İlyas Əfəndiyev Azərbaycan teatrına çox böyük töhfələr veribdir, böyük xidmətlər göstəribdir, çox dəyərli əsərlər yaradıbdır. İlyas Əfəndiyevin yaradıcılığı başqa cəhətlərlə yanaşı, bir də ona görə əhə-miyyətlidir ki, o öz əsərlərində həm Azərbaycan xalqının tarixinin çox mühüm səhifələrini ədəbiyyat, teatr vasitəsilə bugünkü nəsillərə çat-dırıbdır, həm də öz əsərlərində müasir həyatımızın müsbət və mənfi cəhətlərini çox gözəl təsvir edibdir. Beləliklə, xalqımızı həm tarixə hörmət bəsləməyə sövq etmişdir və bu barədə xidmətlər göstərmişdir, tarixi bilmək üçün xalqımıza yardım etmişdir, eyni zamanda yaşadığımız zamanda mənəviyyat, əxlaq, insanlıq, Vətənə və millətə sədaqət ruhunu aşılamışdır. Hesab edirəm ki, xalqımız bu əsərlərdən çox bəhrələnmişdir.

Ona görə də mən bu gün İlyas Əfəndiyevin bütün yaradıcılığını, onun yazdığı əsərləri böyük minnətdarlıq hissi ilə xatırlayıram. Hesab edirəm ki, o, xalqımız qarşısında öz borcunu, daha doğrusu, öz missiyasını şərəflə yerinə yetirmişdir, xalqımıza, mədəniyyətimizə, teatrımıza, ədəbiyyatımıza çox böyük irs, böyük sərvətlər qoyub getmişdir. Güman edirəm ki, bunu xalqımız heç vaxt unutmayacaqdır. Şübhəsiz ki, biz İlyas Əfəndiyevin xatirəsini əbədiləşdirmək üçün qərarlar da qəbul edəcəyik, şəxsən mən edəcəyəm, çünki o, buna layiqdir. Belə əsərlərlə o, onsuz da xalqın qəlbində yaşayacaqdır.

Heydər Əliyev,

Azərbaycan xalqının ümummilli lideri

İlyas Əfəndiyev klassik ədəbi fikrin böyük ənənələri zəminində öz üslubunu yaradan sənətkar kimi xalqımızın söz sənəti xəzinəsinə dəyərli töhfələr vermişdir. Yazıçının bədii nailiyyətlərlə zəngin irsi ədəbiyyatımızda yeni mərhələnin təşəkkülünə səmərəli təsir göstərmişdir. Azərbaycan teatr səhnəsinin müasir simasının formalaşmasında İlyas Əfəndiyev dramaturgiyası özünəməxsus əhəmiyyətli yer tutur.

İlham ƏLİYEV,
Azərbaycan Respublikasının Prezidenti

İlyas Əfəndiyev əməkçilərin zəhmət birliyini böyük məhəbbətlə və hərarətlə təsvir edir, onların zəhmətini parlaq və real boyalarla göstərir...

  Səməd Vurğun,

Xalq şairi

Azərbaycan sovet şeirinin təməlini qoymuş Süleyman Rüstəmlə Səməd Vurğunun, Rəsul Rzanın arasında kökü dərinliklərə yayılması, gövdənin birliyi, yekparəliyi nöqteyi-nəzərindən bir birlik, vahidlik, budaqların eyni göy üzünə ayrı-ayrı tərəflərdən uzanması nöqteyi-nəzərindən isə ayrılıq vardır. Bir-birinə həm oxşayırlar, həm oxşamırlar. Mirzə İbrahimovla Hüseyn Mehdinin nəsri haqqında da, ustad Cəfər Cabbarlının və İlyas Əfəndiyevin dramaturgiyası haqqında da eyni şeyi söyləmək mümkündür.

Nazim Hikmət,

Beynəlxalq Sülh mükafatı laureatı, türk şairi

İlyas Əfəndiyev hər cür milli məhdudluqdan uzaq bir yazıçıdır. Ədəbiyyatımızın beynəlmiləlçilik, ümumbəşəri ideyalarına sadiq olan ədib, cəmiyyətdə müxtəlif millətlərdən olan insanların necə qardaş kimi əlbir çalışıb, xoşbəxt yaşadıqlarını dövrümüzün ən böyük nailiyyəti kimi təsvir edir.

