyasiləşmiş radikal dini qrupları və təriqətləri birdəfəlik zərərsizləşdirmək, eləcə də dini maarifləndirmə sahəsində mövcud boşluqları tamamilə aradan qaldırmaq hələ də mümkün olmayıb”. Azərbaycan Prezidenti İ. Əliyevə ünvanlanan bu müraciətin məzmunundan məlum olur ki, ölkəmizdə dini təhlükəsizliklə

bağlı hələ də müəyyən problemlər mövcuddur. Məhz bu cür problemlərin aradan qaldırılması və milli təhlükəsizliyə təhdidlər yaradan məsələlərin həll edilməsi hazırda qarşıda duran mühüm vəzifələrdən biridir. Sosioloji müşahidələr göstərir ki, insanlar ölkəmizin indiki inkişaf səviyyəsində mənəviyyatımıza zərər vuran dini radikalizmi məqbul hesab etmir, dinin siyasiləşdirilməsinin əleyhinə çıxır, milli və dini ekstremizmə qarşı tədbirlər görülməsini tələb edirlər.

Milli təhlükəsizliyimizə dinlə bağlı təhlükə yaradan amillər...

Milli təhlükəsizliyimizə dinlə bağlı təhlükə yaradan amillərdən biri xarici ölkələrdən Azərbaycana bəzi dini-siyasi ədəbiyyatların gətirilməsi və müxtəlif yollarla respublikamızda yayılmasıdır. Dəfələrlə aşkar edilib ki, bu cür dini-siyasi ədəbiyyatlarda və audio-video vəsaitlərdə dövlətçiliyimizə və xalqımızın milli maraqlarına zidd olan radikal dini çağırışlar, dini dözümsüzlük təbliğ edən ideyalar, dini ayrıseçkilik yaradan prinsiplər, gənclərimizin şüuruna məni təsir edə bilən müxtəlif çağırışlar öz əksini tapır. Bu baxımdan belə kitabların və audio-video vasitələrin ölkəmizə gətirilməsinə və yayılmasına məhdudiyyət qoyulması, təhlükəsizlik baxımından müvafiq orqanlar tərəfindən atılan normal addımlar kimi qiymətləndirilməlidir.

Faktlar göstərir ki, cəmiyyətdə ictimai asayişi pozan, əhalinin rahatlığına qarşı təhlükə törədən, milli təhlükəsizliyə təhdid yaradan hallar ölkəmizə qarşı yönəlmiş informasiya müharibəsidir. Azərbaycanın sürətli sosial-iqtisadi, mədəni inkişafını gözü götürməyən bəzi ölkələr informasiya müharibəsində din amilindən ölkəmizə qarşı vaxtaşırı istifadə edirlər.

Davamı növbəti sayımızda

Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyəsi əsasında səhifəni hazırladı: Elvin Əliyev

Zaman.-2014.-14 mart.-S.13.