Yunanıstanın qabaqcıl ali məktəblərindən birində - Patra Universitetində Azərbaycanın ümummilli lideri Heydər Əliyev adına mükafat təsis edilib. Heydər Əliyev adına mükafat universitetin yuxarı kurs tələbələri üçün Azərbaycan və Azərbaycan-Yunanıstan əlaqələri haqqında ən yaxşı elmi işə görə təsis edilib.

Universitetin tələbələri və professor-müəllim heyəti qarşısında Azərbaycanın Yunanıstandakı səfiri Rəhman Mustafayev çıxış edib. O, çıxışında Azərbaycan xalqının ümummilli lideri Heydər Əliyevin həyat yolu, onun Azərbaycan SSR-in başçısı, keçmiş SSRİ hökumətinin rəhbərlərindən biri, müstəqil Azərbaycanın 1993-2003-cü illərdə Prezidenti vəzifələrində fəaliyyəti barədə danışıb.

Layihənin məqsədi yunan tələbələr tərəfindən Azərbaycanın tarixi, mədəniyyəti, daxili və xarici siyasəti, enerji strategiyası, Azərbaycan-Yunanıstan münasibətlərinin müxtəlif aspektlərinin dərindən öyrənilməsinə dəstək verməkdir.

Patra Universiteti Afina və Saloniki universitetləri ilə yanaşı, Yunanıstanın qabaqcıl ali məktəblərindən biridir, nəşr edilən elmi işlərin sayına görə ölkədə birinci yeri tutur. Onun 5 fakültəsində 28 min tələbə təhsil alır.Heydər Əliyev adına mükafat bir neçə ilə hesablanıb. Onun əldə edilməsi üçün elmi və diplom işləri üzrə ümumuniversitet müsabiqəsi keçiriləcək və onun 6 qalibi hər il göstərilən mükafatı alacaq.