Məmməd Arif,

akademik

Azərbaycan ədəbiyyatı mənim nəzərimdə böyük və rəngarəng gülüstan isə, İlyas Əfəndiyevin yaradıcılığı bu gülüstanda öz gözəlliyi, ətri və təravəti ilə dərhal diqqəti cəlb edən cazibədar toplu və dolğun bir çiçəklikdir.
İlyas Əfəndiyev yaradıcılıqda gözəlliyə, incəliyə, estetik zərifliyə meyl edən yazıçıdır. O, bədii əsər üçün vacib xüsusiyyətlərə dilin ifadəli və obrazlı olmasına, xarakterlərin canlı və dolğun çıxmasına, süjet ve kompozisiya bütövlüyünə ciddi diqqət yetirir, böyük əmək sərf edir, bu da nəticəsiz qalmır, onun əsərlərinin maraqlı, oxunaqlı olmasına kömək edir. Bu əmək və səyin mükafatı isə oxucuların məhəbbətidir ki, İlyas onun azlığından şikayət edə bilməz.

Mirzə İbrahimov,

Xalq yazıçısı, akademik

İlyas Əfəndiyev yaradıcılığı Azərbaycan sovet ədəbiyyatının münbit zəminindən doğan, rişələnən, getdikcə köklənən qoşa qardaş kimi qoşalıqda yaradıcılıqdır. Bu yaradıcılıq istedadlı nasirlə mahir dramaturqu birləşdirib, birlikdə söykək-söykəyə qaldırır... İlyas nəsri onun dramaturgiyasına, dramaturgiyası da onun nəsrinə dayaq durur, kömək göstərir. İlyasın nəsri də, dramaturgiyası da ahəngdardır, cazibədardır... Sən İlyas nəsrini oxuyursan, istər onun romanı, povesti olsun, istərsə bir-birindən gözəl hekayəsi olsun, heç birisi səni oxucunu yormur...

Süleyman Rəhimov,

Xalq yazıçısı

İlyas Əfəndiyev gələcək nəsillərin də sevə-sevə oxuyacağı uzunömürlü əsərlər yaradıcısıdır..

Məmməd Cəfər Cəfərov,

akademik

İlyas Əfəndiyev öz yaradıcılıq xüsusiyyətlərinə sadiq qalaraq, təbii insan psixologiyasını təbii və sadə boyalarla göstərir.

Mehdi Hüseyn,

Xalq yazıçısı

İlyas Əfəndiyev dramaturgiyasının məhsulu və məhsuldarlığı yalnız rəqəmlə ölçülə bilməz. Burada kəmiyyət keyfiyyətdən ayrı deyildir. Bu keyfiyyətin, ideya-bədiilik vəzninin özü əsl meyardır..

Mehdi Məmmədov,

SSRİ Xalq artisti, professor

Azərbaycan sovet şeirinin təməlini qoymuş Süleyman Rüstəmlə Səməd Vurğunun, Rəsul Rzanın arasında kökü dərinliklərə yayılması, gövdənin birliyi, yekparəliyi nöqteyi-nəzərindən bir birlik, vahidlik, budaqların eyni göy üzünə ayrı-ayrı tərəflərdən uzanması nöqteyi -nəzərindən isə ayrılıq vardır. Bir-birinə həm oxşayırlar, həm oxşamırlar. Mirzə İbrahimovla Hüseyn Mehdinin nəsri haqqında da, ustad Cəfər Cabbarlının və İlyas Əfəndiyevin dramaturgiyası haqqında da eyni şeyi söyləmək mümkündür.Nazim

