Azərbaycan regionda gübrədən ən az istifadə edən ölkədir

Azərbaycanda kiçik və ortamiqyaslı aqro-biznes müəssisələrinin inkişafına yardım etmək və aqrar sığortanı təşviq etmək məqsədilə dünən Bakıda “Azərbaycanda kənd təsərrüfatı sığortası mexanizmlərinin təkmilləşdirilməsi” mövzusunda təlim başlayıb. İlk paneldə “Kənd təsərrüfatı sektorunun inkişafı və təkmilləşdirilməsində kənd təsərrüfatı sığortasının əhəmiyyəti” mövzusunda müzakirələr aparılıb. İkinci paneldə iştirakçılara kənd təsərrüfatı sığortası məhsullarının hazırlanması metodologiyası üzrə təlim keçirilib.Təlim zamanı iştirakçılar məlumat tələblərinin icmalı, sığorta məhsullarının növü, strukturu və komponentləri, yenidən sığortalanma və aqro-sığorta sisteminin inkişafı üçün lazım olan digər əhəmiyyətli aspektlər haqqında məlumatlandırılacaq. IFC-nin (Beynəlxalq Maliyyə Korporasiyası) ekspertləri bu sistemin Ukraynada inkişaf etdirilməsi ilə bağlı öz praktik təcrübəsini bölüşüb.Qeyd edək ki, görüş IFC-nin Avropa və Mərkəzi Asiya üzrə Aqro-maliyyə Layihəsi tərəfindən yerli sığorta şirkətləri üçün təlim təşkil etmək məqsədilə Azərbaycan Sığortaçıları Assosiasiyası ilə birlikdə keçirilir.Dünən həmçinin “Azərbaycan kənd təsərrüfatı maliyyə aləti” (AZAFF) adlı layihəsi çərçivəsində “Azərbaycanda iqtisadi diversifikasiyanın sürətləndirilməsi: kənd təsərrüfatına dəstək” adlı tədbir keçirilib. Tədbiri giriş sözü ilə Frankfurt məktəbinin nümayəndəsi Erdal Kocaoğlu açıb.Daha sonra isə Azərbaycanın kənd təsərrüfatı nazirinin müavini Seyfəddin Talıbov çıxış edib. O, son zamanlar Azərbaycanda bu sahədə görülən işlərdən danışıb: “Kənd təsərrüfatı texnikasına marağın çox olması səbəbindən məcbur olduq ki, növbəli sistemə keçək. Həmçinin, mineral gübrələrlə təminatı 70%-ə, məbləği isə 50 manatdan 80 manata çatdırılmasına nail olduq”.“Aİ-nin araşdırmasına görə, Azərbaycan regionda gübrədən ən az istifadə edən ölkədir. Bizdə təxminən hər hektara 7-10 kq gübrə düşür. Amma Gürcüstan, Özbəkistan və başqa ölkələrdə bu ən azı 4 dəfə çoxdur”, - deyə nazir müavini vurğulayıb.

Zaman.- 2015.- 29.-noyabr.- S. 4