“Həqiqətən Kamil Əliyev Azərbaycanda rəssamlıq məktəbinin çox görkəmli bir nümayəndəsidir. Xüsusən, rəssamlıq sənətinin çox çətin bir sahəsi olan xalçaçılıq-rəssamlıq sənətinin böyük bir rəssamıdır...

Onun əsərləri də Azərbaycan xalçaçılıq sənətində, rəssamlıq məktəbində daim yaşayacaqlar və çox görkəmli əsərlər kimi Azərbaycan mədəniyyəti xəzinəsində öz yerlərini tutacaqlar”.

"Azərbaycan xalçaçılıq və dekorativ tətbiqi sənətinin qədim ənənələrinin qorunub saxlanılmasında və inkişaf etdirilməsində Kamil Əliyevin mühüm xidmətləri vardır. Onun əsərləri öz orijinallığı və monumentallığı ilə səciyyələnərək mədəniyyətimizin parlaq səhifəsini təşkil edir".

"Kamil Əliyev sənət kəhkəşanının parlaq ulduzudur”.

Kamil Əliyevin zəngin fantaziyası, yaradıcı düşüncəsini təyin edən istedadı, onu yeni, özünəməxsus xalça kompozisiyaları yaratmağa sövq etmişdir. Bunlar Azərbaycanın görkəmli şəxsiyyətlərinə həsr olunmuş portret-xalçalarda, habelə milli xarakterin qabarıq ifadə olunduğu mürəkkəb süjetli-tematik və ornamental kompozisiyalarda öz əksini tapmışdır.

Röya Tağıyeva,
sənətşünaslıq doktoru, professor

"Ustad Kamil Əliyev haqqında çox eşitmişəm. Onun “Atatürk” xalısının şəklini Türkiyə qəzetlərində görmüşəm. “Məhəmməd Əmin Rəsulzadə” xalısıyla tanış olarkən bir daha yəqin etdim ki, Kamil bəy o tay-bu tay Azərbaycanın ən görkəmli portret-xalı leylacııdır”.