Hikmət,

Beynəlxalq Sülh mükafatı laureatı, türk şairi

İlyas Əfəndiyev ən çox oxunan, sevilən, özü də heç kimə oxşamayan yazıçılarımızdandır. Onun öz mövzuları, həyat hadisələrinə öz yanaşma yolları və üsulu vardır. Bu yaradıcılığını məşhur edən problemlərində özünəməxsusluq, orijinallıq güclüdür. Ədib, adətən, hamı üçün aydın və məlum olan həyat problemlərinə müraciət etməyi sevmir, gerçəkliyin elə həqiqətlərini, elə məsələləri üzə çıxarmağı bacarır ki, onlar həm də yeni olur, ədəbi maraq oyadır, müasir problemləri barədə düşünənləri hərəkətə gətirir və təsadüfi deyil ki, ictimai müzakirəyə, mübahisəyə səbəb olurlar.

Kamal Talıbzadə,

akademik

İlyas Əfəndiyev bir sənətkar kimi həmişə həyatın işıqlı cəhətlərinə xüsusi diqqət verir və qələmə alır. Onun qəhrəmanları dövrümüzün qabaqcıl adamlarıdır. Bu qəhrəmanlar yaşayıb yaratmaqdan, xarüqələr yaratmaqdan həzz alırlar. Yüksək mədəniyyət, gözü-könlü tox, halal əməklə ömür sürən, əliəyrilərə, gözüdağınıqlara, vəziyyətdən sui-istifadə edən şöhrətpərəstlərə qarşı barışmaz olan bu adamlar ilk görüşdən oxucu və tamaşaçıların ürəyinə yol tapır, özünü sevdirir.

Əli Vəliyev,

Xalq yazıçısı

Azərbaycan Dövlət Akademik Dram Teatrının son otuz ildəki inkişafını İlyas Əfəndiyevsiz təsəvvür etmək mümkün deyil...
Onun pyeslərində həmişə təzə, təravətli görünən bir müasirlik var. Bu müasirlik isə həyatımızın daxili məzmunundan, onu irəli aparan qəhrəmanların fəaliyyətindən və bu fəaliyyətin konfliktlərindən, poeziyadan doğur... İlyas Əfəndiyevin dramaturgiyasında realizm və romantika, sərt həyat həqiqətləri ilə şeiriyyət həmişə vəhdət təşkil edir.

İsmayıl Dağıstanlı,

SSRİ Xalq artisti.

İlyas Əfəndiyevin əsl roman ustasının müşahidəçilik qabiliyyəti, təbiəti sənətkar gözüylə görmək məharəti diqqəti cəlb edir. Məsələn, hələ iyirmi il bundan əvvəl “Dağlar arxasında üç dost” romanını oxuyarkən, kiçik bir səhnəciyin təbii, inandırıcı təsviri – dağlarda gecə, otaqdan bayıra düşən və qar üstündə yuxarıdan aşağı uzanan işıq zolağının təsviri, dağa qalxanların bu işıq zolağını arabir yarması... o qədər ustalıqla işlənmişdir ki, indi də elə bil, gözümün önündədir. Rəssam dili ilə desək, bu səhnə birbaşa naturadan çəkilmişdir.

Mikayıl Abdullayev,

SSRİ Xalq rəssamı

Yazıçı canlılığı yaratmaq üçün heç bir boyasını əsirgəməmişdir.

Cəfər Xəndan,

professor

Dramaturq maraqlı, həyati bir süjet seçmiş, burada insanların əlaqələrini, təbiətlərindəki ziddiyyətləri, rəğbət və mütəqabil münasi-bətlərini vermiş, yaddaqalacaq obrazlar silsiləsi yaratmışdır.

Əli Sultanlı,
professor

O, Kommunist Partiyasına daxil olmadı. Çünki əqidəsinə zidd gedə bilmirdi... O, mənə inanırdı və mən də çəkinmədən ona ürəyimi açır, içində yaşadığım rejimə nifrətimi bildirirdim. Çünki onun saflığı-na, xarakterik bütövlüyünə və ən ümdəsi də mənim kimi totalitar reji-mə nifrət etdiyinə çox yaxşı bələd idim. Bir sözlə, İlyas Əfəndiyev həm yazıçı həm də insan kimi bütöv və özünəməxsus bir xarakterə malik olan kamil bir şəxsiyyət idi.

