90 illik yubileydən mesaj: “Azərbaycanın xarici siyasətinin prioriteti Dağlıq Qarabağ münaqişəsinin həllidir”

XİN başçısı Azərbaycanın xarici siyasətində neft strategiyasının və enerji diplomatiyasının xüsusi yer tutduğunu da bildirib

Azərbaycanın diplomatik xidmətinin 90 illik yubileyi ilə bağlı silsilə tədbirlərin keçirilməsi davam etməkdədir. İyulun 6-da Gəncədə, 7-də Naxçıvanda keçirilən tədbirlərdən sonra bu qəbildən olan növbəti tədbir dünən Bakıda keçirildi. “Azərbaycan qlobal siyasətdə: Xarici siyasətin formalaşması” mövzusunda təşkil olunan beynəlxalq konfransda Azərbaycanın xarici ölkələrdəki səfir və konsulları, eləcə də ölkəmizdəki xarici diplomatik korpusların nümayəndələri iştirak ediblər.

Konfransa sədrlik edən xarici işlər nazirinin müavini, Azərbaycan Diplomatik Akademiyasının rektoru Hafiz Paşayev 90 il əvvəl Şərqdə ilk demokratik dövlət olan Azərbaycan Xalq Cümhuriyyətinin (AXC) qurulduğunu, bu dövlətin diplomatik xidmətinin əsaslarının qoyulduğunu deyib. O bildirib ki, AXC dövründə Azərbaycanın xarici ölkələrdə 16 diplomatik missiyası fəaliyyət göstərib.

Çıxışında Azərbaycan diplomatiyasının tarixinə toxunan xarici işlər naziri Elmar Məmmədyarov isə deyib: “Azərbaycan müstəqillik dövrünə Dağlıq Qarabağ münaqişəsi ilə daxil olub və xarici siyasətin birinci prioriteti də məhz Ermənistan-Azərbaycan münaqişəsidir”. Nazir bu münaqişənin həlli üçün BMT-nin dörd qətnaməsinə əməl etməyin vacibliyini də vurğulayıb. Ermənistanla aparılan danışıqların vacib olduğunu da deyən E. Məmmədyarov: “İki ölkə prezidentlərinin danışıqları çox vacibdir. Danışıqları 5 il əvvəllə müqayisə edəndə irəliləyişlər var. Çətinliklər var, ancaq irəliyə gedirik. Həll prosesində çox ləng hərəkət edirik, ancaq hərəkət edirik. Danışıqları davam etdirəcəyik. Qoşunlar Azərbaycan ərazisindən çıxarıldıqdan, ərazilər azad edildikdən, qaçqınlar qayıtdıqdan sonra daha əsas məsələlərin müzakirəsinə başlayacağıq. Danışıqları bugünkü status-kvoda saxlamaq istəmirik. Ermənistan da başa düşür ki, indiki status-kvoda qalmaq mümkün deyil”, - söyləyib.

XİN başçısı Azərbaycanın xarici siyasətində neft strategiyasının və enerji diplomatiyasının xüsusi yer tutduğunu da bildirib. Onun sözlərinə görə, enerji sahəsində beynəlxalq sazişlər imzalandıqdan sonra ölkədə bütün sahələrdə inkişafın əsası qoyulub.

Türkiyənin sabiq xarici işlər naziri və parlamet sədri Hikmət Çətin Türkiyə və Azərbaycan arasında möcvud olan ortaq diplomatik münasibətlərdən danışıb. O deyib ki, bütün dövrlərdə Türkiyə diplomatiyası Azərbaycanın yanında olub və Azərbaycanın mənafeyinə xidmət edib.

Azərbaycanın diplomatiya tarixinə də toxunan H. Çətin bildirib ki, Əbülfəz Elçibəyin hakimiyyəti dövründə Azərbaycanın Rusiya və İranla münasibətlərinin pozulması həmin hökumətin iki əsas səhvi olub. O, Heydər Əliyevin Azərbaycanın Avroatlantik məkana inteqrasiyası yolunda böyük işlər gördüyünü, Rusiya və İranla münasibətlərin yaxşılaşması istiqamətində mühüm addımlar atdığını söyləyib.

H.Çətin həmçinin Azərbaycanın müsəlman Şərqində 1918-ci ildə ilk demokratik dövlət qurduğunu və qadınlara seçki hüququ verdiyini xatırladıb.

Qeyd edək ki, yubileylə bağlı tədbirlər bu gün də davam etdiriləcək.

Natiq Pənahlı

Zaman.- 2009.- 9-10 iyul.- S. 3.