“Ədibin evi”. Bu ev görkəmli yazıçı, alim-pedaqoq Mir Cəlal Paşayevin 1920-1940-cı illərdə yaşadığı evdir. Bu ev onun ailəsi tərəfindən təmir edilərək ədibin anadan olmasının 109-cu ildönümündə ev-muzeyi kimi mədəniyyətsevərlərin istifadəsinə verilib.

Mir Cəlal Paşayev onu yazıçı kimi məşhur edən “Bir gəncin manifesti”, “Dirilən adam” romanlarını, bir çox satirik hekayələrini məhz bu evin birinci mərtəbəsində, ailəsi ilə yaşadığı iki kiçik otaqda yazıb. Həyat yoldaşı Püstə xanımla burada ailə qurub, ilk övladları bu evdə dünyaya göz açıb. Ədibin 1967-ci ildə yazdığı “Bakı görüşləri” adlı xatirə məqaləsində bu evdə yaşadığı illər, həmin dövrdəki Bakının yaradıcı ab-havası, yazıçının müasirləri ilə görüşləri, fikir mübadilələri təsvir edilib.

“Ədibin evi”nin yaradılmasında məqsəd bu yeri ədəbiyyat, mədəniyyət ocağına çevirmək və bununla da Mir Cəlal irsini davam etdirməkdir. “Ədibin evi” şəhərimizin ən maraqlı və tarixi guşələrindən birində - İçərişəhərdə yerləşir.