“Azərbaycan tolerantlığa nümunə ölkədir”

Azərbaycan bir çox millətlərin və dini konfessiyalarının dinc yanaşı yaşamasının unikal nümunəsidir.

Azərbaycanda tarixən heç vaxt milli və dini zəmində ayrı-seçkilik və qarşıdurma baş verməyib, qarşılıqlı etimada və hörmətə əsaslanan mütərəqqi milli mədəni və dini münasibətlər mövcudur. Bu sayımızda İsmayıllı rayonunun inzibati ərazisində yerləşən İvanovka kəndi və əhalisi haqqında məlumat vermək istədim. İvanovka İsmayıllı rayonunun mərkəzindən 12-14 km cənub-qərbdə, Acınohur ön dağlığında yerləşir. Kəndin əsası 1847-ci ildə çar hakimiyyəti dövründə Qafqaza köçürülmüş ruslar tərəfindən qoyulmuşdur. Kəndin adı onun yaradıcısı olan kəndçi İvan Perşinin şərəfinə qoyulmuşdur. Onlar tez bir zamanda yurd salıb, azərbaycanlılarla yaxın dost münasibətləri qurmuşlar. 3000-dən çox əhalisi olan kənddə əsasən molokan rusları, ukraynalı, ləzgi və azərbaycanlılar yaşayır. Kənddə yeni orta məktəb, kitabxana, xəstəsana, doğum evi, uşaq bağçası və elektron ATS var. 1930-cu ildə İvanovkada o vaxtlar hər yerdə olduğu kimi “kolxoz” quruldu və bu günə kimi öz fəaliyyətini davam etdirir. Kolxoz bacarıqlı işçi və uzaqgörənliyi ilə seçilən Nikolay Vasilyeviç Nikitinin adını daşıyır. O, kolxoza 1994-cü ilə kimi düz 41 il rəhbərlik edib.

Burada hamı bir nəfər kimi kolxozda çalışır və hər kəs eyni səviyyədə yaşayırlar

Hazırda kənddə 1000-ə yaxın təsərrüfat qeydə alınıb. İvanovkalılar üzümçülük, taxılçılıq və heyvandarlıqla məşğul olurlar. Çaxır, pendir və s kimi məhsulları daxili bazarda öz yerlərini tutub. Kənddə bir neçə sex, park və zavod (Kirəmit zavodu) fəaliyyət göstərir. Hələ də kollektiv-ictimai əmək sisteminin olduğu sovxoz fəaliyyət göstərir. İvanovkada demək olar ki, iş problemi yoxdur. Burada hamı bir nəfər kimi kolxozda çalışır və hər kəs eyni səviyyədə yaşayırlar. Kolxoz qurluşu olduğundan kəndin özünə məxsus daxili büdcəsi var. Kənddə çalışanların əməkhaqları daxili büdcə hesabına ödənilir. İvanovkanın arxitekturası heyrətamizdir. Yol boyu evlər sanki xətkeşlə çəkilmiş kimi simmetrik və səliqəlidir. Burdakı evlər oyma üzüklü qədim, klassik standart rus tikililəridir və bir-birindən fərqlənmir. İvanovkada evlərin tikilişindən tutmuş insanların dünyagörüşünə, qonaqlarla davraşına kimi hər şey tam fərqlidir. Bu mənzərənin canlı şahidi olarkən təəccüb içində idim. Sanki kənddə deyil sivil Avropa ölkəsindəsən.

Üç ayrı millətin nümayəndələri bir kənddə yaşasalar da, milli-mənəvi dəyərlərinə görə xeyli fərqlənirlər

Buranın tarixi ilə bağlı geniş məlumat verən milliyətcə rus olan Olqa Timofyevna özünü azərbaycanlı kimi hiss etdiyini bildirdi. Cənab Prezident İlham Əliyevin 2009-cu ilin oktyabrında İvanovkaya səfəri zamanı tarixi məqamlarından söz açdı. Dövlət başcısı səfər zamanı qeyd etmişdir ki, Azərbaycanda həmişə bütün xalqların nümayəndələri dinc şəraitdə yaşamışdır, yaşayır və yaşayacaq. Ulu öndər Heydər Əliyev həm də belə deyirdi: “Qoy onlar necə istəyirlərsə, elə də yaşasınlar. Kolxozda yaşamaq yaxşıdırsa, qoy onlar kolxozda yaşasınlar”. Bu da əyani misaldır ki, Azərbaycanda təsərrüfatçılıq formasından asılı olmayaraq iqtisadiyyatın inkişafı üçün şərait yaradılmışdır. İstər fermer olsun, istər kolxozçu, elə böyük fərq yoxdur. Əsas məsələ odur ki, insan torpaqda işləyir. Sizlər əsrlər boyu Azərbaycan dövləti üçün çalışır və onun üçün sərvətlər yaradırsınız. Siz gələcəkdə də həmişə mənə arxalana bilərsiniz və sizin bütün problemlərinizi imkan daxilində həll etməyə çalışacağıq. Müstəqillik əldə etdiyimiz 90-cı illərin ortalarından praktiki inkişaf başlanmışdır. Biz yalnız zəhmət sayəsində, düzgün siyasət, iqtisadiyyatın düzgün təşkili, siyasi sabitlik, Azərbaycanda yaşayan bütün xalqlar arasında sülh sayəsində MDB-nin üzvü olan dövlətləri qabaqlamışıq. Təəssüf ki, bu heç də hər yerdə belə deyildir. Dünyada elə ölkələr var ki, orada əksinə, milli zəmində, dini zəmində toqquşmalar vardır. Azərbaycanda belə hallar heç vaxt olmamışdır və olmayacaqdır. Buna həm siz, həm Prezident, həm də bütün cəmiyyət təminat verir. Bütün cəmiyyət bu hisslərlə yaşayır ki, Azərbaycanda həmişə sülh, həmrəylik, dostluq, qardaşlıq olsun. Sizin kəndin timsalında bunlar aydın görünür. Mən İvanovkanın inkişafda olduğunu görməyimə şadam. Bura müasir kənddir, hətta kənd yox böyük şəhərdir”. Olqa Timofyevna qeyd etdi ki, cənab Prezidentin səsləndirdiyi bu cümlələr əsas verir ki, Azərbaycan tolerantlığa nümunə ölkədir. Adət ənənləri haqqında sualımıza isə, Olqa Timofyevna bildirdi ki, İvanovkada molokanlarla yanaşı, ləzgilər və azərbaycanlılar yaşayır. Üç ayrı millətin nümayəndələri bir kənddə yaşasalar da, milli-mənəvi dəyərlərinə görə xeyli fərqlənirlər. Burada insanlar ailə dəyərlərinə daha çox önəm verirlər. Demək olar ki, çox nadir hallarda molokan qızları başqa millətlərin nümayəndələri ilə ailə həyatı qururlar. İvanovkalılar dəbdəbədən uzaqdılar. Onlar ata-babalarının, əsrlər əvvəl qoyduğu milli ənənələrini qoruyub sağlamağı üstün tutlar. Mətbəximiz demək olar ki, eynidir. Bizlər də əziz qonaq üçün aş bişiririk.

Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyəsi əsasında səhifəni hazırladı: Pərviz Əliyev, İsmayıllı, İvanovka

Zaman.-2015.-23 may.-S.13.