Bəxtiyar Vahabzadə,
Xalq şairi, akademik

İlyas Əfəndiyev bir insan, bir yazıçı və bir vətəndaş kimi öz missiyasını yerinə yetirdi və dünyadan köçdü. Amma mən bu köçdən sonrakı bütün bu müddət ərzində onun varlığını yalnız mənən yox, cismən də daima hiss etmişəm, mənə elə gəlir ki, (həmişə də belədir), bax, bu dəm, mən bu sətirləri yazarkən də o burdadır, mənim başımın üstündədir, bizi görür, müşahidə edir, hər şeydən xəbərdardır və bu sətirləri oxuyur, indiki ali məqamının bizim bu dünyanın adamlarının dərk edə bilmədiyi bu sətirlərə qiymət verir.

Elçin,
Xalq yazıçısı

Unudulmaz İlyas müəllim! Özünlə əbədiyyət dünyasına yazılma-mış neçə şah əsərinizi apardınız? Ey üzü nurlu el məhəbbəti qazanmış xoşbəxt sənətkar! Sənin yaratdığın əsərlər də, həm ana, həm ata qayğısı, məhəbbət ilə böyütdüyün oğullar da vətəndaşlıq hüququ qazanmışlar. Rahat yat, böyük sənətkar! Vətən oğlu!
Qəbrin nurla dolsun!

Mirvarid Dilbazi,
Xalq şairi

İlyas Əfəndiyev dahi Cəfər Cabbarlıdan sonra milli səhnəmizin çətin, ağır və şərəfli yükünü az qala yarım əsr öz çiyinlərində apardı və Cəfərdən sonra ikinci nəfəs verdi, milli teatrımızı yeni zirvələrə qaldırdı, özünün İlyas Əfəndiyev teatrını yaratdı.

Cabir Novruz,
Xalq şairi

Böyük sənətkarlıq səriştəsinə və zəngin təxəyyülə malik İlyas Əfəndiyev həqiqəti bir an da unutmur, tariximizdə bu günümüzün, bugünümüzdə isə tariximizin problemlərini əks etdirir.

Fərəməz Maqsudov,
akademik

İlyas müəllim böyük yazıçı olmaqla yanaşı, həm də böyük el ağsaqqalı idi... Onda olan qaynar həyat eşqi məni sevindirirdi – ölümün ondan çox-çox uzaqda olduğunu zənn edirdim. Lakin bir gün... eşitdiyim xəbər məni sarsıtdı... Çünki Azərbaycan, Azərbaycan xalqı, xüsusilə ədəbiyyat və teatr həvəskarları qüdrətli sənətkarı itirmişdi. Bəli, amansız ölüm öz sözünü demişdi: artıq o, yox idi. Nə etmək olar? Bu, həyatın dəyişməz qanunudur.

Əhliman Əmiraslanov,
akademik

Yazıçı İlyas Əfəndiyev son illər nəsr sahəsində daha məhsuldar və səmərəli işləmişdir. Onun povest və romanları, xüsusən, əxlaqi-psi-xoloji problemlərin qoyuluşu və həlli sahəsində, müasir nəsrimizin axtarış və nailiyyətlərini ən yaxşı əks etdirən əsərlərdəndir. Sevindirici haldır ki, İlyas Əfəndiyevin son pyesi də bu nəsrin nailiyyətləri zəmi-nində və səviyyəsində yazılmışdır.
Məhz buna görədir ki, “Sən həmişə mənimləsən” pyesi ədəbi həyatımızda yeni söz, müvəffəqiyyətli bir hadisə olub lirik, perspek-tivli dramaturgiya, müasir psixoloji teatr yaratmaq yolunda yaxşı bir təşəbbüs, təcrübə kimi də səslənə bilmişdir.
Azərbaycan tarixi barədə klassik sənədlər – yeddi “Qarabağna-mə” var. Bütünlüklə İlyas Əfəndiyevin yaradıcılığını mən səkkizinci “Qarabağnamə” hesab edirəm.

