Azərbaycanda milli kitabxanaşünaslığın, kitabxana-biblioqrafiya sahəsinin görkəmli nümayəndələrindən biri, tanınmış kitabxana nəzəriyyəçisi, istedadlı təşkilatçı, alim və pedaqoq Rasim Əhməd oğlu Kazımov 1932-ci ildə may ayının 18-də Bakı şəhərində ziyalı ailəsində anadan olmuşdur.

1950-ci ildə 44 saylı orta məktəbi gümüş medalla bitirərək V.M.Molotov adına Moskva Dövlət Kitabxanaçılıq İnstitutuna daxil olmuşdur.

1954-cü ildə universiteti bitirərək biblioqraf ixtisası almış və SSR miqyasında ən sanballı təhsil ocaqlarından birinin ilk və yeganə azərbaycanlı məzunu kimi adını Azərbaycan kitabxana işi tarixinə yazmışdır.

Ali təhsilinin başa vurduqdan sonra vətənə qayıdan gənc Rasim Kazımov 1954-1957-ci illərdə Bakı Kitabxanaçılıq Texnikumunda müəllim işləmişdir.

1957-1962-ci illərdə M.F.Axundov adına Azərbaycan Dövlət Kitabxanasının Biblioqrafiya şöbəsinə müdir təyin edilmiş, qısa müddətdə elmi katib, elmi işlər üzrə direktor müavini vəzifələrinə qədər yüksəlmiş, kollektivin dərin hörmətini qazanmağa müvəffəq olmuşdur.

1962-ci ildən Azərbaycan SSR EA Nizami Gəncəvi adına Dil və Ədəbiyyat İnstitunun aspiranturasına daxil olan Rasim Kazımov, eyni zamanda Mərkəzi Elmi Kitabxanada yeni yaradılmış Kartoqrafıya şöbəsinin müdiri və Metodiki Qrupun rəhbəri təyin edilmişdir.

1965-1976-cı illərdə AMEA Mərkəzi Elmi Kitabxanasına rəhbərlik etmişdir.

1972-ci ildə “Azərbaycanda bədii ədəbiyyat və ədəbiyyatşünaslıq biblioqrafiyası: 1920-1965-ci illər” adlı namizədlik dissertasiyası müdafiə edərək, pedaqoji elmlər namizədi alimlik dərəcəsi almışdır.

1977-2008-ci illərdə Bakı Dövlət Universitetinin Kitabxanaçılıq-informasiya fakültəsində müəllim işləmişdir.

1987-ci ildə Bakı Dövlət Universitetinin Kitabxanaçılıq-informasiya fakültəsinin Kitabxanaşünaslıq kafedrasının dosenti elmi adını almışdır. 1976-cı ildən ömrünün sonunadək Bakı Dövlət Universitetinin Kitabxanaşünaslıq kafedrasının dosenti olmuşdur.

2004-2008-ci illərdə AMEA Mərkəzi Elmi Kitabxanasının Kitabxanaşünaslıq şöbəsində böyük elmi işçi kimi fəaliyyət göstərmişdir.

Rasim Əhməd oğlu Kazımov bir sıra xarici ölkələrdə keçirilmiş (Gürcüstan, Rusiya, Latviya, Belarus və s.) beynəlxalq konfranslarda iştirak etmiş və respublikamızı layiqincə təmsil edərək kitabxana işinin aktual mövzuları üzrə yaddaqalan çıxışlar etmişdir.

“Kitabxana işi haqqında Azərbaycan Respublikası Qanununun layihəsinin, Azərbaycan Kitabxanaçılar Cəmiyyətinin və Azərbaycanda Kitabxana İşinin İnkişafı Assosiasiyasının Nizamnaməsinin hazırlanmasında dosent Rasim Əhməd oğlu Kazımovun böyük xidməti olmuşdur.

Rasim Əhməd oğlu Kazımov “Neft [Mətn] : ədəbiyyat göstəricisi (Bakı, 1960), “Azərbaycan Respublika Kitab Palatası: yaddaş (1925-1965)” (Bakı, 1965), “Состояние и развитие библиографии художественной литературы литературоведение в Азербайджане” (Баку, 1965), “Azərbaycan Dövlət Kitabxanası” (Bakı, 1965), “Azərbaycanda bədii ədəbiyyat və ədəbiyyatşünaslıq biblioqrafiyasının vəziyyəti və inkişafı məsələləri: 1946-1964-cü illər (Bakı, 1965), “Библиография художественной литературы и литературоведения в Азербайджане” (1920-1965 гг.) (Баку, 1972), “Библиотечный факультет” (Баку, 1983), “Kitabxana işçisinin məlumat kitabı (Bakı, 1986), “Abuzər Alı oğlu Xələfov” (Bakı, 1987), “Bazar iqtisadiyyatı və kitabxanalar” (Bakı, 1996), “Kitabxana işinin iqtisadiyyatı (Bakı, 2000), "Kitabxana marketinqi: BDU-nun Kitabxanaçılıq-informasiya fakültəsi üçün proqram” (Bakı, 2000), “Kitabxana işinin iqtisadiyyatı” (Bakı, 2004), “Müdriklik və alimlik zirvəsində: Abuzər Alı oğlu Xələfov” (Bakı, 2006) və s. kitabların və 100-ə yaxın elmi məqalənin müəllifidir.

O, dəfələrlə SSRİ Elmlər Akademiyasının, Mədəniyyət Nazirliyinin və Həmkarlar İttifaqının fəxri fərman və diplomları ilə təltif edilmiş, “Əmək şücaətinə görə” və “Əmək veteranı” medallarına layiq görülmüşdür.

Görkəmli alim 2008-ci il fevral ayının 18-də Bakı şəhərində vəfat etmişdir.