XX əsrin ikinci yarısında Azərbaycan təsviri incəsənətinin parlaq nümayəndələrindən biri olan Oqtay Sadıqzadə görkəmli şairə Xurşidbanu Natəvanın portretini 1983-cü ilə yaratmışdır. Rəssamın digər portretlərində olduğu kimi burada da rəng qamması təsvir olunan insanın emosional vəziyyəti ilə şərtlənir. Rəssam obrazının bədii mahiyyətini və psixoloji vəziyyətini parlaq tünd rəng fonunda təsvirinə daha çox üstünlük verir. Müəllif tünd rəng fonunda kolorit aksentlərinin qabardılmasından kompozisiyanın dinamikliyini yüksəltmək vasitəsi kimi istifadə edir.
Şairənin mavi gözləri, bir qədər soyuq və sakit siması onun geyiminin mavi-gümüşü rənginə, rəngarəng qırçınlarına, çiyninə salınmış tirmə şalın isti rənglərinə olduqca uyğundur. Rəssam burada müasir dövrün ideallarına sadiq qalan poetik, romantik obraz yarada bilmişdirQeyd etməliyik ki, şairənin bu portreti rəssam tərəfindən uydurulmamışdır. Natəvanın XIX əsrdən qalma yeganə fotoşəkili zəmanəmizədək gəlib çatmışdır. Oqtay Sadıqzadə Natəvanın ən xarakterik cizgilərini götürərək, öz düşüncələrini, baxışlarını əlavə edərək yeni bir kompozisiya yaratmışdır.