Yaşar Qarayev,
akademik

İlyas Əfəndiyev əsərlərində insani borc, vətəndaş vəzifəsi, fərdi və cəmiyyətin qarşılıqlı münasibətləri, ailə və əxlaq problemləri barədə həmişə təravətli söhbət açır, öz qənaətlərini məhz yeni bədii obrazlar vasitəsilə, özünəməxsus orijinal üslubda ifadə edir.

Bəkir Nəbiyev,
akademik

Onun bütün hekayələri, oçerkləri, dramları, roman və povestləri, kino ssenariləri, məqalələri, tam halda yaradıcılığı müasir həyatın duru və şəffaf çeşməsindən su içmişdir... Onun bütün əsərlərində əsas, aparıcı problem müasir insan, bu insanın psixoloji, əxlaqi cəhətdən formalaşması, onun davranışı, fikir və düşüncələri, mənəvi dünyasıdır.

Qulu Xəlilov,
professor

Cəsarətlə deyə bilərəm ki, böyük dramaturqumuz Cəfər Cabbarlı-dan sonra teatrımız üçün yananlardan biri də İlyas Əfəndiyev olmuşdur. Onun bütün əsərlərində... al-əlvan rənglərə, naxışlara rast gəlirik... O, zəngin təfəkkürə, geniş müşahidə qabiliyyətinə malik sənətkarlardandır. Həm də, mən deyərdim ki, elə bəstəkar qəlbli sənətkardır. Onun dram əsərlərindəki müsbət obrazlar təkcə xarakterləri ilə deyil, bəzən lirik, kövrək mahnıları ilə də yadda qalırlar.

Səid Rüstəmov,
Xalq artisti, bəstəkar

İlyas Əfəndiyev insanların şüurunda və psixologiyasında baş ve-rən təbəddülatı əks etdirməyə çalışan, psixoloji ziddiyyət və çarpış-maları əsərlərin mərkəzi konfliktinə çevirən yazıçıdır. Onun əsərlərin-də xüsusilə pyeslərində xarici toqquşmalar, zahiri effekt xatirinə düzəldilmiş səhnələr yoxdur. O, həmişə qəhrəmanlarının səciyyəsini, onların həyata, ictimai hadisələrə münasibətini psixoloji cəhətdən araşdırır, çox zaman ilk baxışda xırda, intim görünən konfliktləri genişləndirib siyasi məna və mahiyyətlə zənginləşdirir.

İsmayıl Şıxlı,
Xalq yazıçısı

Mən İlyas Əfəndiyevin “Sarıköynəklə Valehin nağılı” romanının oxucular və ədəbi ictimaiyyət tərəfindən hərarətlə qarşılanmasının əsas səbəbini onun bədii keyfiyyətındə, sənətkarlıqla yazılmasında görürəm. Xalqı narahat edən problemlərə toxunmaq, onlardan bədii əsərlərdə vətəndaşlıq məsuliyyəti ilə söz açmaq vacib şərtlərdəndir və bu, ədəbiyyatın zəruri vəzifələrindən biridir...
Romanda hadisələr dramatik gərginlik və ardıcılıqla bir-birini izləyir, dərin maraq hissi ilə oxucunu arxasınca aparır.
Müasirlik böyük şərtdir.

Hüseyn Abbaszadə,
Xalq yazıçısı

Elə sənətkarlar var ki, yaratdığı əsər, fərqi yoxdur, pyes olsun, tablo olsun, musiqi olsun, insanı düşündürür, onun hislərinə hakim kə-silir, gözəlliklər aləminə çəkib aparır, haqq-ədalət uğrunda mübarizəyə səsləyir, həqiqəti axtarıb tapmaqda ona kömək edir.
Mənim hörmətli dostum İlyas da belə sənət adamlarındandır.

Tahir Salahov,
SSRİ Xalq rəssamı

Sevimli Xalq yazıçımız İlyas Əfəndiyevin əsərləri dağlar arxasın-dakı uzaq dağ kəndlərində, sonsuz görünən yeniyetməlik və gənclik illərində bizim yaxın dostumuz olmuşdur.

