|
Azərbaycan SSR Nazirlər Sovetində Azərbaycan SSR Nazirlər Sovetini bədii ədəbiyyat, musiqi, teatr sənəti, təsviri sənət, kino sənəti və jurnalistika sahəsində ən görkəmli əsərlər yaradılmasına həvəs oyatmaq məqsədi ilə M.F.Axundov adına 3 respublika mükafatı təsis etmişdir. Mükafatların hər birinin məbləği 2500 manatdır. M.F.Axundov adına respublika mükafatları haqqında əsasnamə təsdiq edilmişdir. M.F.Axundov adına mükafat almaq üçün əsərləri yazıçılar, bəstəkarlar, rəssamlar, kinematoqrafiyaçılar və jurnalistər ittifaqları, elmi tədqiqat idarələri, teatr cəmiyyəti, teatrlar, jurnal və qəzet redaksiyaları, müəssisələrin kollektivləri, ali məktəblər, nazirliklər, idarələr və ictimai təşkilatlar təqdim edirlər. Mükafatları SSR Nazirlər Soveti iki ildə bir dəfə, Azərbaycanda Sovet Hakimiyyəti qurulması günündə respublika M.F.Axundov adına Mükafatlar Komitəsinin təqdimatı ilə verir. Mükafat almaq üçün təqdim edilən namizədlərin və əsərlərin siyahısı mükafat verilməsindən iki ay əvvəl respublika mətbuatında dərc olunur. M.F.Axundov adına mükafata layiq görülən şəxlərə “M.F.Axundov adına mükafat laureatı” adı, döş nişanı və diplom verilir. Respublikanın M.F.Axundov adına Mükafatlar Komitəsi aşağıdakı tərkibdə təsdiq edilmişdir: M.A.Dadaşzadə (sədr), N.Q.Əbdürrəhmanov, M.H.Abdullayev, F.C.Əmirov, Q.M.Babayan, C.İ.Hacıyev, M.B.Dadaşov, Ç.H.Cəfərov, M.Ə.İbrahimov, Q.Ə.Qarayev, M.Ə.Məmmədov, M.H.Mərdanov, Mehdi Hüseyn, M.N.Nəcəfov, İ.İ.Nəzərov, P.B.Sabsay, T.T.Salahov, T.M.Tağızadə və Y.B.Qarayev (məsul katib). Respublika M.F.Axundov adına Mükafatlar komitəsində Respublika komitəsi M.F.Axundov adına mükafat almaq üçün irəli sürülən əsərləri qəbul etməyə başlamışdır; 1962-ci il noyabrın 1-dən 1964-cü il noyabrın 1-dək dövrdə çap edilmiş, sərgidə və ya ekranda göstərilmiş ədəbiyyat və incəsənət əsərləri bu il nəzərdən keçiriləcəkdir. Bu il mükafat almaq üçün təqdim edilən əsərlərin qəbul müddəti martın 15-dək müəyyən edilmişdir. Mükafat almaq üçün təqdim edilən əsərlər bu ünvana göndərilir: Bakı, Kommunist küçəsi, 10, 2-ci mərtəbə, 10 nömrəli otaq, Respublika M.F.Axundov adına Mükafatlar Komitəsi, telefon 2-54-83.
13 fevral 1965-ci il, |