Sabir Rüstəmxanlı,
Xalq şairi

İlyas Əfəndiyevin yaradıcılığı heç şübhəsiz Azərbaycan ədəbiy-yatında bir mərhələ təşkil edir.

Mövlud Süleymanlı,
Xalq yazıçısı

Müasirlik və novatorluq İlyas Əfəndiyev yaradıcılığının mühüm məziyyətlərindəndir. Yenilik hissi onda qüvvətlidir. O, daim axtarışda olan məzmun, mövzu və bədii formalarla ədəbiyyatımızı zənginləşdirməyə çalışan yazıçılardandır. İlyas Əfəndiyev romantik üslubda yazılmış hekayə və povestlərin, psixoloji dramların və lirik səpkili realist romanların müəllifidir. Liriklik, romantika, psixoloji təhlil onun yaradıcılıq üslubunun ana xəttidir.

Seyfulla Əsədullayev,
professor

İlyas Əfəndiyev qüdrətli sənətkar idi.
İlyas Əfəndiyev qayğıkeş ata idi.
İlyas Əfəndiyev gözəl baba idi.
İlyas Əfəndiyev yaxşı dost idi.

Tofiq Quliyev,
Xalq artisti, bəstəkar

İlyas müəllimin yoxluğundan ürək ağrısı ilə söhbət açanda, daha qüvvətli bir duyğu qəlbimi bürüyür: İlyas müəllim yaşayır, Azərbaycan xalqı kimi, Cəfər Cabbarlı kimi, Üzeyir Hacıbəyov kimi, Hüseyn Cavid kimi...

Leyla Bədirbəyli,
Xalq artisti

Ümumiyyətlə, bir oxucu kimi mənə elə gəlir ki, İlyasda lirik əhvalruhiyyə dəmir ağacının həyat eşqi kimi güclüdür. Amma yaxşı ki, heç vaxt lirikaya nə isə lirik bir səhnə və yaxud vəziyyət yaratmaq xatirinə meyl etmir. Onun lirikası qəhrəmanlarının psixoloji vəziyyəti ilə və bilavasitə yaranmış zəruri situasiya ilə bağlı olur.

Əli Zeynalov,
Xalq artisti

İlyas Əfəndiyev dramaturgiyası həqiqətən Azərbaycan teatırının simasıdır.

Polad Bülbüloglu,
Xalq artisti, bəstəkar

İlyasın yoxluğuna inana bilmirəm. İlyasın indi də haradasa, sakit bir guşədə əyləşib bizi heyrətə gətirən yeni əsər yazdığına ümid bəs
ləyirəm. Allah sənə rəhmət eləsin, qardaşım, sən onun – o böyük Allahın sənə bağışladığı qənirsiz istedadı xalqından, millətindən əsirgəmədin. Geriyə baxmaya bilərsən. Nigaran, nəyisə demədim deyə, düşünməyə bilərsən. Qardaşım sən o Allahın neməti olan yaradıcılığını bol-bol verdin insanlara. Ruhun şad olsun!

Əzizə Cəfərzadə,
yazıçı, professor

İlyas Əfəndiyev mənim “Qarğış” povestim barədə “Açıq məktub” yazmışdı... Onda – mənim ümidsizlik bataqlığında tək-tənha, min bir şübhə, qayğı, çaşqınlıq içində çapalayan anımda – gözəgörünməz kömək əlini uzadıb, məni o bataqlıqdan çıxarmışdı və bu işi heç bir məna güdmədən, təmənnasız, yalnız Böyük Ədəbiyyat naminə etmişdi. Mən bu hadisədən sonra bir daha o şübhə və çaşqınlıqlar bataqlığına düşmədim və bugünəcən də məni min bir bataqlıqdan çox-çox uca nöqtələrdə saxlayan qüvvələrdən biri – bəlkə də, ən qiymətlisi İlyas müəllimin həmin o məktubunun məndə yaratdığı ədəbiyyata və özümə inam hissidi yəqin...

Afaq Məsud,
yazıçı

İlyas Əfəndiyevin yaratdığı surətlərdə bir kövrəklik, yanğı və yanıqlıq var. “Unuda bilmirəm”də Nərmini xatırlayın. Görün bu qız necə də məhəbbəti dünyada hər şeydən üstün tutur. Onun üçün məhəbbət həyat deməkdir. Bu rolda mən 250 dəfədən çox səhnəyə çıxmışam. Hər dəfə də Nərmindən ayrılıb Amaliya olanda təəssüflənmişəm. Həyatdan götürülmüş belə obrazları qələmə alan İlyas Əfəndiyev, şübhəsiz ki, ürəyinin bütün hərarətini onlara bəxş etmişdir.

Amaliya Pənahova,
Xalq artisti

İlyas Əfəndiyev hansı mövzuda yazırsa yazsın, cəmiyyətimizin inkişaf meyillərini, dövrümüzün müsbət tendensiyalarını vətəndaşlıq amalı güclü olan qəhrəmanlar vasitəsilə tamaşaçılara çatdırır.

Həsən Turabov,
Xalq artisti

Biz aktyorlar İlyas Əfəndiyevin tamaşalarında çıxış etməyi özümüzə fəxr bilmişik.

Şəfiqə Məmmədova,
Xalq artisti

Əgər teatrımızın yaşlı nəslə mənsub olan aktyorları bir aktyor kimi yetişmələrində müasirləri Cəfər Cabbarlının və onun dramaturgiyasının böyük rolundan fəxrlə danışırdılarsa, biz də, yəni altmışıncı illərdə səhnəyə gəlmiş gənclər, cəsarətlə deyə bilərik ki, səhnəyə gəlişimizdə, bir aktyor kimi püxtələşməyimizdə müasirimiz İlyas Əfəndiyevin və onun zəngin dramaturgiyasının müstəsna rolu olmuşdur.

Fuad Poladov,
Xalq artisti

Həyatda kimə və nəyə görə yaşamağımın səbəbini dərk etdiyimə və bir də Vətənimə, xalqıma olan sonsuz sevgimə görə tək bir insana – unudulmaz İlyas Əfəndiyeva borcluyam...

Firəngiz Mütəllimova,
Xalq artisti

İlyas müəllim, mən sizinlə birgə işlədiyim birinci tamaşadan – “Büllur saray”dan tutmuş sonuncu tamaşa – “Hökmdar və qızı”na qədər böyük bir mənəvi dünya qazandım. Bu dünya çox ülvi, çox işıqlı, çox böyük, çox zəngin idi...
Nə yaxşı ki, mənim sənət dünyamda Siz varmışsınız, İlyas müəllim. Əlvida! Ürəyimdə qoyub getdiyiniz bu işıqlı xatirələr üçün sağ olun!

Bəsti Cəfərova,
Xalq artisti

Əziz İlyas müəllim! Siz çiyinlərinizi, ürəyinizi, həyatınızı verib Azərbaycanı XXI yüzilliyin astanasına gətirib çıxardınız.
...Qəbriniz nurla dolsun, Torpağınız nur olsun! Daha gözəl bir dünyada görüşənədək, İlyas müəllim!

Vaqif Bayatlı Odər,
şair

İlyas Əfəndiyevin ədəbi yaradıcılıq portreti üçün nəzərdə tutula biləcək cizgilər çoxdur, onları saymaqla qurtarmaz. Lakin həmin cizgilərin hamısı üçün ümumi olan, onların hamısına aşılanmış bir keyfiyyət var: vüsət və şairanəlik.

Əkbər Ağayev,
tənqidçi, professor

İlyas Əfəndiyev müasirlərimizdən yazır. Cəmiyyətin inkişafının müxtəlif mərhələlərində inqilabın qələbəsi və elmi-texniki inkişafla əlaqədar qarşıya çıxan mürəkkəb ictimai-siyasi, iqtisadi-mədəni, mənəvi-əxlaqi problemlərin həlli yolunda çalışan, axtaran müasirlərimizin ictimai fəaliyyəti və daxili aləmləri onun əsas bədii tətbiq hədəfıdir.

Cəlal Məmmədov,
yazıçı